રશિયા બાદ હવે PM મોદી યુક્રેન જશે, શું ભારત યુદ્ધ ખતમ કરવા માટે મધ્યસ્થી બનશે?
- થોડા દિવસ પહેલા જ પીએમ મોદીએ રશિયાની લીધી હતી મુલાકાત
- પુતિન દ્વારા રશિયાના સર્વોચ્ચ નાગરિક સન્માનથી પીએમ મોદીને કરાયા હતા સન્માનિત
નવી દિલ્હી, 27 જુલાઈ : વડાપ્રધાન નરેન્દ્ર મોદી સંભવતઃ આગામી મહિને 23 ઓગસ્ટના રોજ યુક્રેનની મુલાકાત લેશે, જ્યાં તેઓ યુક્રેનિયન પ્રમુખ વાલોદિમિર ઝેલેન્સકીને મળશે. રશિયા સાથેના યુદ્ધ બાદ વડાપ્રધાન નરેન્દ્ર મોદીની યુક્રેનની આ પ્રથમ મુલાકાત છે. પીએમ મોદી એવા સમયે યુક્રેન જઈ રહ્યા છે જ્યારે તેઓ થોડા દિવસ પહેલા જ રશિયાના પ્રમુખ વ્લાદિમીર પુતિન સાથે મુલાકાત કરીને મોસ્કોથી પરત ફર્યા છે.
પીએમ મોદીએ રશિયાની મુલાકાત લીધી હતી
લગભગ એક મહિના પહેલા પીએમ મોદીએ ઈટાલીમાં આયોજિત G7 સમિટમાં ઝેલેન્સકી સાથે મુલાકાત કરી હતી. આ મહિનાની શરૂઆતમાં, જ્યારે પીએમ મોદી રશિયાની મુલાકાતે હતા, ત્યારે બંને દેશો પરમાણુ ઊર્જા અને જહાજ નિર્માણ સહિત વિવિધ ક્ષેત્રોમાં સહયોગ વધારવા માટે સંમત થયા હતા. રશિયામાં, પીએમ મોદીને બંને દેશો વચ્ચેના દ્વિપક્ષીય સંબંધોને પ્રોત્સાહન આપવામાં તેમના ‘અસાધારણ યોગદાન’ માટે પુતિન દ્વારા રશિયાના સર્વોચ્ચ નાગરિક સન્માન, ‘ઓર્ડર ઓફ સેન્ટ એન્ડ્ર્યુ ધ એપોસ્ટલ’ એવોર્ડથી પણ નવાજવામાં આવ્યા હતા. વડાપ્રધાન મોદીએ 22મી ભારત-રશિયા વાર્ષિક સમિટ માટે પુતિનના આમંત્રણ પર 8 જુલાઈ, 2024ના રોજ રશિયાની બે દિવસીય મુલાકાત લીધી હતી.
આ પણ વાંચો : યુરોપ-મધ્ય એશિયામાં નવ કરોડ બાળકો ગરમીની ઝપેટમાં..! જુઓ વધતા તાપમાનથી દર વર્ષે કેટલા બાળકો ગુમાવી રહ્યા છે જીવ
યુક્રેને રશિયા પર ગંભીર આરોપ લગાવ્યા હતા
રશિયા અને યુક્રેન વચ્ચે લાંબા સમયથી યુદ્ધ ચાલી રહ્યું છે. સ્થિતિ એવી છે કે ન તો રશિયા પીછેહઠ કરવા તૈયાર છે કે ન તો યુક્રેન ઘૂંટણિયે પડવા તૈયાર છે. હાલમાં જ યુક્રેનના એક યુદ્ધ કેદીની પત્નીએ પુતિનની સેના પર ગંભીર આરોપ લગાવ્યા હતા. લારિસા સલીવા નામના યુક્રેનિયન યુદ્ધ કેદીની પત્નીએ રશિયા પર મૃત સૈનિકોના અંગો ચોરીને વેચવાનો આરોપ લગાવ્યો છે. લારિસા, ફ્રીડમ ટુ ડિફેન્ડર્સ ઓફ મેરીયુપોલ જૂથના વડા, દાવો કરે છે કે યુક્રેનિયન સૈનિકના ઘણા અંગો ગુમ છે જેમનો મૃતદેહ રશિયન પ્રમુખ વ્લાદિમીર પુતિનની સેના દ્વારા પરત કરવામાં આવ્યો હતો. જો કે સૂત્રોના જણાવ્યા અનુસાર રશિયાએ આ આરોપોને નકારી કાઢ્યા છે અને તેને કાવતરું ગણાવ્યું છે.
આ પણ વાંચો : સુદર્શનનું સફળ પરીક્ષણ : S-400 એર ડિફેન્સ સિસ્ટમે દુશ્મનના 80% વિમાનો તોડી પાડ્યા
