એક ગુજરાતી, એક ચીનીઃ બે બદમાશોએ અમેરિકામાં કર્યો કાંડ, જાણો પૂરી વિગત

• ગુજરાતના એક વ્યક્તિ અને તેના ચીની ભાગીદારની અમેરિકામાં છેતરપિંડી કરવાના આરોપમાં ધરપકડ કરવામાં આવી છે. તેઓએ સાથે મળીને બે વૃદ્ધ અમેરિકન યુગલોને તેમની જીવનભરની બચતને સોનામાં બદલવાના વચન આપીને છેતર્યા છે

અમેરિકા, 12 ઓગસ્ટ: બે મિત્રોએ મળીને એક એવું કૌભાંડ આચર્યું છે જેની ચર્ચા ત્રણ દેશોમાં થઈ રહી છે. એક મિત્ર ગુજરાતનો અને બીજો ચીનનો છે. તેઓએ સાથે મળીને અમેરિકનોને ખૂબ જ સારી રીતે છેતર્યા છે. પણ હવે તેમનો પાપનો ઘડો ભરાઈ ગયો છે. પોલીસે છેતરપિંડીના આરોપમાં બંને મિત્રોની ધરપકડ કરી છે. તેમણે બે વૃદ્ધ અમેરિકન દંપતીઓને તેમની જીવન બચતને અનેકગણી કરવાનું વચન આપીને છેતર્યા છે. હોમલેન્ડ સિક્યુરિટી તપાસ અધિકારીઓએ ગુજરાતના રહેવાસી હર્મિશ પટેલ અને ચીનનો રહેવાસી વેનહુઈ સુનની ધરપકડ કરી છે. આ ફ્રોડમાં અત્યાર સુધીમાં કુલ 14 લાખ ડૉલર (લગભગ 11 કરોડ 75 લાખ)થી વધુની છેતરપિંડી થઈ છે. આ મામલાની તપાસ કરવામાં આવી રહી છે અને તેનું નેટવર્ક કેટલું મોટું હતું તેની તપાસ કરવામાં આવી રહી છે.

ટાઈમ્સ ઓફ ઈન્ડિયાના સમાચાર મુજબ આરોપી હર્મિશ પટેલની ઉંમર 25 વર્ષ છે. ટ્રોય, ન્યૂયોર્કના એક દંપતીને 10 લાખ ડૉલરની છેતરપિંડી કરવાના આરોપમાં 29 જુલાઈના રોજ તેની ધરપકડ કરવામાં આવી હતી. તે જ સમયે, છેતરપિંડી કરનાર ચીની નાગરિક વેનહુઈ સુને મેરીલેન્ડના એક વૃદ્ધ દંપતીને આવી જ રીતે 331,817 ડૉલરની છેતરપિંડી કરી ચૂક્યો છે. અમેરિકન પોલીસ અધિકારીઓને પટેલના ફોન રેકોર્ડ દ્વારા જ આ બંને વચ્ચેના કનેક્શનની જાણ થઈ હતી.

ગુજરાતી-ચીનીએ કેવી રીતે લગાવ્યો ચૂનો

આ બંને મિત્રોએ કેવી રીતે છેતરપિંડી કરી એ ચાલો અહીં જાણીએ. હકીકતમાં 1 ડિસેમ્બર, 2023 ના રોજ ટ્રોય દંપતીને PayPal Inc તરફથી એક ઇમેઇલ પ્રાપ્ત થયો. એવું કહેવામાં આવ્યું હતું કે તેમના ખાતા પર 465.88 ડૉલરનો ચાર્જ લેવામાં આવ્યો છે, જે 24 કલાકની અંદર તેના ખાતામાંથી કાપવામાં આવશે. ઈમેલમાં કસ્ટમર સપોર્ટ માટે બે નંબર આપવામાં આવ્યા હતા. ઈમેલમાં કહેવામાં આવ્યું હતું કે જો તેમને ટ્રાન્ઝેક્શન અંગે શંકા હોય અથવા ચાર્જ કેન્સલ કરવા માંગતા હોય તો તેઓ આ નંબર પર કોલ કરી શકે છે.

કેવી રીતે બની ઘટના?

ખાતામાંથી પૈસા કપાઈ જવાના ડરથી દંપતીએ તે નંબર પર ફોન કર્યો હતો. કસ્ટમર કેર નંબર પર ફોન ઉપાડનાર વ્યક્તિએ પોતાનો પરિચય માઈક્રોસોફ્ટના કર્મચારી તરીકે આપ્યો હતો. વિલ ગેનન ‘કસ્ટમર સપોર્ટ’ તરીકે ફોન પર હતો. તેણે પીડિત દંપતીને એલિઝાબેથ શનિરોવ નામની મહિલાનો નંબર આપ્યો, જેમની ‘ફેડરલ ટ્રેડ કમિશનમાં આસિસ્ટન્ટ ડિરેક્ટર’ તરીકે ઓળખ આપવામાં આવી હતી. એલિઝાબેથ દંપતીને કહે છે કે તેમની બચત જોખમમાં છે કારણ કે તેમના સામાજિક સુરક્ષા નંબરો લીક થઈ ગયા છે. તેમને તેમના નાણાં બચાવવામાં મદદ કરવાની ઓફર કરતાં, એલિઝાબેથે તેમને તેમની કેટલીક મિલકત વેચી દેવાની અને યુએસ ટ્રેઝરી ડિપાર્ટમેન્ટના લોકરમાં પૈસા રાખવાની સલાહ આપી.

