નીરજ ચોપરાની જેમ આ ખેલાડી પણ ભારત માટે જેવલિનમાં જીતી શકે છે મેડલ, જાણો કોણ છે

• પેરિસ ઓલિમ્પિકમાં મેન્સ જેવલિન થ્રો ઇવેન્ટ આજે યોજાશે 

પેરિસ, 6 ઓગસ્ટ: પેરિસ ઓલિમ્પિકમાં મેન્સ જેવલિન થ્રો ઇવેન્ટમાં ભારતના સ્ટાર જેવલિન થ્રોઅર નીરજ ચોપરા આજે મંગળવારે પોતાના અભિયાનની શરૂઆત કરશે. જેવલિન થ્રો ઇવેન્ટમાં નીરજ ચોપરા ઉપરાંત વધુ એક એથ્લેટ ભારત માટે ભાગ લઈ રહ્યો છે. આ ખેલાડી પણ મેન્સ જેવલિન થ્રોમાં ભારત માટે મેડલ જીતી શકે છે. જેનું નામ છે કિશોર જેના. જે ગ્રુપ Aમાંથી રમત રમશે.

આ દરમિયાન આખો દેશ નીરજ ચોપરા પાસેથી ગોલ્ડ મેડલની આશા રાખી રહ્યો છે. તેમણે છેલ્લી વખત ટોક્યો ઓલિમ્પિકમાં પણ ગોલ્ડ મેડલ જીત્યો હતો. નીરજ ચોપરા આ વખતે પોતાનું આ ટાઈટલ જીતવા જશે. તેમની પાસે ભારત માટે બે વ્યક્તિગત ગોલ્ડ મેડલ જીતવાની તક છે. આવું કરનાર તે ભારતનો પ્રથમ ખેલાડી બનશે. આવી સ્થિતિમાં, દરેકની નજર તેમના પર ટકેલી છે.

નીરજ ચોપરાની જેમ આ ખેલાડી પાસેથી પણ આશા

જ્યારે પણ મેન્સ જેવલિન થ્રોની વાત કરવામાં આવે છે તો ભારતના ગોલ્ડન બોય નીરજ ચોપડાનું નામ ચોક્કસપણે બહાર આવે છે, પરંતુ આ વખતે ઓલિમ્પિકમાં એક અન્ય એથ્લેટ છે જે મેન્સ જેવલિન થ્રોમાં મેડલનો દાવેદાર છે. આ એથ્લેટ બીજું કોઈ નહીં પણ કિશોર જેના છે. આ વખતે પણ કિશોર જેના પાસેથી ઘણી અપેક્ષાઓ છે. કિશોર જેનાએ આ વર્ષની એશિયન ગેમ્સ 2023માં શાનદાર પ્રદર્શન કર્યું હતું. જ્યાં તેમણે 87.54 મીટર જેવલિન થ્રો કરીને ભારત માટે સિલ્વર મેડલ જીત્યો હતો. એશિયન ગેમ્સ 2022માં નીરજ ચોપરાએ ગોલ્ડ મેડલ જીત્યો હતો.

મેન્સ જેવલિન થ્રો ઇવેન્ટ સંબંધિત માહિતી

પેરિસ ઓલિમ્પિક 2024 માટે પુરૂષોની જેવલિન થ્રો ક્વોલિફાયર સ્ટેડ ડી ફ્રાન્સ ખાતે આજે 6 ઓગસ્ટ મંગળવારના રોજ યોજાનાર છે. મેન્સ જેવલિન થ્રો ક્વોલિફાયર ગ્રુપ A 1:50 PM IST અને ગ્રુપ B 3:20 PM IST પર શરૂ થશે. ગ્રુપ Aમાં કિશોર જેના છે, જ્યારે નીરજ ચોપરા ગ્રુપ બીમાં છે. મેન્સ જેવલિન થ્રો ક્વોલિફાયરનું ભારતમાં સ્પોર્ટ્સ 18 નેટવર્ક ટીવી ચેનલ પર જીવંત પ્રસારણ કરવામાં આવશે. મેન્સ જેવલિન થ્રો ક્વોલિફાયર Jio સિનેમા એપ અને વેબસાઇટ પર મફતમાં લાઇવ સ્ટ્રીમ કરવામાં આવશે.

મેન્સ જેવલિન થ્રો ક્વોલિફાયર માટેનું ગ્રુપ

ગ્રુપ A: જુલિયસ યેગો (કેન્યા), ઓલિવર હેલેન્ડર (ફિનલેન્ડ), લીએન્ડ્રો રામોસ (પોર્ટુગલ), કેશોર્ન વોલકોટ (ટ્રિનિદાદ અને ટોબેગો), કિશોર જેના (ભારત), તુરા’તેરાઈ તુપૈયા (ફ્રાન્સ), જુલિયન વેબર (જર્મની), રોડરિક ગેન્કી ડીન (જાપાન), એલેક્ઝાન્ડ્રુ મિહિતા નોવાક (રોમાનિયા), ડેવિડ વેગનર (પોલેન્ડ), ટોની કેરાનેન (ફિનલેન્ડ), ઇહાબ અબ્દેલરહેમાન (ઇજિપ્ત), કર્ટિસ થોમ્પસન (યુએસએ), પેટ્રિક્સ ગેલ્મ્સ (લેટવિયા), પેડ્રો હેનરીક રોડ્રિગ્સ (બ્રાઝિલ). , જેકબ વડલેજચ (ચેચિયા)

ગ્રુપ B: નીરજ ચોપરા (ભારત), ગેટીસ કાઈક્સ (લેટવિયા), મેક્સ ડેહિંગ (જર્મની), કેમેરોન મેકએન્ટાયર (ઓસ્ટ્રેલિયા), અરશદ નદીમ (પાકિસ્તાન), માર્સીન ક્રુકોવસ્કી (પોલેન્ડ), લસ્સી એટેલેતાલો (ફિનલેન્ડ), નામદી ચિનચેરમ (નાઈજીરીયા) , લુઇઝ મૌરિસિયો દા સિલ્વા (બ્રાઝિલ), મુસ્તફા મહમૂદ (ઇજિપ્ત), આર્ટુર ફેલનર (યુક્રેન), ટિમોથી હર્મન (બેલ્જિયમ), એન્ડરસન પીટર્સ (ગ્રેનાડા), એન્ડ્રીયન માર્ડારે (મોલ્ડોવા), એડિસ માતુસેવિસિયસ (લિથુઆનિયા), સાયપ્રિયન મિરઝિગ્લોડ (પોલેન્ડ) ).

આ પણ જૂઓ: કુશ્તીના મેચમાં આગળ હોવા છતાં નિશા દહીયા હારી ગઈ, જાણો કેમ ?