આજે ભારત-ઓસ્ટ્રેલિયા મેચ પર વરસાદનું સંકટ… કોને થશે ફાયદો? જુઓ સંપૂર્ણ સમીકરણ
- સુપર-8 રાઉન્ડમાં આજે ભારતીય ટીમ અને ઓસ્ટ્રેલિયા વચ્ચે ગ્રોસ આઈલેટમાં રમાશે મેચ
- ભારતીય ટીમે સેમીફાઈનલમાં પોતાનું સ્થાન લગભગ કરી લીધું નિશ્ચિત
HD ન્યૂઝ ડેસ્ક, 24 જૂન: વેસ્ટ ઈન્ડિઝમાં રમાઈ રહેલા T20 વર્લ્ડ કપ 2024ના સુપર-8 રાઉન્ડમાં આજે (24 જૂન) ભારતીય ટીમ અને ઓસ્ટ્રેલિયા વચ્ચે ખૂબ જ મહત્વપૂર્ણ મેચ રમાશે. આ મેચ ભારતીય સમય અનુસાર રાત્રે 8 વાગ્યાથી ગ્રોસ આઈલેટના ડેરેન સેમી નેશનલ ક્રિકેટ સ્ટેડિયમમાં રમાશે. ભારતીય ટીમે સેમીફાઈનલમાં પોતાનું સ્થાન લગભગ નિશ્ચિત કરી લીધું છે. બીજી બાજુ ઓસ્ટ્રેલિયા છે, જે અફઘાનિસ્તાન સામે હારનો સામનો કરીને આવી રહ્યું છે. આવી સ્થિતિમાં, જો કાંગારૂ ટીમ સેમિફાઇનલની રેસમાં રહેવા માંગે છે, તો તેને આ મેચ કોઈપણ ભોગે જીતવી પડશે.
ગ્રોસ આઇલેટમાં ભારે વરસાદની શક્યતા
મેચ પહેલા ફેન્સ માટે એક ખરાબ સમાચાર આવી રહ્યા છે. આજે ગ્રોસ આઇલેટમાં ભારે વરસાદની શક્યતા છે. હવામાન વિભાગના જણાવ્યા અનુસાર, 24 જૂને ગ્રોસ આઇલેટમાં વરસાદ અને તોફાન થવાની સંભાવના છે. સ્થાનિક સમય અનુસાર સવારે 11 વાગ્યાની આસપાસ વરસાદની 51 ટકા શક્યતા છે. આવી સ્થિતિમાં જો લાંબો સમય વરસાદ પડશે તો મેચ રદ્દ થઈ શકે છે. જો આમ થશે તો કઈ ટીમને વધુ નુકસાન થશે અને કઈને ફાયદો થશે, ચાલો જાણીએ….
જો મેચ રદ્દ થશે તો ભારતીય ટીમને થશે ફાયદો
સુપર-8 મેચ માટે કોઈ રિઝર્વ ડે રાખવામાં આવ્યો નથી. આવી સ્થિતિમાં જો વરસાદ કે અન્ય કોઈ કારણસર મેચ રદ્દ કરવી પડે તો બંને ટીમોને 1-1 પોઈન્ટ વહેંચવામાં આવશે. આવી સ્થિતિમાં ભારતીય ટીમ પોતાના ગ્રુપ-1માં 5 પોઈન્ટ સાથે ટોપ પર રહેશે અને સેમીફાઈનલમાં પોતાનું સ્થાન નિશ્ચિત કરી લેશે.
ઓસ્ટ્રેલિયા માટે વધી શકે છે મુશ્કેલી
વરસાદ પડવાથી જો મેચ રદ કરવામાં આવે અને બંને ટીમોને 1-1 પોઈન્ટ આપવામાં આવે છે તો એક પોઈન્ટ સાથે ઓસ્ટ્રેલિયા મુશ્કેલીમાં મુકાઈ શકે છે. તેના કુલ પોઈન્ટ 3 થશે. આવી સ્થિતિમાં તેણે અફઘાનિસ્તાન અને બાંગ્લાદેશ મેચના પરિણામ પર નિર્ભર રહેવું પડશે. જો અફઘાન ટીમ આ મેચ જીતશે તો તે 4 પોઈન્ટ સાથે સેમીફાઈનલમાં પ્રવેશ કરશે અને ઓસ્ટ્રેલિયાનું પતુ કપાઈ જશે. જો બાંગ્લાદેશની ટીમ આ મેચમાં અફઘાનિસ્તાનને હરાવશે, તો તે બંને બહાર થઈ જશે. તે સ્થિતિમાં ઓસ્ટ્રેલિયન ટીમ 3 પોઈન્ટ સાથે સેમીફાઈનલમાં પ્રવેશ કરશે અને અફઘાનની ટીમ 2 પોઈન્ટ સાથે મેચની બહાર થઈ જશે.
આ પણ વાંચો: ભારતીય ટીમની જીત પછી હાર્દિક પંડ્યા ઈચ્છે છે આ બાબતમાં સુધારો, કહ્યું- ‘આપણે આના પર ધ્યાન આપવાની જરુર’
