હવે દુબઈ જવું અને રહેવું સરળ બનશે, ભારત-યુએઈ વચ્ચે ટૂંક સમયમાં થશે કરાર
- દુબઈ જઈને નોકરી કરવા અને સ્થાયી થવા ઈચ્છતા ભારતીયો માટે સારા સમાચાર
- સ્થળાંતર સંબંધિત કરારોને વહેલી તકે અપાશે આખરી ઓપ
- JCCAની પાંચમી બેઠક દરમિયાન લેવાયો નિર્ણય
નવી દિલ્હી, 16 મે: દુબઈ જઈને નોકરી કરવા અને ત્યાં સ્થાયી થવા ઈચ્છતા ભારતીયો માટે સારા સમાચાર છે. હવે સંયુક્ત આરબ અમીરાત (UAE) માં મુલાકાત લેવી, રહેવું અને વ્યાપાર કરવું વધુ સરળ બનશે. આ માટે, ભારત અને UAE વચ્ચે લોકો-થી-લોકોના સંપર્કોને પ્રોત્સાહન આપવાના માર્ગો ઉપરાંત, સ્થળાંતર સંબંધિત કરારોને વહેલી તકે અંતિમ સ્વરૂપ આપવાની ચર્ચા કરવામાં આવી છે. નવી દિલ્હીમાં મંગળવારે રાજદ્વારી બાબતોની સંયુક્ત સમિતિ (JCCA)ની પાંચમી બેઠક દરમિયાન આ નિર્ણય લેવામાં આવ્યો હતો.
વિદેશ મંત્રાલયે જણાવ્યું હતું કે આ બેઠકમાં બંને પક્ષોએ શ્રમ, વિઝા, સ્થળાંતર, નાગરિકતા સહિતના મુદ્દાઓ પર વિસ્તૃત ચર્ચા કરી હતી. બંને પક્ષોએ પરસ્પર હિતના અન્ય મુદ્દાઓ પર પણ ચર્ચા કરી, જેમાં લોકો-થી-લોકોના વધુ સારા સંપર્કોને પ્રોત્સાહિત કરવા અને સ્થળાંતર અને હિલચાલ અંગેના કરારના પ્રારંભિક નિષ્કર્ષ સહિત UAEએ લીધેલા વિવિધ પગલાં વિશે વિગતવાર ચર્ચા કરવામાં આવી હતી.
આર્થિક, વેપાર, સંરક્ષણ અને ટેકનોલોજીમાં સહયોગ વધશે
ભારત અને UAE હવે ઘણા ક્ષેત્રોમાં પરસ્પર સહયોગને પ્રોત્સાહન આપવા માટે સાથે કામ કરી રહ્યા છે. ભારતીય વિદેશ મંત્રાલયે કહ્યું, “બંને દેશો વચ્ચેના સંબંધો રાજકીય, આર્થિક, વેપાર, વાણિજ્ય, સંરક્ષણ, સાંસ્કૃતિક, તકનીકી અને ઉર્જા સહિત પરસ્પર સહયોગના તમામ ક્ષેત્રોને આવરી લે છે, બંને દેશોના લોકો વચ્ચેના સંબંધો સતત ગાઢ બની રહ્યા છે.” યુએઈમાં હાલમાં 35 લાખથી વધુ ભારતીયો રહે છે. આ કરાર બાદ આ સંખ્યામાં હજુ વધારો થવાની ધારણા છે.
આ પણ વાંચો:અમેરિકી સંસદમાં ભારતીય મૂળના લોકોના પ્રતિનિધિત્વ અંગે વાઈસ પ્રેસિડેન્ટ કમલા હેરિસનું સૂચક નિવેદન
