200 પાકિસ્તાનીઓ પણ બોલશે જય શ્રી રામ, અયોધ્યામાં રામલલાના આજે કરશે દર્શન

• પાકિસ્તાનથી સિંધી સમુદાયનું પ્રતિનિધિમંડળ રામલલાના દર્શન કરવા માટે અયોધ્યા પહોંચશે

નવી દિલ્હી, 3 મે: 200 પાકિસ્તાનીઓ આજે શુક્રવારે રામલલાના દર્શન કરવા અયોધ્યાની પવિત્ર ભૂમિ પર પહોંચી રહ્યા છે. પાકિસ્તાનથી સિંધી સમુદાયનું 200 સભ્યોનું પ્રતિનિધિમંડળ રામલલાના દર્શન કરવા માટે અયોધ્યા પહોંચશે. સિંધ પ્રાંતનું આ પ્રતિનિધિમંડળ ભારતની એક મહિનાની ધાર્મિક મુલાકાતે આવી રહ્યું છે અને પ્રયાગરાજથી રોડ માર્ગે અયોધ્યા પહોંચી રહ્યું છે. મળતી માહિતી મુજબ, સિંધી સમુદાયના 200 પાકિસ્તાની નાગરિકો આજે વહેલી સવારે અયોધ્યા પહોંચશે અને રામલલાના દર્શન કરશે.

ભારતમાંથી પણ સિંધી સમુદાયનું 150 સભ્યોનું પ્રતિનિધિમંડળ તેમની સાથે છે

મળતી માહિતી મુજબ, ભારતમાંથી સિંધી સમુદાયનું 150 સભ્યોનું પ્રતિનિધિમંડળ પણ તેમની સાથે પ્રવાસ કરી રહ્યું છે. શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાય તેમનું રામ કી પૌડી ખાતે સ્વાગત કરશે, જ્યાં પાકિસ્તાની પ્રતિનિધિમંડળ માટે એક વિશેષ કાર્યક્રમનું આયોજન કરવામાં આવ્યું છે. પ્રતિનિધિમંડળ પ્રયાગરાજથી બસ દ્વારા અયોધ્યા પહોંચશે. તેનું પહેલું સ્ટોપ ભારત કુંડ અને પછી ગુપ્તાર ઘાટ હશે.

અયોધ્યામાં ઉદાસીન ઋષિ આશ્રમ અને શબરી રસોઈમાં તેમના માટે વિશેષ વ્યવસ્થા કરવામાં આવી છે. પ્રતિનિધિમંડળ આજે શુક્રવારે  સાંજે રામ કી પૌડી ખાતે સરયુ આરતીમાં પણ હાજરી આપશે, જ્યાં ચંપત રાય સહિત રામ મંદિર ટ્રસ્ટના સભ્યો તેમનું સ્વાગત કરશે. અયોધ્યાથી પ્રતિનિધિમંડળ આજે શુક્રવારે રાત્રે લખનૌ માટે રવાના થશે, જ્યાંથી તેઓ રાયપુર જશે. કેન્દ્રની સ્વાયત્ત સંસ્થા નેશનલ સિંધી ડેવલપમેન્ટ કાઉન્સિલના સભ્ય વિશ્વ પ્રકાશ રૂપને જણાવ્યું હતું કે, પ્રતિનિધિમંડળ આજે શુક્રવારે વહેલી સવારે પ્રયાગરાજથી બસ દ્વારા અયોધ્યા પહોંચશે.

મળતી માહિતી મુજબ, અયોધ્યાના સિંધી ધામ આશ્રમમાં પાકિસ્તાની પ્રતિનિધિમંડળ માટે એક ખાસ કાર્યક્રમનું પણ આયોજન કરવામાં આવ્યું છે, જ્યાં દેશભરના ઘણા સિંધી સંગઠનો તેમનું સ્વાગત કરશે. તેમની સાથે રાયપુરના સંત સદા રામ દરબારના વડા ડૉ. યુધિષ્ઠિર લાલ પણ છે. અયોધ્યાથી પ્રતિનિધિમંડળ શુક્રવારે રાત્રે લખનૌ માટે રવાના થશે, જ્યાંથી તે રાયપુર જશે.

આ પણ જુઓ: રાષ્ટ્રપતિ દ્રૌપદી મુર્મુએ અયોધ્યામાં રામલલાના દર્શન કરી ધન્યતા અનુભવી