પેરિસ ઓલિમ્પિકમાં ભારતીય સુરક્ષા દળો સાથે જોડાયેલા 24 ખેલાડીઓ લેશે ભાગ, નીરજ જેવા દિગ્ગજો પણ સામેલ
- પેરિસ ઓલિમ્પિક 2024માં ભારતમાંથી કુલ 117 એથ્લેટ ભાગ લઈ રહ્યા છે. જેમાંથી કુલ 24 ખેલાડીઓ ભારતીય સશસ્ત્ર દળો સાથે જોડાયેલા છે
પેરિસ, 20 જુલાઈ: પેરિસ ઓલિમ્પિક 2024 માટે હવે માત્ર થોડા જ દિવસો બાકી છે અને તે 26મી જુલાઈથી શરૂ થઈ રહી છે. 11 ઓગસ્ટના રોજ સમાપન થશે. આ વખતે ઓલિમ્પિકમાં ભારતના મેડલની સંખ્યા ડબલ ડિજિટ સુધી પહોંચવાની આશા છે. ગત ઓલિમ્પિકમાં ભારતે પોતાનું સર્વશ્રેષ્ઠ પ્રદર્શન કર્યું હતું. ત્યારે ભારતે નીરજ ચોપરાના ગોલ્ડ મેડલ સહિત કુલ 7 મેડલ જીત્યા હતા. ઓલિમ્પિક 2024માં કુલ 117 ભારતીય એથ્લેટ ભાગ લઈ રહ્યા છે. તેમાંથી 24 સશસ્ત્ર દળના જવાનો છે, જેઓ સેના સાથે જોડાયેલા છે. આ 24 એથ્લેટ્સમાંથી 22 પુરૂષો છે, જેમાં સ્ટાર ભાલા ફેંકનાર સુબેદાર નીરજ ચોપરા અને બે મહિલા છે. પ્રથમ વખત ભારતીય સેનાની બે મહિલા ખેલાડીઓનો પણ ઓલિમ્પિક ટીમમાં સમાવેશ કરવામાં આવ્યો છે.
નીરજ ચોપરા પાસે મેડલની અપેક્ષા
ટોક્યો ઓલિમ્પિક 2020માં ગોલ્ડ મેડલ જીતનાર સ્ટાર ભાલા ફેંકનાર નીરજ ચોપરા ભારતીય સેનામાં સુબેદાર છે. બધાને તેની પાસેથી મેડલની આશા છે. તેમણે 2023 એશિયન ગેમ્સ, 2023 વર્લ્ડ એથ્લેટિક્સ ચેમ્પિયનશિપ, 2024 ડાયમંડ લીગ અને 2024 પાવો નુર્મી ગેમ્સમાં ગોલ્ડ મેડલ જીત્યા છે. તેની ગણતરી શ્રેષ્ઠ ખેલાડીઓમાં થાય છે.
પ્રથમ વખત ભાગ લેશે બે મહિલા ખેલાડીઓ
2022 કોમનવેલ્થ ગેમ્સની કાંસ્ય ચંદ્રક વિજેતા હવાલદાર જાસ્મીન લેમ્બોરિયા અને 2023 એશિયન કુસ્તી ચેમ્પિયનશિપની કાંસ્ય ચંદ્રક વિજેતા સીપીઓ રીતિકા હુડા એ આર્મીની બે મહિલા સેવા કર્મચારીઓ છે જેઓ પ્રથમ વખત ગેમ્સમાં ભાગ લઈ રહી છે. જો આ બંને મહિલા ખેલાડીઓ મેડલ જીતશે તો ઈતિહાસ ચોક્કસ રચાશે. જાસ્મીન લંબોરિયા બોક્સિંગમાં ભાગ લેશે અને રિતિકા હુડા કુસ્તીમાં ભાગ લેશે.
સેનાના અન્ય ખેલાડીઓમાં સુબેદાર અમિત પંખાલ (બોક્સિંગ), સીપીઓ તેજિન્દર પાલ સિંહ તૂર (શોટપુટ), સુબેદાર અવિનાશ સાબલે (3000 મીટર સ્ટીપલચેસ), સીપીઓ મુહમ્મદ અનસ યાહિયા, પીઓ મુહમ્મદ અજમલ, સુબેદાર સંતોષ કુમાર અને JWO મિઝો ચાકો કુરિયન (પુરુષોની 4x400m રિલે), JWO અબ્દુલ્લા અબુબકર (ટ્રિપલ જમ્પ), સુબેદાર તરુણદીપ રાય અને ધીરજ બોમ્માદેવરા (તીરંદાજી) અને નાયબ સુબેદાર સંદીપ સિંહ (શૂટિંગ) સમાવેશ થાય છે.
આ પણ વાંચો: પેરિસ ઓલિમ્પિક 2024 : ગોલ્ફમાં જોવા મળી શકે છે ભારતનો દબદબો, આ ખેલાડી પર રહેશે તમામની નજર
