આતંકવાદી નિજ્જર હત્યા કેસમાં 3ની ધરપકડ પર એસ જયશંકરની પ્રતિક્રિયા, કહ્યું-‘અમે રાહ જોઈશું…’
- કેનેડામાં જે પણ થઈ રહ્યું છે તે તેમની આંતરિક રાજનીતિને કારણે થઈ રહ્યું છે: એસ જયશંકર
દિલ્હી, 5 મે: કેનેડામાં ખાલિસ્તાન સમર્થક આતંકવાદી હરદીપ સિંહ નિજ્જરની હત્યા કેસમાં ત્રણ ભારતીયોની ધરપકડ કરવામાં આવી છે. હવે આ અંગે ભારતના વિદેશ મંત્રી એસ જયશંકરનું નિવેદન પ્રકાશમાં આવ્યું છે. જયશંકરે કહ્યું કે ખાલિસ્તાન સમર્થક હરદીપ સિંહ નિજ્જરની હત્યાને લઈને કેનેડામાં જે કંઈ થઈ રહ્યું છે તે મોટાભાગે તેમની આંતરિક રાજનીતિને કારણે થઈ રહ્યું છે.
કેનેડા કોઈ આધાર વગર જ આક્ષેપો કરે છેઃ એસ જયશંકર
જયશંકરે વધુમાં કહ્યું કે ભારતને આ મામલામાં કોઈ લેવાદેવા નથી. એસ જયશંકરે કહ્યું કે કેનેડા કોઈ પણ આધાર કે પુરાવા વગર જ ભારત પર ખોટું કામ કરવાનો આરોપ લગાવે છે. વાસ્તવમાં, એસ જયશંકર એ સવાલનો જવાબ આપી રહ્યા હતા કે કેનેડિયન પોલીસ હરદીપ સિંહ નિજ્જરની હત્યા કેસમાં ભારત સરકાર સાથે ત્રણેય આરોપીઓના સંબંધની તપાસ કરી રહી છે.
અમે કેનેડા પોલીસ માહિતી શેર કરે તેની રાહ જોઈશું: એસ જયશંકર
જયશંકરે જણાવ્યું હતું કે ધરપકડ કરાયેલા ત્રણ ભારતીયો વિશે કેનેડિયન પોલીસ માહિતી શેર કરે તેની ભારત રાહ જોશે. મંત્રીએ કહ્યું કે તેમણે ધરપકડના અહેવાલો જોયા છે અને શંકાસ્પદ દેખીતી રીતે કોઈક પ્રકારની ગેંગ પૃષ્ઠભૂમિ ધરાવતા ભારતીયો છે અને પોલીસ તરફથી અપડેટની રાહ જોવી પડશે.
કેનેડાથી પંજાબમાં થઈ રહ્યા છે અપરાધ
વિદેશ મંત્રીએ વધુમાં કહ્યું કે અમે ઘણી વખત ચિંતા વ્યક્ત કરી છે કે ભારતમાં ખાસ કરીને પંજાબમાં સંગઠિત અપરાધને કેનેડાથી ચલાવવાની મંજૂરી આપવામાં આવી રહી છે, જેને રોકવી જોઈએ. એસ જયશંકરે એમ પણ કહ્યું હતું કે ભારતને “વિકસિત ભારત” બનાવવા માટે વિદેશ સહિત વિવિધ ક્ષેત્રોમાં વધુ સુધારા લાવવા માટે ભારતને નરેન્દ્ર મોદી જેવા મજબૂત અને સક્રિય વડા પ્રધાનની જરૂર છે.
ખાલિસ્તાન સમર્થકોને કેનેડા આપી રહ્યું છે આશ્રય
વિદેશ મંત્રીએ કહ્યું કે ખાલિસ્તાન તરફી લોકોનો એક વર્ગ કેનેડાની લોકશાહીનો ઉપયોગ કરી રહ્યો છે, લોબી બનાવી રહ્યો છે અને વોટ બેંક બની રહ્યો છે. જયશંકરે દાવો કર્યો હતો કે કેનેડામાં શાસક પક્ષ પાસે સંસદમાં બહુમતી નથી અને કેટલાક પક્ષો ખાલિસ્તાન તરફી નેતાઓ પર નિર્ભર છે.
આ પણ વાંચો: કેનેડાએ ખાલિસ્તાની આતંકી નિજ્જરની હત્યામાં શંકાસ્પદોની કરી ધરપકડ: રિપોર્ટ
