મનીષ સિસોદિયા જેલમાંથી આવ્યા બહાર, ઉમટી કાર્યકરોની ભીડ

નવી દિલ્હી,9 ઓગસ્ટ: આમ આદમી પાર્ટીના નેતા અને દિલ્હીના પૂર્વ નાયબ મુખ્યમંત્રી મનીષ સિસોદિયા સુપ્રીમ કોર્ટમાંથી જામીન મળ્યા બાદ હવે જેલની બહાર છે. સિસોદિયા શુક્રવારે મોડી સાંજે દિલ્હીની તિહાર જેલમાંથી બહાર આવ્યા હતા જ્યાં આમ આદમી પાર્ટીના કાર્યકરોએ તેમનું ભવ્ય સ્વાગત કર્યું હતું. આજે સવારે સુપ્રીમ કોર્ટે મનીષ સિસોદિયાને જામીન આપી દીધા હતા અને કાયદાકીય પ્રક્રિયા પૂરી થયા બાદ હવે તેઓ જેલમાંથી બહાર આવ્યા છે. આ પહેલા દિલ્હીની રાઉઝ એવન્યુ કોર્ટે મનીષ સિસોદિયાનો રિલીઝ ઓર્ડર જારી કર્યો હતો અને રિલિઝ ઓર્ડર તિહાર જેલમાં પહોંચતાની સાથે જ તેમને છોડી દેવામાં આવ્યા હતા.

મુક્તિ બાદ સીએમ કેજરીવાલના નિવાસસ્થાને જશે

તિહાર જેલમાંથી છૂટ્યા બાદ મનીષ સિસોદિયા હવે સીધા દિલ્હીના મુખ્યમંત્રી અરવિંદ કેજરીવાલના ઘરે જશે. માનવામાં આવે છે કે આ પછી સિસોદિયા તેમના નિવાસસ્થાને જશે. અરવિંદ કેજરીવાલ પણ દારૂ કૌભાંડ કેસમાં તિહાર જેલમાં બંધ છે. તિહારમાં 17 મહિના ગાળ્યા બાદ મુક્ત થયેલા મનીષ સિસોદિયાએ પણ જેલની બહાર આમ આદમી પાર્ટીના કાર્યકરોને સંબોધિત કર્યા હતા. સિસોદિયાએ આ અવસરે કહ્યું કે આઝાદ મનીષ સિસોદિયાની આપ સૌને શુભેચ્છા, તમે બધાએ 17 મહિના સુધી સહન કર્યું. તેમણે કહ્યું કે દેશનું બંધારણ વિપક્ષી નેતાઓની સુરક્ષા કરશે. AAP કાર્યકર્તાઓને સંબોધતા સિસોદિયાએ કહ્યું કે તમારો પ્રેમ અને ભગવાનના આશીર્વાદ મારી તાકાત છે.

સુપ્રીમ કોર્ટે આમ કહીને જામીન આપ્યા હતા

સુપ્રીમ કોર્ટે શુક્રવારે AAP નેતા મનીષ સિસોદિયાને દિલ્હીની આબકારી નીતિમાં કથિત કૌભાંડ સાથે સંબંધિત ભ્રષ્ટાચાર અને મની લોન્ડરિંગના કેસમાં જામીન આપ્યા હતા અને કહ્યું હતું કે તેઓ 17 મહિનાથી કસ્ટડીમાં છે. અદાલતે ગૌણ અદાલતોની ટીકા કરતાં કહ્યું હતું કે કેસની સુનાવણી શરૂ થયા વિના તેમને લાંબા સમય સુધી જેલમાં રાખીને તેમને ઝડપી સુનાવણીના અધિકારથી વંચિત રાખવામાં આવ્યા છે. જસ્ટિસ બી. આર. ગવઈ અને જસ્ટિસ કે. વી.વિશ્વનાથનની બેન્ચે પોતાના નિર્ણયમાં કહ્યું કે હવે સમય આવી ગયો છે કે નીચલી અદાલતો અને હાઈકોર્ટે એ સિદ્ધાંતને સ્વીકારવો જોઈએ કે ‘જામીન એ નિયમ છે અને જેલ અપવાદ છે.’ બેન્ચે કહ્યું કે સિસોદિયાના સમાજમાં ઊંડા મૂળ છે અને તેમના દેશ છોડવાની કોઈ શક્યતા નથી.

દારૂ કૌભાંડનો આરોપ

મનીષ સિસોદિયા દિલ્હીમાં દારૂની નીતિ સાથે જોડાયેલા કથિત કૌભાંડમાં આરોપી છે. સિસોદિયાની 26 ફેબ્રુઆરી 2023ના રોજ ધરપકડ કરવામાં આવી હતી. ત્યારથી તેઓ જેલમાં છે. તેઓ 530 દિવસ પછી જેલમાંથી બહાર આવ્યા છે. જોકે, જામીન દરમિયાન તેમણે ઘણી શરતોનું પાલન કરવું પડશે. સુપ્રીમ કોર્ટે તેમને શરતી જામીન આપ્યા છે. જેથી તેઓ વિદેશ ભાગી ન જાય અને તથ્યો સાથે છેડછાડ ન કરી શકે, જેથી ઈડી કે સીબીઆઈની તપાસને અસર ન થાય. બંને એજન્સીઓ તેની સામે તપાસ કરી રહી છે.