ગર્વની ક્ષણઃ 77મા કાન્સ ફિલ્મ ફેસ્ટિવલમાં ઉજવાશે ‘ભારત પર્વ’

• પાયલ કાપડિયાની ‘ઓલ વી ઈમેજિન એઝ લાઈટ’ 30 વર્ષ પછી કોમ્પિટિશન સેક્શનમાં આવેલી ભારતીય ફિલ્મ
• નવેમ્બર 2024માં ગોવા ખાતે યોજાનાર 55માં IFFIના પોસ્ટર અને ટ્રેલરનું અનાવરણ કરાશે
  
• NID, અમદાવાદ દ્વારા ભારત પેવેલિયનની રચના કરવામાં આવી છે, તેને ‘ધ સુત્રધાર’ નામ અપાયું

10 મે, અમદાવાદઃ કાન્સ ફિલ્મ ફેસ્ટિવલમાં ભારત માટે આ ખાસ વર્ષ છે કારણ કે દેશ આ પ્રતિષ્ઠિત ફેસ્ટિવલની 77મી આવૃત્તિ માટે તૈયાર છે. કાન્સ ફિલ્મ ફેસ્ટિવલ 14થી 25 મે દરમિયાન યોજાશે. કોર્પોરેટ ભારતીય પ્રતિનિધિમંડળમાં ભારત સરકાર, રાજ્ય સરકારોના પ્રતિનિધિઓ, ઉદ્યોગના સભ્યો સામેલ છે, જે વિશ્વના અગ્રણી ફિલ્મ બજારમાં ભારતની રચનાત્મક અર્થવ્યવસ્થાને પ્રદર્શિત કરશે. એવું પહેલી વખત બનશે જ્યારે દેશ 77માં કાન્સ ફિલ્મ ફેસ્ટિવલમાં ‘ભારત પર્વ’ની યજમાની કરશે, જેમાં ભાગ લઈ રહેલા વિશ્વભરના પ્રસિદ્ધ મહાનુભાવો અને પ્રતિનિધિઓ, ફિલ્મી સેલિબ્રિટીઝ, ફિલ્મ નિર્માતાઓ, નિર્દેશકો સાથે જોડાઈ શકશે. વિશ્વભરના ખરીદદારો અને સેલ્સ એજન્ટ્સ સાથે જોડાવા અને સર્જનાત્મક તકો અને પ્રતિભાની સમૃદ્ધ બેંકનું પ્રદર્શન કરવા માટે આ ફેસ્ટિવલમાં ભાગ લઈ રહ્યા છે. 20થી 28 નવેમ્બર, 2024ના રોજ ગોવામાં યોજાનારા 55માં ઈન્ડિયા ઈન્ટરનેશનલ ફિલ્મ ફેસ્ટિવલ (IFFI)ના ઓફિશિયલ પોસ્ટર અને ટ્રેલરનું અનાવરણ પણ ભારત પર્વ ખાતે કરવામાં આવશે. ભારત પર્વમાં 55મી IFFIની સાથે આયોજિત થનારી પહેલી વર્લ્ડ ઓડિયો-વિઝ્યુઅલ એન્ડ એન્ટરટેઈનમેન્ટ સમિટ (વેવ્સ) માટે ‘સેવ ધ ડેટ’ની રજૂઆત પણ થશે.

