- હાઇવે ઉપર જાનની કાર અને અન્ય વાહન વચ્ચે થયો હતો અકસ્માત
- અકસ્માતના લીધે બંને વાહનોમાં આગ લાગી ગઈ હતી
કાનપુર, 11 મે : યુપીના ઝાંસીમાં એક ભયાનક માર્ગ અકસ્માત સર્જાયો હતો. ઝાંસી-કાનપુર હાઈવે પર ડીસીએમ અને કાર વચ્ચે જોરદાર ટક્કર થઈ હતી. થોડી જ વારમાં બંને વાહનોમાં આગ લાગી હતી અને કારમાં સવાર વરરાજા સહિત ચાર લોકો બળીને ખાખ થઈ ગયા હતા. ત્યાં બે લોકોનો આબાદ બચાવ થયો હતો. બંને ઘાયલ છે અને તેમને સારવાર માટે હોસ્પિટલમાં દાખલ કરવામાં આવ્યા છે. પોલીસના જણાવ્યા અનુસાર આ ઘટનામાં વરરાજા, વરરાજાના ભાઈ, વરરાજાના ભત્રીજા અને કાર ચાલક બળીને ખાખ થઈ ગયા હતા.
મળતી માહિતી મુજબ, ઝાંસી જિલ્લાના એરિચ પોલીસ સ્ટેશન વિસ્તારના બિલાટી ગામમાં રહેતા આકાશના લગ્ન 10 મેના રોજ થયા હતા. તે લગ્નની જાન સાથે બાડા ગામ પોલીસ સ્ટેશન વિસ્તારના છાપર ગામ જઈ રહ્યો હતો. આકાશ તેના સગા ભાઈ આશિષ, લગભગ 7 વર્ષના ભત્રીજા આશુ અને બે સંબંધીઓ સાથે કારમાં હતો. ડ્રાઈવર ભગત કાર ચલાવી રહ્યો હતો. ગામ છોડ્યા પછી, જ્યારે તે બાડા ગામ પોલીસ સ્ટેશન વિસ્તારમાં કાનપુર હાઈવે પર પરીછા ઓવર બ્રિજ પર પહોંચ્યો ત્યારે તેને પાછળથી આવી રહેલા ડીસીએમ વાહને ટક્કર મારી હતી. જેના કારણે કાર અને ડીસીએમ વાહનમાં આગ લાગી હતી.
ડીસીએમનો ચાલક સ્થળ પરથી નાસી ગયો
આગની જ્વાળાઓ જોઈને કારમાં બેઠેલા તમામ લોકો ચીસો પાડવા લાગ્યા હતા. ડીસીએમનો ચાલક કૂદીને ભાગી ગયો હતો. અકસ્માત જોઈને રાહદારીઓએ પોલીસ અને સ્ટેશનના ફાયર બ્રિગેડને જાણ કરી હતી. દરમિયાન પાછળથી અન્ય સગા-સંબંધીઓની કાર આવી રહી હતી, જેમણે કારને અટકાવી હતી અને કોઈ રીતે સળગતી કારનો કાચ તોડી બે લોકોને બચાવી સારવાર માટે મેડિકલ કોલેજમાં મોકલી આપ્યા હતા, જ્યારે વરરાજા આકાશ, ભાઈ આશિષ, ભત્રીજો આશુ અને ડ્રાઈવર ભગતને જીવતા સળગી ગયા હતા. ફાયર બ્રિગેડે ઘટના સ્થળે પહોંચી આગને કાબુમાં લીધી હતી. આગ કાબુમાં આવ્યા બાદ પોલીસે કારમાં ફસાયેલા મૃતદેહોને બહાર કાઢીને કસ્ટડીમાં લીધા હતા.
મૃતદેહોને પોસ્ટમોર્ટમ માટે મોકલવામાં આવ્યા હતા
ઘટના સ્થળે પહોંચેલા શહેરના પોલીસ અધિક્ષક જ્ઞાનેન્દ્ર કુમારે જણાવ્યું કે કારમાં 6 લોકો બેઠા હતા. એમાં વરરાજા, વરરાજાના ભાઈ અને તેમના ભત્રીજા અને સંબંધીઓ બેઠા હતા. પરીછા ઓવરબ્રિજ પર DCM અને કારનો અકસ્માત થયો હતો. જેમાં વરરાજા સહિત કુલ 4 લોકો દાઝી ગયા હતા. ચાર મૃતદેહોને કબજામાં લઈ પોસ્ટમોર્ટમ માટે મોકલી દેવામાં આવ્યા છે.
