NEET UGનું પરિણામ બદલાયું, હવે 4 મહિલા સહિત માત્ર 17 ટૉપર
નવી દિલ્હી, 27 જુલાઈ: નેશનલ ટેસ્ટિંગ એજન્સી (NTA) એ તાજેતરમાં વિવાદાસ્પદ નેશનલ એલિજિબિલિટી કમ એન્ટ્રન્સ ટેસ્ટ-ગ્રેજ્યુએટ (NEET-UG) ના અંતિમ પરિણામો જાહેર કર્યા છે. સુધારેલા પરિણામોમાં 17 ઉમેદવારોએ ટોચનું સ્થાન મેળવ્યું છે. જ્યારે અગાઉ જાહેર થયેલા પરિણામોમાં આ સંખ્યા 61 હતી. સુધારેલા પરિણામોમાં ટોપ 17માં ચાર મહિલા ઉમેદવારોનો પણ સમાવેશ કરવામાં આવ્યો છે. જેના કારણે મહિલા ટોપર્સની ટકાવારી 16 ટકાથી વધીને 23 ટકા થઈ ગઈ છે. જ્યારે ટોપ 100માં મહિલાઓની ટકાવારી 22 ટકા છે.
ટોપર્સમાં રાજસ્થાનના ચાર, મહારાષ્ટ્રના ત્રણ, દિલ્હી અને ઉત્તર પ્રદેશના બે-બે ઉમેદવારો છે. જ્યારે અન્ય છ કેરળ, ચંદીગઢ, તમિલનાડુ, પંજાબ, બિહાર અને પશ્ચિમ બંગાળના છે. સુધારેલા પરિણામ મુજબ, 6 ઉમેદવારો છે જેમણે 716 માર્ક્સ મેળવ્યા છે, અને 77 ઉમેદવારે 715 માર્ક્સ મેળવ્યા છે. સંશોધિત પરિણામોમાં અન્ય હજારો ઉમેદવારોના ગુણ અને ક્રમમાં ફેરફાર થયો છે. સુપ્રીમ કોર્ટના નિર્દેશ બાદ ફિઝિક્સના એક પ્રશ્નના માર્કસને ધ્યાનમાં રાખીને પરિણામ જાહેર કરવામાં આવ્યું હતું. NTAએ કહ્યું હતું કે આ પ્રશ્નના બે સાચા જવાબ છે.
પ્રથમ સ્થાન મેળવનાર 67 ઉમેદવારોમાંથી, 44 એ ચોક્કસ ભૌતિકશાસ્ત્રના પ્રશ્ન માટે આપવામાં આવેલા ગુણને કારણે સંપૂર્ણ ગુણ મેળવ્યા હતા. પાછળથી, ટોચના રેન્કર્સની સંખ્યા ઘટાડીને 61 કરવામાં આવી હતી કારણ કે એજન્સીએ કેટલાક પરીક્ષા કેન્દ્રો પર સમયની ખોટની ભરપાઈ કરવા માટે છ ઉમેદવારોને આપવામાં આવેલા ગુણ પાછા ખેંચી લીધા હતા.
નેશનલ એલિજિબિલિટી કમ એન્ટ્રન્સ ટેસ્ટ-ગ્રેજ્યુએટ (NEET-UG) 2024 ના અસફળ ઉમેદવારોને મોટો ફટકો આપતા, સુપ્રીમ કોર્ટે મંગળવારે આ પરીક્ષા રદ કરવા અને ફરીથી યોજવાની વિનંતી કરતી અરજીઓને ફગાવી દીધી હતી. કોર્ટે કહ્યું હતું કે રેકોર્ડ પર એવી કોઈ સામગ્રી નથી કે જે દર્શાવે છે કે પરીક્ષાની વિશ્વસનીયતા વ્યવસ્થિત રીતે પ્રભાવિત થઈ હતી અને અન્ય ગેરરીતિઓ આચરવામાં આવી હતી.
સેન્ટ્રલ બ્યુરો ઑફ ઇન્વેસ્ટિગેશન (CBI) NEET-UG 2024 માં કથિત અનિયમિતતાઓની તપાસ કરી રહી છે અને તેણે છ FIR નોંધી છે. NEET-UG સરકારી અને ખાનગી સંસ્થાઓમાં MBBS, BDS, આયુષ અને અન્ય સંબંધિત અભ્યાસક્રમોમાં પ્રવેશ માટે NTA દ્વારા હાથ ધરવામાં આવે છે.
આ પણ વાંચોઃ થોડી વાર ચાલવામાં જ શરીર થાકી જાય છે? હોઈ શકે વિટામિન B12ની કમી, પીવો આ જ્યૂસ
