તારક મહેતાના સોઢી 25 દિવસ બાદ ઘરે પરત ફર્યા, જાણો ક્યાં અને કેવી રીતે પસાર કર્યા આ દિવસો ?

• સોઢી આ 25 દિવસોમાં અમૃતસર, લુધિયાણા અને અન્ય ઘણા શહેરોમાં રહ્યો 

નવી દિલ્હી, 18 મે: ‘તારક મહેતા કા ઉલ્ટા ચશ્મા’ના સોઢી ઉર્ફે ગુરુચરણ સિંહ ઘરે પરત ફર્યા છે. તે 25 દિવસથી ગુમ હતા. જેને પગલે તેના પિતાએ દિલ્હી પોલીસમાં ગુમ થવાની FIR નોંધાવી હતી. ગુરુચરણ પોતે ઘણા દિવસો સુધી ગુમ થયા બાદ ઘરે પરત ફર્યા છે. પરત ફરતાં પોલીસે ગુરુચરણ સિંહની પૂછપરછ કરી હતી. આ દરમિયાન અભિનેતાએ જણાવ્યું કે, તે સાંસારિક જીવન છોડીને ધાર્મિક યાત્રા પર નીકળી ગયો હતો, જેથી તેણે ઘર છોડી દીધું હતું. આ દરમિયાન, તેઓ અમૃતસર, પછી લુધિયાણા અને અન્ય ઘણા શહેરોમાં ગુરુદ્વારામાં ઘણા દિવસો રોકાયા હતા. પછી તેમને સમજાયું કે, તેમણે ઘરે પાછા ફરવું જોઈએ. જેથી તે ઘરે પાછા આવ્યા.

Taarak Mehta Ka Ooltah Chashmah fame actor Gurucharan Singh has returned home on 17 May. He had gone missing on 22nd April. The Police have recorded his statement in the court. Gurucharan Singh said he had gone away from home on a spiritual journey: Delhi Police

— ANI (@ANI) May 18, 2024

ગુમ થયાની માહિતી 26 એપ્રિલના રોજ બહાર આવી હતી

ઉલ્લેખનીય છે કે, 22 એપ્રિલે ગુરુચરણ સિંહ મુંબઈ જવા માટે ઘરેથી નીકળ્યા હતા. પરંતુ તેના ગુમ થયાની માહિતી 26 એપ્રિલે બહાર આવી હતી. પિતાએ તેના પુત્ર અંગે પોલીસમાં ફરિયાદ નોંધાવી હતી. પોલીસે અપહરણનો ગુનો નોંધી તપાસ શરૂ કરી હતી. પોલીસના જણાવ્યા અનુસાર, ગુરુચરણ 24 એપ્રિલ સુધી દિલ્હીમાં હાજર હતા. આ પછી તેનો મોબાઈલ સ્વીચ ઓફ થઈ ગયો હતો. એવું પણ જાણવા મળ્યું છે કે, તે જલ્દી જ લગ્ન કરવા જઈ રહ્યો હતો. આ દરમિયાન તે આર્થિક સંકટમાંથી પણ પસાર થઈ રહ્યો હતો.

તપાસ દરમિયાન પોલીસને ગુરુચરણને લઈને ઘણી કડીઓ મળી હતી. જ્યારે ગુરુચરણ 22 એપ્રિલે ઘરેથી મુંબઈ જવા નીકળ્યા ત્યારે તેઓ મુંબઈ પહોંચ્યા જ નહોતા. તેણે મુંબઈમાં રિસીવ કરવા આવેલા વ્યક્તિને પણ ગેરમાર્ગે દોર્યો હતો. ત્યારબાદ ગુરુચરણે ATMમાંથી 14 હજાર રૂપિયા ઉપાડ્યા હતા.

પોલીસ પાસે કડીઓ હતી

તપાસ દરમિયાન પોલીસને ગુરુચરણના દસથી વધુ નાણાકીય હિસાબો મળી આવ્યા હતા. એટલું જ નહીં તેની પાસે એકથી વધુ જીમેલ એકાઉન્ટ હોવાનું પણ જાણવા મળ્યું હતું. નજીકના લોકો અને ડિજિટલ તપાસ બાદ પોલીસને જે હકીકતો મળી તે પરથી જાણવા મળ્યું કે, ગુરુચરણનો ધર્મ તરફનોઝુકાઉ વધી રહ્યો હતો. તેણે એક ખાસ મિત્ર પાસે પહાડો પર જવાની ઈચ્છા વ્યક્ત કરી હતી. છેલ્લા સીસીટીવી ફૂટેજમાં તે ઈ-રિક્ષા પછી પગપાળા જતો જોવા મળ્યો હતો.

‘તારક મહેતા કા ઉલ્ટા ચશ્મા’ શોનો બન્યો હિસ્સો 

ગુરુચરણ સિંહના વર્ક ફ્રન્ટ વિશે વાત કરવામાં આવે તો, તે લોકપ્રિય ટીવી સિટકોમ ‘તારક મહેતા કા ઉલ્ટા ચશ્મા’માં રોશન સિંહ સોઢીની ભૂમિકા ભજવતો જોવા મળ્યો છે. તે 2008-2013 સુધી આ શોનો ભાગ હતો. આ પછી તેણે શોને અલવિદા કહ્યું. અહેવાલ હતા કે, ગુરુચરણનો શોના મેકર્સ અસિત કુમાર મોદી સાથે વિવાદ થયો હતો. બંને વચ્ચે સર્જનાત્મક મુદ્દાઓ ઉભા થયા હતા તેમજ ગુરુચરણને પગાર પણ આપવામાં આવ્યો ન હતો. જે બાદ તેણે શોમાંથી દૂર થવાનો નિર્ણય લીધો હતો. તેની જબરદસ્ત લોકપ્રિયતાને કારણે તેને શોમાં પાછો બોલાવવામાં આવ્યો હતો. પરંતુ 2020 માં, ગુરુચરણે તેના પિતાની સંભાળ લેવા માટે ફરીથી ‘તારક મહેતા કા ઉલ્ટા ચશ્મા’ છોડી દીધી. આ પછી તે કોઈ ટીવી શોમાં જોવા મળ્યો નહોતો. તેણે પોતાની જાતને સ્ક્રીનથી સંપૂર્ણપણે દૂર કરી લીધી છે.

આ પણ જુઓ: પાકિસ્તાની નાનકડા યુટ્યુબરે બનાવ્યો વીડિયો,છેલ્લા વીડિયોમાં થયો ભાવુક!