પેવેલિયનનું આયોજન કરશે NFDC

108 વિલેજ ઈન્ટરનેશનલ રિવેરા ખાતે 77માં કાન્સ ફિલ્મ ફેસ્ટિવલમાં ભારત પેવેલિયનનું ઉદ્ઘાટન 15 મેના રોજ જાણીતી ફિલ્મી હસ્તીઓની હાજરીમાં કરવામાં આવશે. કાન્સમાં ભારત પેવેલિયન ભારતીય ફિલ્મ સમુદાય માટે વિવિધ પ્રવૃત્તિઓમાં જોડાવા માટે એક મંચ તરીકે કામ કરે છે, જેમાં પ્રોડક્શન સહયોગને પ્રોત્સાહન આપવું, ક્યુરેટેડ નોલેજ સેશન્સ, ડિસ્ટ્રિબ્યુશન ડીલ પર હસ્તાક્ષર કરવા, સ્ક્રિપ્ટ્સ પર હસ્તાક્ષર કરવા, ગ્રીનલાઈટિંગ સ્ક્રિપ્ટ્સ, બી2બી મીટિંગ્સ અને વિશ્વભરના જાણીતા મનોરંજન અને મીડિયા પ્લેયર્સ સાથે નેટવર્કિંગનો સમાવેશ થાય છે. પેવેલિયનનું આયોજન નેશનલ ફિલ્મ ડેવલપમેન્ટ કોર્પોરેશન (NFDC) દ્વારા ફેડરેશન ઓફ ઈન્ડિયન ચેમ્બર્સ ઓફ કોમર્સ એન્ડ ઇન્ડસ્ટ્રી (ફિક્કી)ના સહયોગથી ઉદ્યોગના ભાગીદાર તરીકે કરવામાં આવશે. કોન્ફેડરેશન ઓફ ઈન્ડિયન ઇન્ડસ્ટ્રી (સીઆઈઆઈ) મારફતે માર્ચેડુ કાન્સમાં એક ‘ભારત સ્ટોલ’ મૂકવામાં આવશે, જેનો ઉદ્દેશ ઉદ્યોગને જોડવા અને સહયોગ પ્રદાન કરવાનો છે.

NIDએ ભારત પેવેલિયનની રચના કરી

નેશનલ ઈન્સ્ટિટયૂટ ઓફ ડિઝાઇન, અમદાવાદ દ્વારા ભારત પેવેલિયનની રચના કરવામાં આવી છે, જેને આ વર્ષની ‘ક્રિએટ ઈન ઈન્ડિયા’ની થીમ દર્શાવવા માટે ‘ધ સુત્રધાર’ નામ આપવામાં આવ્યું છે. આ વર્ષે કાન્સ ફિલ્મ ફેસ્ટિવલમાં એક સમૃદ્ધ ઈતિહાસ અને સર્જનાત્મકતાનો નજારો આંતરરાષ્ટ્રીય મંચ પરની તેની દિશાને દર્શાવે છે. પાયલ કાપડિયાની પ્રસિદ્ધ કૃતિ, ‘ઓલ વી ઇમેજિન એઝ લાઇટ’ પ્રેક્ષકોને મોહિત કરવા અને પ્રતિષ્ઠિત પામ ડી’ઓર માટે સ્પર્ધા કરવા માટે તૈયાર છે. ભારતીય ટાઈટલે ત્રણ દાયકા પછી કાન્સ ફિલ્મ ફેસ્ટિવલ ઓફિશિયલ સિલેક્શનના કોમ્પિટિશન સેક્શનમાં સ્થાન મેળવ્યું છે. બ્રિટિશ-ભારતીય ફિલ્મ નિર્માતા સંધ્યા સૂરીની ‘સંતોષ’માં માર્મિક કથા, અન સર્ટેન રિગાર્ડની સાથે-સાથે ડાયરેક્ટર્સ ફોર્ટનાઈટમાં કરણ કંધારીની ઉત્તેજક ‘સિસ્ટર મિડનાઈટ’ અને એલ’એસિડમાં મૈસમ અલીની આકર્ષક ‘ઈન રિટ્રીટ’ સિનેમેટિક લેન્ડસ્કેપને વધુ સમૃદ્ધ બનાવવામાં આવ્યું છે. ફિલ્મ એન્ડ ટેલિવિઝન ઈન્સ્ટિટ્યૂટ ઓફ ઈન્ડિયા (FTTI)ના વિદ્યાર્થીની ફિલ્મ ‘સનફ્લાવર્સ વેર ફર્સ્ટ વન્સ ટૂ નો’ને લા સિનેફ કોમ્પિટિટિવ સેક્શનમાં પસંદ કરવામાં આવી છે. કન્નડ ભાષામાં બનેલી આ શોર્ટ ફિલ્મને વિશ્વભરની એન્ટ્રીઓમાં શોર્ટલિસ્ટ કરવામાં આવી હતી અને હવે તે અંતિમ તબક્કામાં અન્ય 17 ઈન્ટરનેશનલ શોર્ટ ફિલ્મો સામે સ્પર્ધા કરશે.

