તમિલનાડુની એન્જિનિયરિંગ કોલેજના 42 વિદ્યાર્થીઓ ફૂડ પોઈઝનિંગને કારણે હોસ્પિટલમાં દાખલ
- વિદ્યાર્થીઓએ હોસ્ટેલમાં ભોજન લીધા બાદ ઉબકા અને અસ્વસ્થતાની કરી હતી ફરિયાદ
તમિલનાડુ, 3 જૂન: તમિલનાડુના ઈરોડમાં એક ખાનગી એન્જિનિયરિંગ કોલેજના 42 વિદ્યાર્થીઓ રવિવારે સવારે તેમની હોસ્ટેલમાં પીરસવામાં આવેલું ભોજન ખાવાથી બીમાર પડ્યા હતા. પોલીસે જણાવ્યું હતું કે, વિદ્યાર્થીઓએ હોસ્ટેલમાં ભોજન લીધા બાદ ઉબકા અને અસ્વસ્થતાની ફરિયાદ કરી હતી. આ પછી તેને ઈરોડ જિલ્લા મેડિકલ કોલેજ હોસ્પિટલમાં લઈ જવામાં આવ્યા હતા. તમામ અસરગ્રસ્ત વિદ્યાર્થીઓની હાલત સ્થિર હોવાનું કહેવાય છે.
અગાઉ પણ બની છે આવી ઘટનાઓ
ગયા મહિને, કર્ણાટકના બેલાગવી જિલ્લાના સાવદત્તી તાલુકાના હુલીકાટ્ટી ગામમાં ઓછામાં ઓછા 50 લોકોને પેટમાં દુખાવો, મરડો અને ઉલ્ટીની ફરિયાદ બાદ હોસ્પિટલમાં દાખલ કરવામાં આવ્યા હતા. મંગળવારે ભીરેશ્વર અને કરેમ્મા મેળામાં કથિત રીતે ‘પ્રસાદ’ ખાધા પછી લોકોએ શંકાસ્પદ ફૂડ પોઈઝનિંગના લક્ષણો જોવા મળ્યા હતા. પાંચ દર્દીઓની હાલત ગંભીર છે અને તેઓની ધારવાડ જિલ્લા હોસ્પિટલમાં સારવાર ચાલી રહી છે. ગામમાં મેડિકલ કેમ્પ ગોઠવવામાં આવ્યો છે અને સ્થાનિક લોકોના સ્વાસ્થ્ય પર નજર રાખવા માટે આરોગ્ય વિભાગના અધિકારીઓને તૈનાત કરવામાં આવ્યા છે.
આ વર્ષે ફેબ્રુઆરીમાં આવી જ એક ઘટનામાં, મહારાષ્ટ્રના બુલઢાણા જિલ્લાના લોનાર તાલુકામાં આયોજિત ધાર્મિક કાર્યક્રમ દરમિયાન પ્રસાદ ખાવાથી સેંકડો ગ્રામવાસીઓ ફૂડ પોઈઝનિંગનો ભોગ બન્યા હતા. જોકે, બેડની અછતને કારણે અનેક દર્દીઓને હોસ્પિટલ પરિસરની બહાર સારવાર લેવી પડી હતી. સેંકડો દર્દીઓ જમીન પર પડેલા હતા અને સારવાર માટે દોરડા વડે ગ્લુકોઝની બોટલો ઝાડ પર લટકતી હતી તે ભયાનક સ્થિતિ દર્શાવતા આઘાતજનક દ્રશ્યો બહાર આવ્યા હતા.
આ પણ જુઓ: અમદાવાદ: AMCની કચેરીઓમાં જ ફાયરના એક્સપાયર થયેલા સાધનોથી હોબાળો મચી ગયો
