હિમાચલ પ્રદેશની રાજધાની શિમલામાં એક મોટી દુર્ઘટના ઘટી છે. બસ ખીણમાં પડતાં એક મહિલાનું મોત થયું છે. જ્યારે 20થી વધુ મુસાફરો ઘાયલ થયા હતા. મળતી માહિતી મુજબ આ દુર્ઘટના હીરા નગર વિસ્તારમાં થઈ હતી. જ્યાં હિમાચલ રોડવેઝની બસ રોડથી લગભગ 100 ફૂટ નીચે ખીણમાં ખાબકી હતી. આ અકસ્માત બુધવારે બપોરે થયો હતો.
મુસાફરો ભરેલી બસ ખીણમાં ખાબકી
જણાવી દઈએ કે હિમાચલ રોડ ટ્રાન્સપોર્ટ કોર્પોરેશનની બસ નગરોટા (કાંગડા)થી શિમલા આવી રહી હતી. બસમાં 20થી 23 લોકો સવાર હોવાના અહેવાલ છે. તમામ ઘાયલોને શિમલાની આઈજીએમસી હોસ્પિટલમાં દાખલ કરવામાં આવ્યા છે જ્યાં તેમની સારવાર ચાલી રહી છે. રિપોર્ટ અનુસાર બસમાં 1 વ્યક્તિ ફસાયા હોવાની પણ માહિતી છે. અકસ્માતના સમાચાર મળતા જ પોલીસ અને પ્રશાસનની ટીમ ઘટનાસ્થળે પહોંચી ગઈ છે અને બચાવ કાર્ય હાથ ધરવામાં આવ્યું છે.
ગત રોજ પીકઅપ વાન ખીણમાં પડી હતી
તમને જણાવી દઈએ કે એક દિવસ પહેલા એટલે કે મંગળવારે પણ શિમલામાં એક પીકઅપ વાન ખાડીમાં પડી હતી જેમાં એક વ્યક્તિનું મોત થયું હતું. પીકઅપ વાન શિમલા મંડીમાં સફરજન ઉતારીને પરત ફરી રહી હતી. આ અકસ્માતમાં અન્ય બે યુવકો પણ ઘાયલ થયા છે. મૃતક યુવકનો મૃતદેહ વાહન નીચે દટાઈ ગયો હોવાથી ભારે મુશ્કેલીથી તેને બહાર કાઢવામાં આવ્યો હતો.
