જમ્મુ-કાશ્મીર અને હરિયાણામાં ચૂંટણી જાહેર, જાણો મતદાન અને પરિણામની તારીખ

• જમ્મુ-કાશ્મીરમાં ત્રણ તબક્કામાં મતદાન યોજાશે જ્યારે હરિયાણામાં એક જ રાઉન્ડમાં મતદાન થશે

નવી દિલ્હી, 16 ઓગસ્ટઃ હરિયાણા અને જમ્મુ-કાશ્મીરમાં વિધાનસભા ચૂંટણીની આજે શુક્રવારે જાહેરાત કરવામાં આવી છે. ચૂંટણીપંચે પત્રકાર પરિષદ યોજીને ચૂંટણી કાર્યક્રમની જાહેરાત કરી છે. જમ્મુ-કાશ્મીરમાં ત્રણ તબક્કામાં મતદાન યોજાશે જ્યારે હરિયાણામાં એક જ રાઉન્ડમાં મતદાન થશે. બંનેના ચૂંટણી પરિણામો 4 ઓક્ટોબરે એક સાથે જાહેર કરવામાં આવશે. જમ્મુ-કાશ્મીરમાં પ્રથમ રાઉન્ડ માટે નોટિફિકેશન 20મીએ જાહેર થશે અને 18મી સપ્ટેમ્બરે મતદાન થશે. બીજા તબક્કાનું મતદાન 25 સપ્ટેમ્બરે અને ત્રીજા તબક્કાનું મતદાન 1 ઓક્ટોબરે હાથ ધરવામાં આવશે.

હવે હરિયાણાની વાત કરવામાં આવે તો અહીં 1લી ઓક્ટોબરે એક જ રાઉન્ડમાં મતદાન થશે અને જમ્મુ-કાશ્મીરની સાથે 4 તારીખે પરિણામ જાહેર થશે. હરિયાણામાં મતદારોની અંતિમ યાદી 27 ઓગસ્ટે જાહેર કરવામાં આવશે. રાજ્યમાં 2.1 કરોડ મતદારો મતદાન કરશે. રાજ્યમાં કુલ 20 હજાર 629 મતદાન મથકો હશે. CEC રાજીવ કુમારે કહ્યું કે, આ વખતે અમે બહુમાળી ઈમારતોમાં પણ પોલિંગ બૂથ બનાવીશું. આ સિવાય સ્લમ વિસ્તારોમાં પણ આ કરવામાં આવશે. ગુરુગ્રામ, ફરીદાબાદ અને સોનીપતમાં આવું કરવાની જરૂર હતી, જેનું ધ્યાન રાખવામાં આવ્યું છે. તમામ બૂથમાં પાણી, શૌચાલય, રેમ્પ, વ્હીલચેર જેવી વસ્તુઓની વ્યવસ્થા કરવામાં આવશે.

ચીફ ઇલેક્શન કમિશ્નર રાજીવ કુમારે શું કહ્યું?

મુખ્ય ચૂંટણી કમિશનરે કહ્યું કે, કાશ્મીરના યુવાનોમાં ચૂંટણીને લઈને ઉત્સાહ છે. અમે 20 ઓગસ્ટે જમ્મુ-કાશ્મીરમાં મતદાર યાદી જાહેર કરીશું. ત્યાંના લોકો ચિત્રમાં બદલાવ જોવા માંગે છે. જમ્મુ-કાશ્મીરમાં 11,838 મતદાન મથકો બનાવવામાં આવશે. ચૂંટણીને લઈને અમે હવામાનમાં થોડો સુધારો થવાની રાહ જોઈ રહ્યા હતા. જમ્મુ-કાશ્મીરમાં 20 લાખ યુવાનો મતદાન કરવા તૈયાર છે. અમે 2024ની સામાન્ય ચૂંટણીમાં કાશ્મીરમાં ચૂંટણીલક્ષી લોકશાહીનો પાયો નાખ્યો હતો. હવે તેના પર બિલ્ડિંગ તૈયાર કરવાની જરૂર છે. તમામ ઉમેદવારોને સમાન સુરક્ષા આપવામાં આવશે.

