મોદી સરકારના 10 વર્ષ પૂર્ણ, જાણો કેવું રહ્યું બે ટર્મનું કામ; શું ત્રીજી વખત પણ સત્તા મળશે?

• લોકસભા ચૂંટણી 2014માં પ્રચંડ જીત મેળવ્યા બાદ એનડીએ હવે ત્રીજી વખત સરકાર બનાવવાના કરી રહી છે દાવો

દિલ્હી, 26 મે: દેશભરમાં આ દિવસોમાં દરેક જગ્યાએ લોકસભા ચૂંટણીની ચર્ચા થઈ રહી છે. છેલ્લી બે ટર્મમાં એનડીએ સરકાર પૂર્ણ બહુમતી સાથે રચાઈ હતી અને નરેન્દ્ર મોદી બંને વખત દેશના વડાપ્રધાન તરીકે ચૂંટાયા હતા. હવે એનડીએ ત્રીજી વખત સરકારમાં આવવાનો દાવો કરી રહી છે. NDAનું સૂત્ર છે ‘આ વખતે 400 પાર’. આવી સ્થિતિમાં જો ફરી એનડીએ સરકાર બનશે તો નરેન્દ્ર મોદી સતત ત્રીજી વખત વડાપ્રધાન બનશે. આજની તારીખ એટલે કે 26મી મે એ જ તારીખ છે જ્યારે નરેન્દ્ર મોદીએ પહેલીવાર વડાપ્રધાન તરીકે શપથ લીધા હતા. આજે મોદી સરકારના 10 વર્ષ પૂર્ણ થયા છે.

2014માં જંગી બહુમતી મળી હતી

લોકસભા ચૂંટણી 2014ની વાત કરીએ તો નરેન્દ્ર મોદી સૌથી ઝડપથી ઉભરતા નેતા બન્યા અને તે સમયે મોદી લહેરની ખૂબ ચર્ચા થઈ હતી. આ જ કારણ હતું કે 2014ની સામાન્ય ચૂંટણીમાં ભારતીય જનતા પાર્ટીએ 282 બેઠકો જીતી હતી, જ્યારે NDA ગઠબંધનને કુલ 336 બેઠકો મળી હતી. આ રીતે પૂર્ણ બહુમતી સાથે એનડીએ સરકાર બની હતી. આ ચૂંટણીના પરિણામો 16 મેના રોજ જાહેર કરવામાં આવ્યા હતા. ચૂંટણી પરિણામો જાહેર થયા બાદ નરેન્દ્ર મોદીએ 26 મેના રોજ વડાપ્રધાન તરીકે શપથ લીધા હતા. ત્યારથી નરેન્દ્ર મોદી દેશના વડાપ્રધાન પદે રહ્યા છે.

2019માં 2014 કરતા મોટી જીત મળી

લોકસભા ચૂંટણી 2019માં નરેન્દ્ર મોદીની લોકપ્રિયતામાં એટલો વધારો થયો કે 2014ની લોકસભા ચૂંટણી કરતા પણ મોટી જીત મેળવી હતી. 2019માં ભારતીય જનતા પાર્ટીને 303 બેઠકો મેળવી હતી, જ્યારે NDA ગઠબંધનને 353 બેઠકો મળી હતી. સાત તબક્કામાં યોજાયેલી લોકસભા ચૂંટણી 2019ના પરિણામો 23 મેના રોજ જાહેર કરવામાં આવ્યા હતા. ચૂંટણી પરિણામો બહાર આવ્યા પછી, નરેન્દ્ર મોદીએ 30 મે 2019 ના રોજ બીજી વખત વડા પ્રધાન તરીકે શપથ લીધા હતા.

રાષ્ટ્રીય હિતમાં લેવાયેલા મહત્વના નિર્ણયો

જો મોદી સરકારના 10 વર્ષના કામની વાત કરીએ તો આ 10 વર્ષમાં ઘણા મહત્વપૂર્ણ નિર્ણયો લેવામાં આવ્યા જે દેશના હિતમાં હતા. આ સમયગાળા દરમિયાન જમ્મુ-કાશ્મીરમાંથી કલમ 370 હટાવવાથી લઈને અયોધ્યામાં રામ મંદિર નિર્માણ સુધીના ઘણા ઐતિહાસિક નિર્ણયો લેવામાં આવ્યા છે. મોદી સરકારમાં ન્યાય પ્રણાલીને સુધારવા માટે ઘણા કાયદાઓ નાબૂદ કરવામાં આવ્યા છે. આ સિવાય પાકિસ્તાનમાં સર્જિકલ સ્ટ્રાઈક હોય કે પછી કોવિડ સમયગાળા દરમિયાન G20ના સફળ અમલીકરણમાં અન્ય દેશોને કરવામાં આવેલી મદદ, મોદી સરકારે વિશ્વને તેની શ્રેષ્ઠ વ્યૂહરચના વિશે માહિતગાર કર્યા છે. જેના કારણે ભારત સમગ્ર વિશ્વમાં વૈશ્વિક શક્તિ તરીકે ઉભરી આવ્યું છે.

ત્રીજી ટર્મ જીતવાનો દાવો

રશિયા-યુક્રેન યુદ્ધ વચ્ચે ભારતીય વિદ્યાર્થીઓને સુરક્ષિત રીતે પરત લાવી મોદી સરકારે તેની વિદેશ નીતિ પણ સ્પષ્ટ કરી છે. આ સમયગાળા દરમિયાન નરેન્દ્ર મોદી પણ સમગ્ર વિશ્વના સૌથી લોકપ્રિય નેતા તરીકે ઉભરી આવ્યા હતા. તે જ સમયે, તમામ વૈશ્વિક દબાણો છતાં નરેન્દ્ર મોદીની સરકારે તેની વિદેશ નીતિ સ્પષ્ટ રાખી. આ ઉપરાંત દેશના આંતરિક મુદ્દાઓ પર પણ મોદી સરકારની નીતિ સ્પષ્ટ રહી છે. મોદી સરકાર પોતાના 10 વર્ષના કાર્યકાળ દરમિયાન ભારતની અર્થવ્યવસ્થાને મજબૂત કરવાનો દાવો પણ કરી રહી છે. આ મહત્વપૂર્ણ નિર્ણયો અને સ્પષ્ટ નીતિઓને કારણે જ ભારતીય જનતા પાર્ટી ત્રીજી વખત સરકાર બનાવવાનો દાવો કરી રહી છે.

આ પણ વાંચો: નક્સલવાદ અંગે અમિત શાહનું મોટું નિવેદન, કહ્યું- ‘2-3 વર્ષમાં ખતમ થઈ જશે આ સમસ્યા’