કોલંબિયામાં સર્જાઈ મોટી દુર્ઘટના, આર્મીનું હેલિકોપ્ટર ક્રેશ થતાં 9 સૈનિકોના દુ:ખદ મૃત્યુ

બોગોટા (કોલંબિયા), 30 એપ્રિલ: નોર્ધન કોલંબિયામાં એક દુ:ખદ ઘટના બની છે. અહીં સૈનિકો માટે સામાન લઈ જતું સેનાનું હેલિકોપ્ટર ગ્રામીણ વિસ્તારમાં ક્રેશ થયું હતું. આ દુર્ઘટનામાં હેલિકોપ્ટરમાં સવાર નવ જવાનો શહીદ થયા હતા. કોલંબિયાના સૈન્યએ એક નિવેદનમાં જણાવ્યું હતું કે હેલિકોપ્ટર સાન્ટા રોઝા ડેલ સુરની નગરપાલિકામાં સૈનિકો માટે પુરવઠો લઈ જઈ રહ્યું હતું. હાલ અકસ્માતનું કારણ જાણવા મળ્યું નથી. જ્યાં હેલિકોપ્ટર ક્રેશ થયું તે વિસ્તારમાં તાજેતરમાં નેશનલ લિબરેશન આર્મી ગેરિલા જૂથ અને ગલ્ફ ક્લાન તરીકે ઓળખાતી ડ્રગ હેરફેર કરતી ગેંગ વચ્ચે લડાઈ જોવા મળી હતી.

સેનાએ હેલિકોપ્ટર ક્રેશને અકસ્માત જાહેર કર્યો

સેનાએ હેલિકોપ્ટર ક્રેશને અકસ્માત જાહેર કર્યો છે. સેનાના આ નિવેદન બાદ સ્પષ્ટ થઈ ગયું છે કે હેલિકોપ્ટર પર કોઈ પ્રકારનો હુમલો થયો નથી. કોલંબિયાના પ્રમુખ ગુસ્તાવો પેટ્રોએ સોમવારે X પરની એક પોસ્ટમાં જણાવ્યું હતું કે, લશ્કરી હેલિકોપ્ટર પર સવાર નવ સૈનિકોના મૃત્યુનો ખેદ છે. ગલ્ફ ક્લૈન વિરુદ્ધ ઑપરેશન ચાલુ હતું ત્યારે હેલિકોપ્ટરે સૈનિકોને સામાન સપ્લાય કરવા માટે ઉડાન ભરી હતી. સેનાએ જણાવ્યું હતું કે, સ્થાનિક સમય અનુસાર બપોરે 1:50 વાગ્યે હેલિકોપ્ટર ક્રેશ થવાની ઘટના બની હતી.

તપાસના આદેશો જારી કર્યા છે

સેનાના જણાવ્યા અનુસાર, તે Mi-17 રશિયન બનાવટનું હેલિકોપ્ટર હતું. તેનો ઉપયોગ ઘણીવાર સૈનિકો તેમજ પુરવઠાના પરિવહન માટે થતો હતો. અકસ્માત એટલો ભયાનક હતો કે હેલિકોપ્ટરમાં સવાર સૈનિકોમાંથી એક પણ બચ્યો ન હતો. અકસ્માતની તપાસના આદેશ આપવામાં આવ્યા છે.

આ પણ વાંચો: મલેશિયામાં 2 સૈન્ય હેલિકોપ્ટર હવામાં અથડાયા: 10 લોકોના મૃત્યુ, જુઓ વીડિયો