રાજીવ કુમારે વધુમાં કહ્યું કે, 5 ઓગસ્ટ, 2019 પછી જમ્મુ-કાશ્મીરની રાજકીય પરિસ્થિતિ પણ બદલાઈ ગઈ છે. આર્ટીકલ 370 હટાવ્યા બાદ અને રાજ્યના પુનર્ગઠન પછી, જમ્મુ અને કાશ્મીરને કેન્દ્રશાસિત પ્રદેશ જાહેર કરવામાં આવ્યો છે. આ સિવાય હવે અહીં કુલ 90 વિધાનસભા સીટો છે. અગાઉ અહીં 87 સીટો હતી જેમાંથી 4 સીટો લદ્દાખની હતી. આવી સ્થિતિમાં, જ્યારે પુનર્ગઠન પછી લદ્દાખ એક અલગ કેન્દ્રશાસિત પ્રદેશ બન્યો, ત્યારે જમ્મુ અને કાશ્મીરમાં માત્ર 83 બેઠકો બચી હતી. પછી સીમાંકન પછી ચૂંટણી પંચે 7 બેઠકો વધારી અને હવે કુલ 90 બેઠકો છે. તેમાંથી કાશ્મીર ક્ષેત્રમાં 47 બેઠકો છે. જમ્મુમાં હવે 43 સીટો છે. આ પહેલા કાશ્મીરમાં 46 અને જમ્મુ ક્ષેત્રમાં 37 સીટો હતી.

હવે શું છે જમ્મુ-કાશ્મીરમાં બેઠકોનું સમીકરણ?

સીમાંકન પછી, જમ્મુ ક્ષેત્રમાં 6 વિધાનસભા બેઠકો વધી અને કાશ્મીરમાં પણ એક બેઠક વધી. જમ્મુ-કાશ્મીરમાં છેલ્લે 2014માં વિધાનસભાની ચૂંટણી યોજાઈ હતી. ચૂંટણી પછી અણધાર્યો ફેરફાર થયો. ભાજપ અને PDPએ સાથે મળીને સરકાર બનાવી હતી, જે પાંચ વર્ષ સુધી ટકી શકી નહીં. પછી જ્યારે 2019 આવ્યું, ત્યારે રાજ્યપાલ શાસન દરમિયાન આર્ટીકલ 370 દૂર કરવામાં આવી અને પુનર્ગઠન પછી, જમ્મુ અને કાશ્મીર રાજ્યને બદલે કેન્દ્રશાસિત પ્રદેશ બની ગયું. ઉલ્લેખનીય છે કે, સુપ્રીમ કોર્ટે જમ્મુ-કાશ્મીરમાં 30 સપ્ટેમ્બર સુધીમાં ચૂંટણી કરાવવાનો આદેશ આપ્યો છે.

2019માં હરિયાણામાં ભાજપે કેટલી સીટો જીતી?

મહત્ત્વપૂર્ણ છે કે, હરિયાણામાં કુલ 90 વિધાનસભા સીટો છે, જેમાંથી ભાજપ પાસે હાલમાં માત્ર 40 ધારાસભ્યો છે. તે અપક્ષો સાથે સરકાર ચલાવી રહી છે, પરંતુ આ વખતે તેમણે  પુનરાગમન કરવાના પડકારનો સામનો કરવો પડશે. ભાજપે 2014માં હરિયાણામાં પહેલીવાર પોતાના દમ પર સરકાર બનાવી હતી અને ત્યારથી લઈને સતત બે ટર્મથી સત્તામાં છે. ચૂંટણીના થોડા મહિના પહેલા જ રાજ્યમાં સત્તા પર રહેલી જનનાયક જનતા પાર્ટી સાથે તેનું ગઠબંધન તૂટી ગયું છે, જે 2019ની વિધાનસભા ચૂંટણી પછી થયું છે. આ રીતે ભાજપ સતત ત્રીજી વખત એકલા હાથે ચૂંટણી જંગમાં ઉતરવા જઈ રહ્યું છે.

હરિયાણા લોકસભા ચૂંટણીમાં ભાજપ 44 સીટો પર આગળ

ઉલ્લેખનીય છે કે, લોકસભા ચૂંટણીમાં ભાજપે રાજ્યની 10માંથી 5 બેઠકો જીતી હતી. જો એસેમ્બલી પર નજર કરવામાં આવે તો કુલ 90 એસેમ્બલીમાંથી 44 સીટો પર તેને લીડ મળી હતી. આ જ કારણ છે કે, ભાજપ સત્તામાં રહેવાની આશા સાથે ત્રીજી વખત ચૂંટણી લડવા જઈ રહ્યું છે. તે જ સમયે, કોંગ્રેસને આશા છે કે બે હાર બાદ આ વખતે વાતાવરણ તેના પક્ષમાં થઈ શકે છે. હરિયાણામાં સામાન્ય રીતે એક જ રાઉન્ડમાં મતદાન થાય છે. તેનું કારણ એ છે કે, હરિયાણા એક નાનું રાજ્ય છે અને સુરક્ષા પડકારો જમ્મુ-કાશ્મીર કે નક્સલ પ્રભાવિત વિસ્તારો જેવા નથી.

આ પણ જૂઓ: રાહુલ ગાંધીની નાગરિકતાને લઈને ફરી વિવાદ, ડૉ.સુબ્રમણ્યમ સ્વામીએ હાઈકોર્ટમાં દાખલ કરી અરજી