ઓલિમ્પિક : ભાડે પિસ્તોલ લઇ નેશનલ ટુર્નામેન્ટ રમી, ક્રિકેટની પણ લીધી ટ્રેનિંગ, 2024માં ભારતને પહેલો મેડલ અપાવનાર મનુ ભાકરની જુઓ કહાની

• લાઇસન્સ મેળવવા માટે તેમને દરરોજ 45 કિલોમીટર દૂર ઝજ્જર જવું પડતું
• એક સમયે અધિકારીઓએ તેમની વાત સાંભળી ન હતી

પેરિસ, 28 જુલાઈ : મનુ ભાકર આજે શૂટિંગની દુનિયામાં એક મોટું નામ બનીને ઉભરી છે. ભારતની મનુ ભાકરે પેરિસ ઓલિમ્પિકમાં બ્રોન્ઝ મેડલ જીતીને ઈતિહાસ રચ્યો છે. તેણે 10 મીટર એર પિસ્તોલ મહિલા સિંગલ્સમાં બ્રોન્ઝ મેડલ જીત્યો હતો. આ સાથે મનુ ભાકર શૂટિંગમાં મેડલ જીતનારી દેશની પ્રથમ મહિલા બની ગઈ છે.

આ પણ વાંચો : Olympic Breaking: ભારતે પહેલો ચંદ્રક જીતી લીધો, શૂટિંગમાં મનુ ભાકરને કાંસ્ય

ભાડાની પિસ્તોલ સાથે નેશનલ ટુર્નામેન્ટ રમી

એક ઇન્ટરવ્યૂમાં મનુ ભાકરે તેમના સંઘર્ષના સમયગાળા વિશે વાત કરી. મનુ ભાકરે જણાવ્યું કે તેણે પોતાની પ્રથમ રાષ્ટ્રીય ટૂર્નામેન્ટ ભાડાની પિસ્તોલથી રમી હતી. મનુએ કહ્યું, “શરૂઆતમાં જ્યારે મારી પાસે મારી પોતાની પિસ્તોલ ન હતી, ત્યારે મેં વિનીત સરની પિસ્તોલ ભાડે લીધી હતી. મને એ પણ ખબર ન હતી કે ટ્રિગર કેટલું નીચે હોવું જોઈએ. પકડ બનાવવામાં પણ ઘણી મુશ્કેલી પડી રહી હતી.” પરંતુ આટલી બધી મુશ્કેલીઓ છતાં મનુએ હાર ન માની. તેણે કહ્યું, “મને ખબર હતી કે મારે શૂટિંગ કરવું છે. મેં વિચાર્યું કે કોઈક રીતે હું મેનેજ કરીશ. “જો તમારામાં જુસ્સો હોય, તો તમે કોઈપણ મુશ્કેલીને પાર કરી શકો છો.”

પિસ્તોલના લાયસન્સ માટે સંઘર્ષ કરવો પડ્યો

એક સમયે મનુ ભાકરને પિસ્તોલના લાયસન્સ માટે સંઘર્ષ કરવો પડ્યો હતો. મનુના પિતા રામકિશન ભાકરે એકવાર કહ્યું હતું કે લાઇસન્સ મેળવવા માટે તેમને દરરોજ 45 કિલોમીટર દૂર ઝજ્જર જવું પડતું હતું. અધિકારીઓએ તેમની વાત સાંભળી નહીં. એશિયન યુથ ગેમ્સ નજીક આવી રહી હતી અને મનુને પ્રેક્ટિસ માટે પિસ્તોલની જરૂર હતી. પોલીસ અને મેજિસ્ટ્રેટે સહકાર આપ્યો પરંતુ તત્કાલીન એડીસીએ તેમની વાત સાંભળી નહીં. લાચારી અનુભવતા મનુના પિતાએ હરિયાણાના શિક્ષણ મંત્રીને અપીલ કરી અને સીએમઓ અને રમતગમત મંત્રીને પણ ટ્વીટ કર્યું. બે મહિના પછી આખરે તેની મહેનત રંગ લાવી અને મનુને લાઇસન્સ મળી ગયું.

મનુ ભાકરે શૂટિંગ સિવાય અન્ય રમતમાં પણ હાથ અજમાવ્યો

આ પહેલા પણ મનુ ભાકરે અનેક ઈન્ટરવ્યુમાં સ્પોર્ટ્સ પ્રત્યેના તેના પ્રેમનો ઉલ્લેખ કર્યો છે. તે બોક્સિંગ અને કિક બોક્સિંગ પણ રમતી હતી. શૂટિંગ પહેલા મનુ ભાકરે ક્રિકેટની ટ્રેનિંગ પણ લીધી હતી. તેણે વીરેન્દ્ર સેહવાગની ઝજ્જર ક્રિકેટ એકેડમીમાં ક્રિકેટની ટ્રિક્સ શીખી હતી. પરંતુ જ્યારે સ્કૂલમાં શૂટિંગ રેન્જ બની તો તેણે શૂટિંગ કરવાનું પસંદ કર્યું.

આ પણ વાંચો : ઓલિમ્પિક : પીવી સિંધુએ એકતરફી જીત સાથે કરી શરૂઆત, રમિતા જિંદાલે પણ રચ્યો ઈતિહાસ