હરારે, 6 જુલાઈ : ભારત અને ઝિમ્બાબ્વે વચ્ચે પાંચ મેચની T20 શ્રેણીની પ્રથમ મેચ 6 જુલાઈ (શનિવાર)ના રોજ હરારેમાં રમાઈ હતી. આ મેચમાં યજમાન ઝિમ્બાબ્વેનો 13 રને વિજય થયો હતો. આ મેચમાં ભારતીય ટીમને જીતવા માટે 116 રનનો ટાર્ગેટ હતો. પરંતુ તે આ નાના લક્ષ્યને પણ હાંસલ કરી શકી ન હતી. ભારતીય ટીમ 19.5 ઓવરમાં 102 રન પર જ સિમિત રહી હતી. ઝિમ્બાબ્વે સામે ટી20માં ભારતીય ટીમની આ માત્ર ત્રીજી હાર હતી.
આ પહેલા ટોસ હારીને પ્રથમ બેટિંગ કરતા ઝિમ્બાબ્વેએ નવ વિકેટે 115 રન બનાવ્યા હતા. ઝિમ્બાબ્વે માટે ક્લાઈવ મદંડેએ 29 રનની અણનમ ઈનિંગ રમી હતી. આ દરમિયાન તેણે 25 બોલનો સામનો કર્યો અને ચાર ચોગ્ગા ફટકાર્યા હતા. આ સિવાય ડીયોન માયર્સે 23 રન, બ્રાયન બેનેટે 22 અને વેસ્લી માધવેરે 21 રનનું યોગદાન આપ્યું હતું. આ ચાર સિવાય કોઈ બેટ્સમેન બે આંકડા સુધી પણ પહોંચી શક્યો નહોતો. ભારત તરફથી સ્પિનર રવિ બિશ્નોઈએ સૌથી વધુ ચાર વિકેટ લીધી હતી.
મેચની છેલ્લી ઓવરમાં ભારતને જીતવા માટે 16 રન બનાવવાના હતા અને તે ઓવર તેન્ડાઈ ચતારાએ ફેંકી હતી. તે ઓવરમાં વિજય સુનિશ્ચિત કરવાની જવાબદારી વોશિંગ્ટન સુંદરની હતી, પરંતુ તે માત્ર બે રન જ બનાવી શક્યો અને પાંચમા બોલ પર ચાલ્યો ગયો હતો. ભારતીય ટીમની હારનું મુખ્ય કારણ તેના બેટ્સમેનોનું ખરાબ પ્રદર્શન હતું. ટોપ ઓર્ડર બેટ્સમેનોમાં માત્ર કેપ્ટન શુભમન ગિલ થોડો સમય ક્રિઝ પર રહી શક્યો હતો. ગિલે 31 રનની ઇનિંગ રમી હતી. ગિલ સિવાય માત્ર અવેશ ખાન (16) અને વોશિંગ્ટન સુંદર (27) જ ડબલ ડિજિટ સુધી પહોંચી શક્યા હતા.
ઉલ્લેખનીય છે કે T20 ઈન્ટરનેશનલમાંથી રોહિત શર્મા અને વિરાટ કોહલીના સંન્યાસ બાદ ભારતીય ટીમની આ પ્રથમ મેચ હતી. આ ઉપરાંત, T20 વર્લ્ડ કપ 2024નો ખિતાબ જીત્યા બાદ ભારતની આ પ્રથમ મેચ હતી. આ શ્રેણી માટે હાર્દિક પંડ્યા, સૂર્યકુમાર યાદવ, ઋષભ પંત, અક્ષર પટેલ, અર્શદીપ સિંહ અને કુલદીપ યાદવ જેવા ખેલાડીઓને આરામ આપવામાં આવ્યો હતો. આવી સ્થિતિમાં શુભમન ગિલ આ શ્રેણીની કેપ્ટનશીપ કરી રહ્યો છે.
