વડોદરામાં વિશ્વામિત્રી નદીએ ભયજનક સપાટી વટાવી, પુરના પાણી શહેરમાં ઘૂસ્યા

વડોદરા, 25 જુલાઈ 2024, ગુજરાતમાં સોરાષ્ટ્ર અને દક્ષિણ ગુજરાતમાં મેઘરાજાએ માઝા મુકી છે. ત્યારે હવે મધ્ય ગુજરાતનો વારો આવ્યો છે. સંસ્કારી નગરી કહેવાતા વડોદરામાં ગઈકાલે ધોધમાર વરસાદ વરસતા ચારેકોર પાણી જ પાણી ભરાઈ ગયા હતાં. અનરાધાર વરસાદથી શહેર આખુ પાણી પાણી થઈ ગયું છે. સાડા તેર ઈંચ વરસાદ ખાબકી જતા વિશ્વામિત્રી નદીએ ભયજનક સપાટી વટાવી દીધી છે. આથી નદીમાં રહેલા મગરોનો ડર પણ હવે લોકોને સતાવી રહ્યો છે. પૂરના પાણી શહેરમાં ઘૂસવાનું શરૂ થઈ ગયું છે. હાલ વિશ્વામિત્રી નદીની સપાટી 27.85 ફૂટે પહોંચી છે. ભયજનક સપાટી 26 ફૂટ છે. ભારે વરસાદથી વડોદરામાં આજે શાળા-કોલેજો બંધ રાખવામાં આવી છે.

વિશ્વામિત્રી નદીની સપાટી વધતાં મગરો બહાર નિકળી રહ્યા છે
ઉપરવાસમાંથી છોડાયેલા પાણીને પગલે વિશ્વામિત્ર નદીમાં પાણી આવ્યું છે. અકોટા ગામ દેવનગર ઝુપડપટ્ટીની અંદરથી 20 લોકોનું રેસ્ક્યૂ કરવામાં આવ્યું છે. જીઆઇડીસી ફાયર સ્ટેશન ટીમ દ્વારા રેસ્ક્યૂ કરવામાં આવ્યું છે.આકોટા ગામની ઝુપડપટ્ટીના 50 મકાનોમાં પાણી ઘૂસી ગયા છે. જ્યારે નિઝામપુરા વિસ્તારમાં આવેલ પટેલ ફળિયું અને ગાંધી ચોકના કુલ 50 મકાનો પાણીમાં ડૂબ્યા છે. લોકો ખૂબ જ મુશ્કેલીમાં મુકાયા છે.વિશ્વામિત્રી નદીની સપાટી વધતાં મગરો બહાર નિકળી રહ્યા છે. ફતેગંજ નરહરિ હોસ્પિટલ બહાર મગર લટાર મારતો જોવા મળ્યો હતો. રાત્રે 2 વાગે રોડ પર મગર લટાર મારતો જોવા મળ્યો હતો. ​​​​​​​મગરને જોઈ લોકોમાં ભય ફેલાયો છે. મગરનું રેસ્ક્યૂ કરી ફરી નદીમાં છોડાયો હતો.

મીઠી ખાડીમાં આવેલા અનેક વિસ્તારોમાં ખાડી પૂર
બીજી તરફ સુરતના લિંબાયત મીઠી ખાડીમાં આવેલા અનેક વિસ્તારોમાં ખાડી પૂર આવ્યું છે. જેથી મીઠીખાડી સ્લમ વિસ્તાર, બેઠી કોલોની, પતરાની ચાલ, ઈન્દીરા આવાસ, ક્રાંતિ નગર, રાવ નગર, રતનજી નગર, કમરુ નગર, ગરીબ નવાઝ નગર, ઓમ નગરમાં પાણી ભરાયેલા છે.સુરત શહેર અને જિલ્લામાં પડેલા ભારે વરસાદના કારણે ખાડીપૂર આવી ગયું છે. ભેદવાડ ખાડી ગત રોજ બપોરે ઓવરફ્લો થઈ જતા ખાડીપૂરની સ્થિતિ સર્જાઈ હતી. રાજ્યમાં છેલ્લા ૨૪ કલાક દરમિયાન આણંદ જિલ્લાના બોરસદ તાલુકમાં સૌથી વધુ ૧૪ ઇંચ જેટલો વરસાદ વરસ્યો છે.

રાજ્યમાં મોસમનો કુલ સરેરાશ વરસાદ ૫૩ ટકાથી વધુ નોંધાયો
વડોદરા જિલ્લાના પાદરા અને વડોદરા તાલુકા ઉપરાંત નર્મદાના તિલકવાડા તાલુકામાં ૮ ઈંચથી વધુ, જ્યારે ભરૂચ તાલુકામાં ૭ ઈંચથી વધુ વરસાદ નોંધાયો છે. આ ઉપરાંત નવસારીના ખેરગામ તાલુકામાં અને છોટા ઉદેપુરના નસવાડી તાલુકામાં ૬ ઈંચથી વધુ વારસદા વરસ્યો હોવાના અહેવાલ છે. રાજ્યમાં મોસમનો કુલ સરેરાશ વરસાદ ૫૩ ટકાથી વધુ નોંધાયો છે. જ્યારે, કચ્છ ઝોનમાં મોસમનો સૌથી વધુ ૭૫ ટકાથી વધુ અને ત્યારબાદ સૌરાષ્ટ્ર ઝોનમાં ૭૩ ટકાથી વધુ વરસાદ નોંધાયો છે. આ ઉપરાંત દક્ષિણ ગુજરાતમાં ૬૩ ટકાથી વધુ, પૂર્વ-મધ્ય ગુજરાતમાં ૩૨ ટકાથી વધુ તેમજ ઉત્તર ગુજરાતમાં સૌથી ઓછો ૨૯ ટકા જેટલો મોસમનો કુલ સરેરાશ વરસાદ નોંધાયો છે.

આ પણ વાંચોઃગુજરાતના હવામાન વિભાગે વેધર બુલેટિન જાહેર કર્યું, જાણો ક્યા છે વરસાદની આગાહી