- ત્રણ જવાનો ઘાયલ થયા હોય હોસ્પિટલમાં ખસેડવામાં આવ્યા
- જૈશ-એ-મોહમ્મદના આતંકવાદીઓ સાથે અથડામણ થઈ
- ગાઢ જંગલની અંદર આતંકીઓની શોધખોળ ચાલુ
અનંતનાગ, 10 ઓગસ્ટ : જમ્મુ-કાશ્મીરના અનંતનાગ જિલ્લામાં શનિવારે આતંકવાદીઓ અને સુરક્ષાદળો વચ્ચે અથડામણ થઈ રહી છે. બપોરે થયેલા આ અથડામણમાં બે જવાન શહીદ થયા હતા, જ્યારે ત્રણ જવાન ઘાયલ પણ થયા હતા. ઘાયલોને હોસ્પિટલમાં લઈ જવામાં આવ્યા છે. ગાઢ જંગલની અંદર આતંકીઓની શોધખોળ ચાલુ છે.
બે જવાનો શહીદ, ત્રણ ઘાયલ
ઉલ્લેખનીય છે કે શનિવારે બપોરે દક્ષિણ કાશ્મીરના અનંતનાગમાં એન્કાઉન્ટર શરૂ થયું હતું. જેમાં અગાઉ એક સૈનિક ઘાયલ થયાના સમાચાર આવ્યા હતા, થોડા સમય બાદ અન્ય એક જવાન ઘાયલ થયાની વાત સામે આવી હતી. ઘાયલોને હોસ્પિટલ લઈ જવામાં આવ્યા હતા. સેના દ્વારા જારી કરવામાં આવેલા અપડેટમાં બે જવાનોના શહીદ થવાના સમાચાર છે, સાથે જ ત્રણ જવાનોના ઘાયલ થવાની માહિતી છે.
સેનાને આતંકવાદીઓની હાજરી અંગે ઈનપુટ મળ્યા હતા
આ પહેલા સેનાએ અનંતનાગમાં એન્કાઉન્ટરને લઈને નિવેદન જાહેર કર્યું હતું. સેનાએ કહ્યું હતું કે વિશિષ્ટ ગુપ્ત માહિતીના આધારે, ભારતીય સેના, જમ્મુ અને કાશ્મીર પોલીસ અને CRPF દ્વારા શનિવારે સામાન્ય વિસ્તાર કોકરનાગ, અનંતનાગમાં સંયુક્ત ઓપરેશન શરૂ કરવામાં આવ્યું હતું. આ દરમિયાન આતંકીઓ સાથે અથડામણ થઈ હતી, જેમાં બે સુરક્ષા જવાનો ઘાયલ થયા હતા અને તેમને આ વિસ્તારમાંથી બહાર કાઢવામાં આવ્યા છે. હજુ ઓપરેશન ચાલુ છે.
કોર્ડન અને સર્ચ ઓપરેશન ચાલુ છે
મળતી માહિતી મુજબ, શનિવારે બપોરે સમાચાર આવ્યા હતા કે દક્ષિણ કાશ્મીરના અનંતનાગ જિલ્લામાં સુરક્ષાદળો અને આતંકવાદીઓ વચ્ચે અથડામણ થઈ છે. પોલીસ પાસેથી મળેલી માહિતી મુજબ આતંકવાદીઓની હાજરી અંગે ઈનપુટ મળ્યા હતા. માહિતી મળ્યા પછી, સુરક્ષા દળોએ દક્ષિણ કાશ્મીર જિલ્લાના કોકરનાગ વિસ્તારના અહલાન ગડોલેમાં ઘેરાબંધી અને સર્ચ ઓપરેશન શરૂ કર્યું છે.
જૈશ-એ-મોહમ્મદના આતંકવાદીઓ સાથે એન્કાઉન્ટર
એવું સામે આવ્યું છે કે દક્ષિણ કાશ્મીરના અનંતનાગ જિલ્લાના કોકરનાગના ગાગરમંડુ જંગલ વિસ્તારના અહલાનમાં એન્કાઉન્ટર થઈ રહ્યું છે. જંગલમાં છુપાયેલા ભારે હથિયારોથી સજ્જ આતંકવાદીઓના જૂથ સાથે સંયુક્ત દળોનું એન્કાઉન્ટર થયું છે. ઓપરેશન ચાલુ છે. આ પહેલા આ ઓપરેશનમાં એક જવાન ઘાયલ થયાના સમાચાર હતા, જેને 92 બેઝ આર્મી હોસ્પિટલમાં લઈ જવામાં આવ્યા હતા. આ પછી, અન્ય એક જવાન ઘાયલ થયાના સમાચાર સામે આવ્યા બાદમાં બે જવાનો શહીદ થયા હતા. જોવા મળ્યા બાદ આતંકીઓ ગાઢ જંગલ વિસ્તારમાં ભાગી ગયા, મોટા પાયે સર્ચ ઓપરેશન ચાલી રહ્યું છે. જૈશના આતંકવાદીઓ સાથે સુરક્ષા દળોનું એન્કાઉન્ટર થયું છે. માનવામાં આવે છે કે આતંકવાદીઓ ડોડાથી દક્ષિણ કાશ્મીરમાં પ્રવેશ્યા છે.
