નવી દિલ્હી, 9 ઓગસ્ટ : રોહિત શર્માની કપ્તાનીમાં ભારતીય ક્રિકેટ ટીમ શ્રીલંકામાં વનડે શ્રેણી હારી ગઈ છે. આ પ્રવાસ પર T20 શ્રેણીમાં ભારતે સૂર્યકુમાર યાદવના નેતૃત્વમાં યજમાન ટીમને હરાવ્યું હતું. ટીમ ઈન્ડિયાએ ODIમાં ઘણા પ્રયોગો કર્યા જે નિષ્ફળ રહ્યા હતા. યજમાન ટીમના સ્પિન આક્રમણ સામે ભારતીય બેટ્સમેનો આત્મસમર્પણ કરતા જોવા મળ્યા હતા. T20 વર્લ્ડ કપની ટ્રોફી જીત્યા બાદ ભારતીય ટીમની આ પ્રથમ શ્રેણી હતી. શ્રીલંકા બાદ હવે ભારતીય ટીમ બાંગ્લાદેશ સામે ટકરાશે. ટીમ ઈન્ડિયા બાંગ્લાદેશની યજમાની કરશે. બંને ટીમો વચ્ચે ટેસ્ટ અને T20 મેચોની શ્રેણી રમાશે.
બાંગ્લાદેશ સામે 2 ટેસ્ટ અને 3 T20 રમાશે
ભારતીય ટીમ આ વર્ષે હવે ODI મેચ રમશે નહીં. ભારત અને બાંગ્લાદેશ વચ્ચે 2 ટેસ્ટ અને 3 મેચની T20 શ્રેણી રમાશે. શ્રેણીની પ્રથમ ટેસ્ટ મેચ 19 સપ્ટેમ્બરથી ચેન્નાઈના એમએ ચિદમ્બરમ સ્ટેડિયમમાં રમાશે, જ્યારે બીજી અને છેલ્લી ટેસ્ટ મેચ 27 સપ્ટેમ્બરથી કાનપુરના ગ્રીન પાર્કમાં રમાશે. ટેસ્ટ બાદ T20 સિરીઝ શરૂ થશે. શ્રેણીની પ્રથમ T20 મેચ ધરમશાલાના HPCA સ્ટેડિયમમાં રમાશે. સીરિઝની બીજી T20 મેચ 9 ઓક્ટોબરે દિલ્હીના અરુણ જેટલી સ્ટેડિયમમાં રમાશે, જ્યારે ત્રીજી અને છેલ્લી T20 મેચ 13 ઓક્ટોબરે હૈદરાબાદના રાજીવ ગાંધી ઈન્ટરનેશનલ સ્ટેડિયમમાં રમાશે.
ટીમ ઈન્ડિયા ન્યુઝીલેન્ડની યજમાની કરશે
બાંગ્લાદેશ સાથે ઘરઆંગણે શ્રેણી રમ્યા બાદ ટીમ ઈન્ડિયા ન્યૂઝીલેન્ડની યજમાની કરશે. કિવી ટીમ ભારત સાથે 3 મેચની ટેસ્ટ શ્રેણી રમવા આવશે. શ્રેણીની પ્રથમ ટેસ્ટ મેચ 16 ઓક્ટોબરે બેંગ્લોરના એમ ચિન્નાસ્વામી સ્ટેડિયમમાં રમાશે જ્યારે બીજી ટેસ્ટ 28 ઓક્ટોબરથી પુણેમાં રમાશે. શ્રેણીની ત્રીજી અને છેલ્લી ટેસ્ટ મેચ 5 નવેમ્બરથી મુંબઈના વાનખેડે સ્ટેડિયમમાં રમાશે.
ભારતે વર્ષના અંતમાં ઓસ્ટ્રેલિયાનો સામનો કરવાનો છે
ન્યુઝીલેન્ડનો સામનો કર્યા બાદ ભારતીય ટીમ દક્ષિણ આફ્રિકાના પ્રવાસે જશે. આ પછી, ભારતીય ટીમ વર્ષના અંતમાં ઓસ્ટ્રેલિયાનો પ્રવાસ કરશે જ્યાં બોર્ડર ગાસ્કર ટ્રોફી હેઠળ બંને ટીમો વચ્ચે 5 મેચની ટેસ્ટ શ્રેણી રમાશે. ટી-20 વર્લ્ડ કપ 2024માં શાનદાર પ્રદર્શન કરનાર ટીમ ઈન્ડિયાના પેસ એટેક લીડર જસપ્રીત બુમરાહ બાંગ્લાદેશ સામેની શ્રેણીમાં વાપસી કરશે. ભારતીય ટીમે ઘરઆંગણે સારું પ્રદર્શન કરવું પડશે.
