અમૂલ દુનિયાની સૌથી મજબૂત ખાદ્ય- ડેરી બ્રાન્ડ, કંપનીએ 100માંથી 91 બીએસઆઈ સ્કોર જીત્યા

આણંદ – 23 ઑગસ્ટ :  ભારતીય કંપની અમૂલ વિશ્વની સૌથી મજબૂત ફૂડ અને ડેરી બ્રાન્ડ બની ગઈ છે. સ્વિટ્ઝર્લેન્ડની નેસ્લેએ $20.8 બિલિયનમાં સૌથી મૂલ્યવાન બ્રાન્ડનું બિરુદ જાળવી રાખ્યું છે. બ્રાન્ડ ફાઇનાન્સ ફૂડ એન્ડ ડ્રિંક-2024 રિપોર્ટ અનુસાર, અમૂલનો પ્રભાવશાળી બ્રાન્ડ સ્ટ્રેન્થ ઇન્ડેક્સ (BSI) સ્કોર 100માંથી 91 છે. આ કારણોસર તેને AAA+ રેટિંગ મળ્યું છે. ખાસ વાત એ છે કે 2023 સુધીમાં કંપનીની બ્રાન્ડ વેલ્યુ 11 ટકા વધીને 3.3 અબજ ડોલર થઈ ગઈ છે. અહેવાલમાં જણાવાયું છે કે અમૂલના ઉત્પાદનોની વિશાળ શ્રેણીએ તેને માત્ર ભારતમાં જ નહીં પરંતુ સમગ્ર વિશ્વમાં જાણીતું નામ બનાવ્યું છે. ભારતીય બટર માર્કેટમાં 85 ટકા બજારહિસ્સો અને ચીઝમાં 66 ટકા બજારહિસ્સો સાથે, અમૂલની બ્રાન્ડ ઇક્વિટી દર વર્ષે મજબૂત બની રહી છે.

કંપનીનું મૂલ્યાંકન
લેઝ  =12.02
યિલી = 11.60
ટાયસન = 8.26
ડેનોન =8.02
ક્વેકર = 7.54
કેલોગસ = 6.09
રિગલી   = 6.02
મેન્ગ્નીયુ =5.41
ડોરીટોસ =  4.63

આંકડા: અબજ ડોલરમાં

ટોપ-100માં માત્ર ચાર ભારતીય કંપનીઓ
બ્રાન્ડ વેલ્યુએશનના સંદર્ભમાં વિશ્વની ટોચની 100 કંપનીઓમાં માત્ર ચાર ભારતીયોનો સમાવેશ થાય છે. અમૂલ $3.3 બિલિયનના મૂલ્યાંકન સાથે યાદીમાં 22મા ક્રમે છે. 2023ની સરખામણીમાં કંપનીએ ચાર સ્થાનની છલાંગ લગાવી છે. બ્રિટાનિયા પાંચ સ્થાન સરકીને 68માં સ્થાને પહોંચી ગયું છે. મધર ડેરી સાત સ્થાનની છલાંગ લગાવીને 87માં સ્થાને છે, જ્યારે નંદિની 95માં સ્થાને છે.
જાહેરાત

એકંદર બ્રાન્ડ મૂલ્યમાં 4 ટકાનો ઘટાડો
વૈશ્વિક સ્તરે, ખાદ્ય અને પીણા ક્ષેત્રની એકંદર બ્રાન્ડ વેલ્યુ 4 ટકા ઘટીને લગભગ $268 બિલિયન થઈ ગઈ છે. આ ઘટાડાનું કારણ એ છે કે ગ્રાહકો પરંપરાગત મોટી બ્રાન્ડ્સ કરતાં નાની અને ખાનગી લેબલ કંપનીઓને પસંદ કરી રહ્યા છે.

ડેરી ઉદ્યોગ સામેના પડકારો
ટોપ-10 ડેરી બ્રાન્ડ્સનું મૂલ્યાંકન 6 ટકા ઘટ્યું છે, જે હવે $43.8 બિલિયન થયું છે. આમ છતાં, અમૂલ સતત ચોથા વર્ષે સૌથી મજબૂત ડેરી બ્રાન્ડ બની છે.

અમૂલ પછી ચીનની બે કંપનીઓ  
અમૂલ પછી ચીનની મેંગનીયુ ડેરી અને યિલી બીજા તથા ત્રીજા સ્થાને છે. આ યાદીના ટોપ 10માં જોવા જઈએ તો ભારત, વિયેતનામ, સાઉદી, ફિનલેન્ડ અને ડેનમાર્કની એક-એક કંપનીનો સમાવેશ થાય છે. અમૂલની બ્રાન્ડ વેલ્યુ વધીને $3.3 બિલિયન થઈ ગઈ છે. નોંધનીય છે કે અમૂલે હર્શીઝને હરાવીને નંબર 1નો ખિતાબ જીત્યો છે.

આ પણ વાંચો : રોટલીના લોટમાં મિક્સ કરશો આ ત્રણ વસ્તુ તો સ્વાસ્થ્યને થશે બમણા ફાયદા