આતંકીઓ ઉઠાવી શકે છે ફાયદો: મમતા બેનરજીના શરણાર્થીઓને શરણના નિવેદન પર બાંગ્લાદેશ

• શરણાર્થીઓને શરણ આપવાની ખાતરીની જાહેરાતનો લાભ લેવા માટે ઘણા લોકોને ઉશ્કેરાશે: બાંગ્લાદેશ 

નવી દિલ્હી, 25 જુલાઇ: બાંગ્લાદેશે દેશના શરણાર્થીઓને શરણ આપવાની પશ્ચિમ બંગાળના મુખ્યમંત્રી મમતા બેનરજીની ઓફર સામે વાંધો ઉઠાવ્યો છે. મળતી માહિતી મુજબ, પાડોશી દેશ તરફથી કહેવામાં આવ્યું છે કે “આવી જાહેરાતનો ફાયદો આતંકવાદીઓ ઉઠાવી શકે છે.” 21 જુલાઈના રોજ તૃણમૂલ કોંગ્રેસની વિશાળ ‘શહીદ દિવસ’ રેલીમાં બોલતા, મમતા બેનરજીએ કહ્યું હતું કે, જો હિંસાગ્રસ્ત બાંગ્લાદેશના લોકો અમારા દરવાજા ખટખટાવશે, તો તેમની સરકાર તેમને આશ્રય આપશે.

મમતા બેનરજીએ શું કહ્યું હતું?

મમતા બેનરજીએ કહ્યું હતું કે, “હું બાંગ્લાદેશ વિશે કંઈ કહી શકતી નથી કારણ કે તે અન્ય દેશ છે અને કેન્દ્ર સરકાર આ વિષય પર બોલશે, પરંતુ જો લાચાર લોકો (બાંગ્લાદેશના) બંગાળનો દરવાજો ખખડાવશે તો અમે તેમને આશ્રય આપીશું. UNનો ઠરાવ પણ છે કે પાડોશીઓ શરણાર્થીઓનું સન્માન કરશે.

સોશ્યિલ મીડિયા પર પણ વારંવાર વાયદો કર્યો

તૃણમૂલ કોંગ્રેસના સુપ્રિમોએ બાદમાં દિવસે X પરની પોસ્ટમાં આ વચનનું પુનરાવર્તન કર્યું. તેમણે લખ્યું કે,”સેંકડો વિદ્યાર્થીઓ અને અન્ય લોકો ઇમરજન્સીગ્રસ્ત બાંગ્લાદેશમાંથી પશ્ચિમ બંગાળ/ભારત પરત ફરી રહ્યા છે. મેં અમારા રાજ્ય પ્રશાસનને પાછા ફરનારાઓને તમામ સહાય અને સમર્થન આપવા કહ્યું છે. ઉદાહરણ તરીકે, લગભગ 300 વિદ્યાર્થીઓ પર્વતીય સરહદે પહોંચ્યા અને મોટાભાગના સુરક્ષિત છે. તેઓ પોતપોતાના ગંતવ્ય માટે રવાના થયા હતા, જો કે, તેમાંથી 35ને મદદની જરૂર હતી અને અમે તેમને મૂળભૂત સુવિધાઓ અને સહાય પૂરી પાડી હતી.”

બાંગ્લાદેશે સખત વાંધો વ્યક્ત કર્યો હતો

અહેવાલોમાં સૂત્રોને ટાંકીને જણાવ્યા અનુસાર, બાંગ્લાદેશ સરકારે ભારતીય હાઈ કમિશન સમક્ષ મમતા બેનરજીની આ ટિપ્પણી સામે સખત વાંધો વ્યક્ત કર્યો છે. બાંગ્લાદેશે કહ્યું કે, આવી ટિપ્પણી, ખાસ કરીને શરણાર્થીઓને આશ્રય આપવાની ખાતરી, આવી જાહેરાતનો લાભ લેવા માટે ઘણા લોકોને, ખાસ કરીને આતંકવાદીઓ અને બદમાશોને ઉશ્કેરી શકે છે.

તદુપરાંત, બાંગ્લાદેશે હાઈ કમિશનને જાણ કરી હતી કે, તેઓ પરિસ્થિતિને સામાન્ય બનાવવાનો પ્રયાસ કરી રહ્યા છે, અને પશ્ચિમ બંગાળના મુખ્યમંત્રી દ્વારા આવી ટિપ્પણીઓ “ભ્રામક” છે. બાંગ્લાદેશ સરકારે વધુમાં કહ્યું કે, મમતા બેનરજીએ UNના ઠરાવનો જે સંદર્ભ આપ્યો છે તે દેશમાં માન્ય નથી. મંગળવારે બાંગ્લાદેશના વિદેશ મંત્રી હસન મહમૂદે પણ મમતા બેનરજીની ટિપ્પણી સામે વાંધો ઉઠાવ્યો હતો.

આ પણ જૂઓ: ઉમિયા ઓવરસિઝના માલિકોએ કેનેડાના વિઝા આપવાનું કહી 5 લાખની ઠગાઈ આચરી