સંજય નિરૂપમ શિવસેનામાં જોડાયા, CM શિંદેએ આવકાર્યા

• થોડા સમય પહેલા નિરૂપમને કોંગ્રેસે પાર્ટીમાંથી બરતરફ કર્યા હતા
• પક્ષ વિરોધી પ્રવૃત્તિનો તેમના ઉપર હતો આરોપ

નવી મુંબઈ, 3 મે: કોંગ્રેસના પૂર્વ નેતા સંજય નિરુપમ શિવસેનામાં જોડાયા છે. તેઓ એકનાથ શિંદેની હાજરીમાં શિવસેનામાં જોડાયા હતા. આ દરમિયાન સીએમ શિંદેએ કહ્યું કે હું સંજય નિરુપમનું શિવસેનામાં સ્વાગત કરું છું. તેમની સાથે કોંગ્રેસના ઘણા કાર્યકરો પણ શિવસેના સાથે જોડાયેલા છે. શિંદેએ કહ્યું કે બાળાસાહેબે સંજય નિરુપમને બે વખત રાજ્યસભામાં મોકલ્યા હતા. તેઓ ચૂંટણી લડવા માંગતા હતા, પરંતુ જ્યારે મેં તેમને પાર્ટી માટે કામ કરવાનું કહ્યું ત્યારે તેમને બદલામાં કંઈ ન મળ્યું, તેમ છતાં તેઓ પાર્ટીમાં જોડાયા હતા. એટલા માટે હું તેમનું સ્વાગત કરું છું.

ઉલ્લેખનીય છે કે તેમણે અવિભાજિત શિવસેના છોડ્યાના 19 વર્ષ બાદ આ નિર્ણય લીધો છે. તેમણે શિવસેનાથી રાજકીય સફર શરૂ કરી હતી. ગયા મહિને પાર્ટી વિરોધી પ્રવૃત્તિઓ માટે કોંગ્રેસમાંથી હકાલપટ્ટી થયા બાદ સંજય નિરુપમ સીએમ શિંદેની હાજરીમાં શિવસેનામાં જોડાયા હતા. નિરુપમ અગાઉ અવિભાજિત શિવસેનાના હિન્દી મુખપત્ર ‘દોપહર કા સામના’ના સંપાદક હતા. સીએમ શિંદેએ સંજય નિરુપમને કહ્યું કે હું તમારો વિશ્વાસ તૂટવા નહીં દઉં.

મહત્વનું છે કે, વર્ષ 2005 માં, સંજય નિરુપમ કોંગ્રેસમાં જોડાયા અને મહારાષ્ટ્ર પ્રદેશ કોંગ્રેસ સમિતિના મહાસચિવ તરીકે નિયુક્ત થયા હતા. તેમણે 2009ની ચૂંટણીમાં મુંબઈ ઉત્તર લોકસભા બેઠક જીતી હતી, જેમાં ભાજપના દિગ્ગજ નેતા રામ નાઈકને સાંકડા અંતરથી હરાવ્યા હતા. તેમણે છેલ્લા 19 વર્ષમાં કોંગ્રેસમાં અનેક હોદ્દા પર કામ કર્યું છે.

દરમિયાન ગયા મહિને કોંગ્રેસે નિરુપમને અનુશાસનહીન અને પક્ષ વિરોધી નિવેદનોના આરોપમાં છ વર્ષ માટે હાંકી કાઢ્યા હતા. એજન્સી અનુસાર, મહારાષ્ટ્રના મુખ્યમંત્રી એકનાથ શિંદેએ તાજેતરમાં શિવસેનાના અધિકારીઓ સાથેની બેઠકની અધ્યક્ષતા કર્યા બાદ કહ્યું હતું કે સંજય નિરુપમ ટૂંક સમયમાં શિવસેનામાં જોડાશે.

આ પણ વાંચો: આગ્રામાં સ્વામી પ્રસાદ મૌર્ય પર યુવકે જૂતું ફેંક્યું, વીડિયો થયો વાયરલ