જળવાયુ પરિવર્તનનું પરિણામ, જુલાઈનો આ દિવસ 84 વર્ષમાં સૌથી ગરમ રહ્યો

પેરિસ, 24 જુલાઈ : જળવાયુ પરિવર્તનના ભયંકર પરિણામો દેખાવા લાગ્યા છે. ભારે ગરમી, પૂર, કમોસમી વરસાદ જેવી ઘટનાઓ સમગ્ર વિશ્વમાં સામાન્ય બની ગઈ છે. દરમિયાન, વૈશ્વિક સ્તરે તાપમાનના ફેરફારો પર નજર રાખનારી એજન્સીએ આકરી ગરમીના સંદર્ભમાં ડેટા જાહેર કર્યો હતો. ગત સપ્તાહે અમેરિકા સહિત યુરોપિયન દેશોમાં ગરમીએ લોકોને ભારે પરેશાન કર્યા હતા. તાજેતરની માહિતી અનુસાર, 21 જુલાઈએ તમામ રેકોર્ડ તોડીને વિશ્વના ઈતિહાસનો સૌથી ગરમ દિવસ બની ગયો છે. આ દિવસે સરેરાશ તાપમાન છેલ્લા 84 વર્ષની સરખામણીએ સૌથી વધુ નોંધાયું હતું.

ગયા વર્ષે જુલાઈનો તાપમાનનો રેકોર્ડ તોડ્યો

લંડન સ્થિત યુરોપિયન યુનિયનની કોપરનિકસ ક્લાઈમેટ ચેન્જ સર્વિસ (C3S) અનુસાર, વૈશ્વિક સરેરાશ સપાટીનું હવાનું તાપમાન પ્રથમ વખત 17.09 ડિગ્રી સેલ્સિયસ (62.76 ડિગ્રી ફેરનહીટ) નોંધાયું છે. જેણે ગયા વર્ષના જુલાઈના તાપમાનનો રેકોર્ડ તોડી નાખ્યો છે. ગયા વર્ષે 17.08 ડિગ્રી સેલ્સિયસ (62.74 ફેરનહીટ) તાપમાન નોંધાયું હતું. રિપોર્ટમાં કહેવામાં આવ્યું છે કે ગયા અઠવાડિયે અમેરિકા, યુરોપ અને રશિયાના મોટા ભાગોમાં તીવ્ર ગરમીની લહેર જોવા મળી હતી. કોપરનિકસ કહે છે કે આ વખતે 21 જુલાઈએ દૈનિક સરેરાશ તાપમાનનો જૂનો રેકોર્ડ તૂટી ગયો હતો.

આ પણ વાંચો : 2023માં દર મિનિટે એક એઇડ્સના દર્દીએ ગુમાવ્યો જીવ, જુઓ સંયુક્ત રાષ્ટ્રનો અહેવાલ

અશ્મિભૂત ઇંધણને કારણે વાતાવરણમાં આવી રહ્યું છે પરિવર્તન

રશિયાના એવા વિસ્તારોમાં પણ લોકો પરસેવો પાડી રહ્યા હતા જ્યાં ઠંડી છે. કોપરનિકસ ક્લાઈમેટ ચેન્જ સર્વિસ અનુસાર, રવિવારે ગરમીએ અત્યાર સુધીના તમામ રેકોર્ડ તોડી નાખ્યા હતા. 1940 પછીનો સૌથી ગરમ દિવસ 21 જુલાઈ હતો, જે ગયા વર્ષના 6 જુલાઈના 17.08 ડિગ્રી સેલ્સિયસના રેકોર્ડને વટાવી ગયો હતો. ગયા વર્ષની વાત કરીએ તો 3 જુલાઈથી 6 જુલાઈ સુધી દરરોજ ગરમીના રેકોર્ડ તોડવામાં આવ્યા હતા. વૈજ્ઞાનિકોએ કહ્યું હતું કે અશ્મિભૂત ઇંધણના કારણે વાતાવરણમાં પરિવર્તન આવી રહ્યું છે.

ઉત્તરીય ગોળાર્ધમાં ગરમીનું મોજું વધુ તીવ્ર

વિશ્વ જળવાયુ પરિવર્તન સંકટને ટાળવા માટે નિષ્ણાતો દ્વારા નિર્ધારિત 1.5 ડિગ્રી સેલ્સિયસ મર્યાદાને ઓળંગવાની અણી પર છે. જુલાઈ આ મર્યાદા સુધી પહોંચવાનો સતત 13મો મહિનો છે. C3S વૈજ્ઞાનિકોના જણાવ્યા અનુસાર, ગયા વર્ષે જૂનથી દરેક મહિનો રેકોર્ડ પર સૌથી ગરમ મહિનો રહ્યો છે. કોપરનિકસના જણાવ્યા અનુસાર, જો આપણે જૂન 2023 થી સતત 13 મહિનાની વાત કરીએ તો, પર્યાવરણમાં ઝડપી ફેરફારો જોવા મળ્યા છે. ઉત્તર ગોળાર્ધમાં વધુ ગરમીના મોજા જોવા મળ્યા છે. 21 જુલાઈ એ પૃથ્વી પરનો સૌથી ગરમ દિવસ રહ્યો છે. વિજ્ઞાનીઓએ આશંકા વ્યક્ત કરી છે કે ગયા વર્ષ પછી તૂટેલો આ રેકોર્ડ છેલ્લો ન હોઈ શકે. જુલાઈમાં હજુ ઘણા દિવસો બાકી છે. આ રેકોર્ડ પણ તૂટી શકે છે.

આ પણ વાંચો : ગુજરાત: મોરબી ઝૂલતા પુલ દુર્ઘટના મુદ્દે હાઈકોર્ટની મદદ માટે ખાસ એડવોકેટની નિમણૂક