- વોલ સ્ટ્રીટ જર્નલે પણ એક અહેવાલ પ્રકાશિત કર્યો જેમાં ક્યુબાએ થિંક ટેન્કના દાવાને ફગાવી દીધા
- ક્યુબા અમેરિકાની નજીક હોય દક્ષિણી સૈન્ય મથકોની જાસૂસી કરવા માટે એક આદર્શ સ્થળ બની શકે
- અગાઉ આવી જાસૂસી સાઇટ્સનો ઉપયોગ શીત યુદ્ધ દરમિયાન મોટા પ્રમાણમાં થતો હતો
વોશિંગટન, 03 જુલાઈ : ક્યુબા અમેરિકાના ગ્વાન્ટાનામો નેવલ બેઝ પાસે એક નવી સર્વેલન્સ બિલ્ડિંગ બનાવી રહ્યું છે. વોશિંગ્ટન સ્થિત થિંક ટેન્કનું કહેવું છે કે આ રડાર સાઈટનો ઉપયોગ અમેરિકાની જાસૂસી કરવા માટે થઈ શકે છે. થિંક ટેન્કનો દાવો છે કે ક્યુબાની દેખરેખ પાછળ ચીનનો હાથ હોઈ શકે છે. અમેરિકાની થિંક ટેન્ક સેન્ટર ફોર સ્ટ્રેટેજિક એન્ડ ઈન્ટરનેશનલ સ્ટડીઝ (CSIS) એ પોતાના એક રિપોર્ટમાં જણાવ્યું છે કે ક્યુબાની આ રડાર સાઈટ સેન્ટિયાગો ડી ક્યુબા શહેરની પૂર્વમાં સ્થિત છે. આ ક્યુબન બેઝ 2021 થી નિર્માણાધીન છે, અગાઉ તેના વિશે કોઈ માહિતી જાહેર કરવામાં આવી ન હતી.
થિંક ટેન્કે જુઓ શું કર્યા દાવા ?
ક્યુબા અમેરિકાની નજીક છે અને તેથી જ ક્યુબા અમેરિકા અને તેના દક્ષિણી સૈન્ય મથકોની જાસૂસી કરવા માટે એક આદર્શ સ્થળ બની શકે છે. સીએસઆઈએસનો દાવો છે કે ક્યુબામાં નવી ઈમારતનું બાંધકામ પૂર્ણ થયા બાદ અહીંથી અમેરિકી સેનાની હવાઈ અને દરિયાઈ ગતિવિધિઓ પર નજર રાખવામાં સરળતા રહેશે. CSIS એ એમ પણ કહ્યું કે માર્ચ 2024ની સેટેલાઇટ ઇમેજ દર્શાવે છે કે હવાના નજીકની પહાડીઓમાં ક્યુબાની સૌથી મોટી સક્રિય સિગ્નલ ઇન્ટેલિજન્સ સાઇટ, જે વર્ષોથી શંકાસ્પદ ચાઇનીઝ ઇન્ટેલિજન્સ પ્રવૃત્તિ સાથે જોડાયેલી છે, તેને છેલ્લા એક દાયકામાં ઘણી અપડેટ કરવામાં આવી છે. CSISએ જણાવ્યું હતું કે આ સાઇટ ચીનને યુએસ સૈન્ય અભ્યાસ, મિસાઇલ પરીક્ષણો, રોકેટ પ્રક્ષેપણ અને સબમરીન દાવપેચના ડેટા અને ફોટોગ્રાફ્સ એકત્રિત કરવામાં મદદ કરશે.
આ પણ વાંચો : રફાહમાં મે મહિનાથી અત્યાર સુધીમાં 900 આતંકવાદીઓ ઠાર
ક્યુબાએ થિંક ટેન્કના દાવાને ફગાવી દીધા
આ અંગે વોલ સ્ટ્રીટ જર્નલે એક અહેવાલ પણ પ્રકાશિત કર્યો છે. જેમાં ક્યુબાના નાયબ વિદેશ પ્રધાન કાર્લોસ ફર્નાન્ડીઝ ડી કોસિઓએ નકારી કાઢ્યું હતું કે ક્યુબા ટાપુ પર ચીનના લશ્કરી હિતોને આશ્રય આપી રહ્યું છે. તેમણે આક્ષેપ કર્યો હતો કે વોલ સ્ટ્રીટ જર્નલ કોઈપણ પુરાવા અને તથ્યો વિના ક્યુબા વિરુદ્ધ અભિયાન શરૂ કરવામાં વ્યસ્ત છે. તેમણે કહ્યું કે ચીનના સૈન્ય ઠેકાણાઓને લઈને જે વાર્તાઓ બનાવવામાં આવી રહી છે તે લોકોને ડરાવવાનો પ્રયાસ છે.
ચીન ક્યુબામાં પોતાની ક્ષમતા વધારી રહ્યું છે
CSISના જણાવ્યા અનુસાર, આવી જાસૂસી સાઇટ્સનો ઉપયોગ શીત યુદ્ધ દરમિયાન મોટા પ્રમાણમાં થતો હતો, પરંતુ હવે ટેક્નોલોજીની પ્રગતિને કારણે રશિયા અને અમેરિકા બંનેએ આવી જાસૂસી સાઇટ્સનો ઉપયોગ કરવાનું બંધ કરી દીધું છે. થિંક ટેંકનો દાવો છે કે ચીન દક્ષિણ ચીન સાગરમાં આવી નવી જાસૂસી સાઇટ્સ બનાવી રહ્યું છે. ગયા વર્ષે પણ, બિડેન વહીવટીતંત્રના અધિકારીઓએ જણાવ્યું હતું કે બેઇજિંગ વર્ષોથી ક્યુબાથી યુએસ પર જાસૂસી કરી રહ્યું છે અને 2019થી ત્યાં તેની ગુપ્ત માહિતી સંગ્રહ ક્ષમતાઓને અપગ્રેડ કરવાનો પ્રયાસ કરી રહ્યું છે, પરંતુ ચીન અને ક્યુબા બંનેએ આ આરોપોને ફગાવી દીધા હતા.
આ પણ વાંચો : બાંગ્લાદેશથી ભારતમાં આવતાં મેડિકલ પ્રવાસીઓમાં 48%નો ઉછાળો નોંધાયો
