ટીમ ઈન્ડિયાનો કોચિંગ સ્ટાફ નક્કી થઈ ગયો? આ દિગ્ગજો સાથે મળીને કરશે કામ
- ભારતીય ક્રિકેટ ટીમના નવા સપોર્ટિંગ સ્ટાફને લઈને એક મોટું અપડેટ આવ્યું છે. ટીમ ઈન્ડિયાના નવા હેડ કોચ ગૌતમ ગંભીર સાથે કામ કરી રહેલા સપોર્ટિંગ સ્ટાફના સભ્યો નક્કી કરી દીધા છે
મુંબઈ, 20 જુલાઈ: ભારતીય ક્રિકેટ ટીમને ગૌતમ ગંભીરના રૂપમાં નવો મુખ્ય કોચ મળ્યો છે, જે શ્રીલંકા શ્રેણીથી ટીમની કમાન સંભાળશે. ટીમ ઈન્ડિયાના મુખ્ય કોચ ગૌતમ ગંભીરના સપોર્ટિંગ સ્ટાફમાં કયા ચહેરાઓને સામેલ કરવામાં આવશે તે હજુ જાહેર કરવામાં આવ્યું નથી. પરંતુ તે દિગ્ગજ ખેલાડીઓનાં નામ નક્કી કરવામાં આવ્યા છે જેઓ ગંભીર સાથે કામ કરતા જોવા મળશે. રાહુલ દ્રવિડના સહાયક સ્ટાફનો એક સભ્ય પણ નવા સ્ટાફનો ભાગીદાર બનશે.
ભારતીય ટીમનો કોચિંગ સ્ટાફ જાહેર
ક્રિકબઝના અહેવાલ મુજબ ભારતના ભૂતપૂર્વ ઓલરાઉન્ડર અભિષેક નાયર અને નેધરલેન્ડના ભૂતપૂર્વ ક્રિકેટર રેયાન ટેન ડ્યુશ ભારતીય ટીમના કોચિંગ સ્ટાફનો ભાગ હશે. આ સિવાય મોર્ને મોર્કેલને પણ સપોર્ટિંગ સ્ટાફમાં સ્થાન મળ્યું છે. આ જ રીતે ટી. દિલીપ ટીમ સાથે રહેશે અને ફિલ્ડિંગ કોચની ભૂમિકા નિભાવશે. અગાઉ પણ ટી. દિલીપ રાહુલ દ્રવિડના સપોર્ટિંગ સ્ટાફનો એક ભાગ હતા. ટી. દિલીપના નેતૃત્વમાં ટીમ ઈન્ડિયાની ફિલ્ડિંગમાં ઘણો સુધારો થયો છે, તેથી BCCI તેને ટીમ સાથે જાળવી રાખશે.
ગંભીર સાથે કામ કરનારાઓને મળી તક
નાયર અને ટેન ડોશચેટ બંનેને સહાયક કોચ તરીકે નિયુક્ત કરવામાં આવ્યા છે. ઉપરાંત એવી સંભાવના છે કે દક્ષિણ આફ્રિકાના પૂર્વ ઝડપી બોલર મોર્ને મોર્કેલ ગંભીરની કોચિંગ ટીમમાં બોલિંગ કોચની ભૂમિકા ભજવે. આ ત્રણેય દિગ્ગજો ગૌતમ ગંભીર સાથે અગાઉ કામ કરી ચૂક્યા છે. ગૌતમ ગંભીરે IPL 2024માં કોલકાતા નાઈટ રાઈડર્સ માટે અભિષેક નાયર અને રેયાન ટેન ડોઈશ સાથે કામ કર્યું હતું. ટીમને ચેમ્પિયન બનાવવામાં અભિષેક નાયર અને રેયાન ટેન ડોઈશની પણ મહત્વની ભૂમિકા હતી. બીજી તરફ ગંભીર અને મોર્કેલ પણ આઈપીએલમાં લખનૌ સુપર જાયન્ટ્સ માટે કામ કરી ચૂક્યા છે.
આ દિગ્ગજો ટીમમાં ક્યારે જોડાશે?
અહેવાલ મુજબ ટી. દિલીપ અને અભિષેક નાયર ટીમ સાથે શ્રીલંકા પ્રવાસ પર જશે. પરંતુ ટેન ડોઇશ અને મોર્કેલ ક્યારે ટીમ સાથે જોડાશે તે હજુ સ્પષ્ટ નથી. ટેન ડ્યુશ હાલમાં મેજર લીગ ક્રિકેટ (MLC) માં LA નાઈટ રાઈડર્સના કોચિંગ સ્ટાફનો ભાગ છે અને તે યુએસમાં છે. આ સંજોગોમાં તે સીધો કોલંબોમાં ટીમ સાથે જોડાઈ શકે છે.
આ પણ વાંચો: વુમન્સ એશિયા કપમાં ભારતે પાકિસ્તાનને 7 વિકેટે હરાવ્યું
