ઉદયપુર હિંસા કેસમાં સરકારની મોટી કાર્યવાહી: આરોપી વિદ્યાર્થીના ઘર પર બુલડોઝર ફેરવી કાપ્યુ વીજ કનેકશન

• ઉદયપુરમાં છરીના હુમલામાં ગંભીર રીતે ઘવાયેલા વિદ્યાર્થીની સારવાર ચાલી રહી છે. તેની હાલત હજુ પણ નાજુક છે. તે જ સમયે, પ્રશાસને હવે આરોપી વિદ્યાર્થીના ઘર પર બુલડોઝર ફેરવી દીધુ છે

ઉદયપુર, 17 ઓગસ્ટ: ઉદયપુરમાં છરીના હુમલાની ઘટનામાં પ્રશાસને આરોપીના ઘર પર બુલડોઝર ફેરવી દીધુ છે અને સાથે જ આોપીનું વીજ કનેકશન પણ કાપી દીધું છે. મોટી કાર્યવાહી કરતા વહીવટીતંત્રએ ખાનજીપીરની દિવાનશાહ કોલોનીમાં બનેલા આરોપીઓના ગેરકાયદેસર મકાન પર બુલડોઝ ફેરવી દીધું છે. બુલડોઝર ચાલુ થયું ત્યારે મોટી સંખ્યામાં પોલીસ ફોર્સ હાજર રહી હતી. કહેવાય છે કે આરોપીનો પરિવાર આ મકાનમાં ભાડુઆત તરીકે રહેતો હતો.

વિદ્યાર્થીની હાલત હજુ પણ નાજુક

છરીના હુમલામાં ઘાયલ વિદ્યાર્થીની હાલત હજુ પણ નાજુક છે. તેની સારવાર તબીબોની દેખરેખ હેઠળ ચાલી રહી છે. જે હોસ્પિટલમાં વિદ્યાર્થીની સારવાર ચાલી રહી છે ત્યાં મોટી સંખ્યામાં પોલીસ દળ તૈનાત છે.

ક્યારે બન્યો હતો બનાવ?

કહેવાય છે કે આ ઘટના શુક્રવારે સવારે બની હતી. તે જ સમયે, બંને વિદ્યાર્થીઓ વચ્ચે થોડા દિવસો પહેલા દલીલ પણ થઈ હતી. શુક્રવારે વિદ્યાર્થી બેગમાં છરી લઈને આવ્યો હતો અને અન્ય વિદ્યાર્થી પર હુમલો કર્યો હતો. જ્યારે ક્લાસમાં ઘોંઘાટ શરૂ થયો ત્યારે સ્કૂલ સ્ટાફને ઘટનાની જાણ થઈ. જે બાદ તેને તાત્કાલિક હોસ્પિટલમાં દાખલ કરવામાં આવ્યો હતો.

ઘટનાની માહિતી મળતા જ મોટી સંખ્યામાં લોકો રસ્તા પર ઉતર્યા

ઘટનાની જાણ થતાં જ લોકોનું મોટું ટોળું રસ્તા પર આવી ગયું હતું અને બહાર પાર્ક કરેલા વાહનો પર પથ્થરમારો શરૂ કર્યો હતો. ટોળાએ અનેક વાહનોને આગ પણ ચાંપી હતી. જેના કારણે સમગ્ર શહેરમાં અરાજકતા ફેલાઈ ગઈ હતી. આ પછી, માહિતી મળતાની સાથે જ ઘણા પોલીસ સ્ટેશનના દળો પણ ઘટનાસ્થળે પહોંચી ગયા. જે બાદ કોઈક રીતે પરિસ્થિતિ કાબૂમાં આવી હતી. આ ઉપરાંત સુરક્ષાને ધ્યાનમાં રાખીને જિલ્લામાં શુક્રવારે રાત્રે 10 વાગ્યાથી શનિવારે રાત્રે 10 વાગ્યા સુધી ઈન્ટરનેટ બંધ કરી દેવામાં આવ્યું છે. સમગ્ર જિલ્લામાં કલમ 163 પણ લાગુ કરવામાં આવી છે.

આ પણ વાંચો: જાહેર હિતમાં હડતાળ સમેટી લેવા ડૉક્ટરોને કેન્દ્ર સરકારની અપીલઃ સલામતીનાં પગલાં લેવા આપી ખાતરી