કપલને ખબર પણ ના પડે કે…

વાતચીત દ્વારા, દંપતીને લાગ્યું કે તેમની સાથે જેઓ વાત કરે છે તેઓ ખરેખર ફેડરલ સ્ટાફ છે. વાતચીત દ્વારા તેમને ખાતરી થઈ. આ પછી, દંપતીએ તેમની (ઠગોની) સલાહનું પાલન કર્યું અને 5 ડિસેમ્બર, 2023 ના રોજ, ડીંગશી ટ્રેડ લિમિટેડ નામની ચીન સ્થિત કંપની સાથે $102,000 નો ઓનલાઈન વ્યવહાર કર્યો. આ પછી, એલિઝાબેથે તેને 7 ડિસેમ્બરે ફરીથી ફોન કર્યો અને બાકીની રકમનું સોનું ખરીદી લઈને તેને ટ્રેઝરી વિભાગના લોકરમાં રાખવા કહ્યું. આ કૉલ અને જાન્યુઆરી 2024 વચ્ચે, દંપતીએ ઓછામાં ઓછા $1 મિલિયનના સોનાની ત્રણ વખત ખરીદી કરી.

હર્મિશની ભૂમિકા શું છે?

આ પછી, ઇલિનોયના સ્ટ્રીમવુડમાં રહેતા હર્મિશ પટેલે બે મહિનામાં એક વૃદ્ધ દંપતી પાસેથી 1,058,082 ડૉલરનું સોનું પડાવી લીધું હતું. હર્મિશ પટેલ દર વખતે કારમાં દંપતીના ઘરે આવતો હતો અને સોનું લઈ જતો હતો. જાન્યુઆરીમાં, જ્યારે દંપતીએ છ મહિનાની રજા પર જતા પહેલા તેમના પૈસા પાછા માંગ્યા હતા, ત્યારે નકલી યુએસ એજન્સીના અધિકારીએ તેમને ધમકી આપી હતી કે તેમના સામાજિક સુરક્ષા નંબરો કાઢી નાખવામાં આવશે.

કેવી રીતે ગઈ શંકા?

આ પછી કપલ ડરી ગયું. તે દોડીને તેના નાણાકીય સલાહકાર પાસે ગયા. જ્યારે સલાહકારને છેતરપિંડીની શંકા ગઈ, પછી તેમણે પોલીસનો સંપર્ક કર્યો. અમેરિકન કાયદા અમલીકરણ એજન્સીઓ અને હોમલેન્ડ સિક્યુરિટી ઇન્વેસ્ટિગેશનના વિશેષ એજન્ટોએ હર્મિશ પટેલને તેની કારની નંબર પ્લેટના આધારે પકડ્યો હતો. આ પછી પટેલના ફોન રેકોર્ડ પરથી જાણવા મળ્યું કે તે ઘણીવાર ચાઈનીઝ ઠગને વીડિયો કૉલ કરતો હતો.

ચીન સાથે શું હતું જોડાણ?

વધુ તપાસમાં જાણવા મળ્યું કે ફેબ્રુઆરી 2024 માં, સિલ્વર સ્પ્રિંગ, મેરીલેન્ડના અન્ય એક દંપતી સાથે આવી જ રીતે 331,817 ડૉલરની છેતરપિંડી કરવામાં આવી હતી. આ કેસમાં વેનહુઈ સુનની ધરપકડ કરવામાં આવી હતી. સને દાવો કર્યો હતો કે તે એક ચીની વ્યક્તિના કહેવા પર કામ કરી રહ્યો હતો. પટેલની ચેટ પરથી જાણવા મળ્યું કે તેણે ‘બેસ્ટ ફ્રેન્ડ’ નામની વ્યક્તિને મેરીલેન્ડના કપલ પાસેથી સોનું એકત્ર કરવા માટે સૂચના આપી હતી. કેસ સાથે જોડાયેલા દસ્તાવેજો અને સૂત્રોનું માનવું છે કે પટેલ અને સન બંને એક જ ગેંગ માટે કામ કરતા હતા.

આ પણ વાંચો: કેદની સજા પામેલા બાંગ્લાદેશના વચગાળાના વડાપ્રધાન હવે ભ્રષ્ટાચારના આરોપોમાંથી મુક્ત!