એર કેનેડાની ફ્લાઈટમાં ટેકઓફ થતા જ લાગી આગ: 402 મુસાફરોના જીવ તાળવે ચોંટયા, જુઓ વીડિયો
- ફ્લાઇટમાં ખરાબી અંગે તરત જ ક્રૂને જાણ કરવામાં આવી, જેમણે પરિસ્થિતિને કાબુમાં લઈ લીધી
કેનેડા, 9 જૂન: પેરિસ જતી એર કેનેડાની ફ્લાઈટમાં ટોરોન્ટો પીયર્સન ઈન્ટરનેશનલ એરપોર્ટ પરથી ઉડાન ભર્યાની થોડી જ મિનિટોમાં આગ લાગી હતી. આ દરમિયાન પ્લેનમાં 389 મુસાફરો સિવાય 13 ક્રૂ મેમ્બર હતા. આગની આ ઘટના કેમેરામાં કેદ થઈ ગઈ હતી. હકીકતમાં, 5 જૂનના રોજ બોઇંગ 777 જેટે ટોરોન્ટોથી ઉડાન ભરી હતી અને ટેકઓફની થોડી જ મિનિટોમાં, એર ટ્રાફિક કંટ્રોલ (ATC)એ જમણા એન્જિનમાંથી તણખા નીકળતા જોયા હતા. જેથી ફ્લાઇટમાં ખરાબી અંગે તરત જ ક્રૂને જાણ કરવામાં આવી હતી, જેમણે પરિસ્થિતિને સંભાળી લીધી હતી.આ ઘટનાનો વીડિયો પણ બહાર આવ્યો છે જે સોશિયલ મીડિયા પર વાયરલ થઈ રહ્યો છે, જેમાં પ્લેનમાંથી તણખા નીકળતા જોવા મળે છે.
Video captures moment Air Canada 777 had a compressor stall on departure from Toronto Pearson International Airport on Wednesday. AC872 returned safely 30 minutes later. pic.twitter.com/I8LrySWHBJ
— Breaking Aviation News & Videos (@aviationbrk) June 7, 2024
એર કેનેડાનું સતાવાર નિવેદન શું કહે છે?
આ અંગે એર કેનેડાએ એક નિવેદનમાં જણાવ્યું હતું કે, “ઇન્ટરનેટ પર પોસ્ટ કરાયેલી ઘટનાનો વીડિયો કોમ્પ્રેસર સ્ટોલ(Compressor Stall)ના પોઈન્ટ પરના એન્જિનનો છે, જેમાં આવું ત્યારે થાય છે જ્યારે તેના એરોડાયનેમિક્સ ટર્બાઇન એન્જિન સાથે પ્રભાવિત થયા હોય. આ વિવિધ પરિબળોને કારણે થઈ શકે છે. પરંતુ આ ઘટના એ પરિણામના કારણે થઈ હોય શકે કે જેમાં એન્જિન દ્વારા હવાનો પ્રવાહ વિક્ષેપિત થયો હોય અને જેનાથી એન્જિનની નીચે બળતણ સળગી ઉઠ્યું હોય, તેથી વીડિયોમાં દેખાતા તણખાઓ એન્જિનની આગ નથી.”
વિમાન તરત જ પાછું ઉતર્યું
આ ખામીની જાણ તરત જ ફ્લાઇટ ક્રૂને કરવામાં આવી હતી, જેમણે પરિસ્થિતિને સંભાળી લીધી અને વિમાનને એરપોર્ટ પર પાછું લેન્ડ કરાવ્યું. એરલાઈને જણાવ્યું હતું કે, “વિમાન ઉતર્યા પછી, સામાન્ય ઓપરેટિંગ પ્રક્રિયાઓ મુજબ એરપોર્ટ રિસ્પોન્સ વાહનો દ્વારા તેનું નિરીક્ષણ કરવામાં આવ્યું હતું.”
બાદમાં તે જ રાત્રે મુસાફરોને બીજી ફ્લાઈટમાં મોકલવામાં આવ્યા હતા અહેવાલ અનુસાર, બોઇંગ જેટમાં ખામી સર્જાઈ હતી તેને સેવામાંથી દૂર કરી દેવામાં આવ્યું છે અને તેના મેઈન્ટેનન્સ સ્ટાફ અને એન્જિનિયરો દ્વારા તેનું નિરીક્ષણ કરવામાં આવી રહ્યું છે.
અગાઉ પણ આવી ઘટનાઓ બની ચૂકી છે
બોઇંગ 777 જેટ એરક્રાફ્ટ સાથે સંકળાયેલી તાજેતરની ફ્લાઇટ ઘટનાઓની શ્રેણીમાં આ નવીનતમ ઘટના છે, જેણે આ વિમાનોની સલામતી અને વિશ્વસનીયતા અંગે ચિંતાઓ ઊભી કરી છે. તે જ વર્ષે 7 માર્ચે, યુનાઈટેડ એરલાઈન્સના બોઈંગ 777-200ને સાન ફ્રાન્સિસ્કોથી ટેકઓફ દરમિયાન ટાયર ફેઈલ થઈ જવાથી લોસ એન્જલસમાં ઈમરજન્સી લેન્ડિંગ કરવું પડ્યું હતું. આ ઘટનાનો એક વિડિયો પણ બહાર આવ્યો હતો અને ટાયર ફાટવાને કારણે કાર પાર્કમાં રહેલા વાહનોને નુકસાન થયું હતું.
13 માર્ચે યુનાઈટેડ એરલાઈન્સના બોઈંગ 777-300ને ટેકઓફ પછી ઈંધણ લીક થયાની જાણ થતાં ઓસ્ટ્રેલિયાના સિડનીમાં પાછા ફરવાની અને લેન્ડ કરવાની ફરજ પડી હતી. વિમાન સાન ફ્રાન્સિસ્કો જઈ રહ્યું હતું.
આ પણ જુઓ: કોંગ્રેસના “ખટાખટ” ચૂંટણી વચનને લાંચ ગણીને કોર્ટમાં પડકારવામાં આવ્યું