કમ, ક્રિએટ ઈન ઈન્ડિયા

અમૂલ ડેરી સહકારી ચળવળ પર ધ્યાન કેન્દ્રિત કરતી શ્યામ બેનેગલની ‘મંથન’ ક્લાસિક્સ વિભાગમાં રજૂ કરવામાં આવશે. મંત્રાલયના એકમ એનએફડીસી-નેશનલ ફિલ્મ આર્કાઈવ ઓફ ઇન્ડિયા (NFAI)ની ફિલ્મ ‘વોલ્ટ’માં ફિલ્મ રીલ્સને ઘણા દાયકા સુધી સાચવી રાખવામાં આવી હતી અને ફિલ્મ હેરિટેજ ફાઉન્ડેશન (FHM) દ્વારા તેને પુનઃસ્થાપિત કરવામાં આવી છે. ગોવા, મહારાષ્ટ્ર, જમ્મુ -કાશ્મીર, કર્ણાટક, ઝારખંડ અને દિલ્હી સહિત ભારતના ઘણા રાજ્યો ભારતના વૈવિધ્યસભર સ્થળો અને ફિલ્મ પ્રતિભાને પ્રદર્શિત કરવામાં મદદ રૂપ થાય તેવી શક્યતા છે.

ભારતના સહયોગથી ફિલ્મ નિર્માણની તકો ચકાસવા પર એક સત્રનું આયોજન કરવામાં આવ્યું છે, જેનું શીર્ષક છે ‘વિપુલ પ્રમાણમાં પ્રોત્સાહનો અને સીમલેસ ફેસિલિટેશન્સ – કમ, ક્રિએટ ઈન ઈન્ડિયા’ . મુખ્ય મંચ (રિવેરા) ખાતે 15 મેના રોજ બપોરે 12 વાગ્યે તેનું આયોજન કરવામાં આવી રહ્યું છે. આ પેનલ ડિસ્કશનમાં ફિલ્મ નિર્માણ, સહ-નિર્માણની તકો અને ટોચની પોસ્ટ-પ્રોડક્શન સુવિધાઓ માટે ભારતના વિશાળ પ્રોત્સાહનો પર ભાર મૂકવામાં આવશે.

સમગ્ર ફેસ્ટિવલ દરમિયાન ભારત પેવેલિયનમાં આયોજિત ઇન્ટરેક્ટિવ સેશનમાં ભારતમાં સર્જન માટે પ્રોત્સાહન, ફિલ્મ ફેસ્ટિવલમાં આંતરરાષ્ટ્રીય સહયોગ, ફિલ્મિંગ ડેસ્ટિનેશન તરીકે ભારત, ભારત અને સ્પેન, યુકે અને ફ્રાન્સ જેવા દેશો વચ્ચે દ્વિપક્ષીય ફિલ્મ કો-પ્રોડક્શન જેવા વિષયોને આવરી લેવામાં આવશે. આ સત્રોનો ઉદ્દેશ ગતિશીલ ભારતીય ફિલ્મ ઉદ્યોગ અને આંતરરાષ્ટ્રીય ભાગીદારો સાથે જોડાવા ઈચ્છતા ફિલ્મ નિર્માતાઓ માટે ચર્ચા, નેટવર્કિંગ અને સહયોગની તકોને સરળ બનાવવાનો છે.

આ પણ વાંચોઃ ચાર ધામના દર્શન વિશે તમે જાણવા માગતા હોવ એ બધું, આ રીતે કરાવો નોંધણી