‘બાહ્ય મણિપુર’માં છ પોલિંગ બૂથ પર કડક સુરક્ષા વચ્ચે આજે પુન:મતદાન

ઇમ્ફાલ (મણિપુર), 30 એપ્રિલ: 30મી એપ્રિલે એટલે કે આજે ‘આઉટર મણિપુર’ લોકસભા મતવિસ્તારના છ પોલિંગ બૂથ પર કડક સુરક્ષા વચ્ચે પુનઃ મતદાન યોજાઈ રહ્યું છે. અધિકારીઓના જણાવ્યા અનુસાર, 26 એપ્રિલના રોજ આ છમાંથી ચાર મતદાન મથકો પર મતદાન પૂર્ણ થાય તે પહેલા જ અજાણ્યા વ્યક્તિઓ દ્વારા EVM અને VVPAT ને નુકસાન પહોંચાડવામાં આવ્યું હતું, જ્યારે એક મતદાન મથક પર EVMમાં ખામી સર્જાતા ત્યાં મતદાન થઈ શક્યું નથી. તેમજ અન્ય એક પોલિંગ બૂથ પર અજાણ્યા બદમાશો દ્વારા ધાકધમકી આપતા અને હંગામો મચાવવાના કારણે ત્યાં પણ મતદાન પૂર્ણ થઈ શક્યું ન હતું. આ ચોથી વાર છે જ્યારે રાજ્યમાં મતદાન થઈ રહ્યું હોય.

આજે સાંજે 4 વાગ્યા સુધી થશે મતદાન

આજે સવારે 7 થી 4 વાગ્યા સુધી પુન: મતદાન થશે. ઉખરુલ, ચિંગાઈ અને ખારોંગ વિધાનસભા ક્ષેત્રના મતદાન મથકો પર ગડબડની જાણ થઈ હતી. ચૂંટણી પંચે 26 એપ્રિલે મતદાન દરમિયાન કહ્યું હતું કે EVM એટલી હદે ખરાબ થઈ ગયા છે કે પરિણામ આવી શક્યા નથી. મણિપુરના મુખ્ય ચૂંટણી અધિકારીના કાર્યાલય દ્વારા જારી કરાયેલ એક સૂચનામાં કહેવામાં આવ્યું છે કે ઉખરુલ વિધાનસભા ક્ષેત્રમાં ચાર પોલિંગ બૂથ અને ઉખરુલ અને સેનાપતિના કરોંગમાં ચિંગાઈ વિધાનસભા ક્ષેત્રમાં એક-એક મતદાન મથક પર મતદાન રદ જાહેર કરવામાં આવ્યું છે.

લોકસભા ચૂંટણીના બીજા તબક્કામાં 26 એપ્રિલે, ‘આઉટર મણિપુર’ સંસદીય સીટ હેઠળ આવતા 28માંથી 13 વિધાનસભા મતવિસ્તારો માટેના મતદાન દરમિયાન, 4.84 લાખ મતદારોમાંથી લગભગ 76.06 ટકા મતદારોએ તેમના મતાધિકારનો ઉપયોગ કર્યો હતો. પ્રથમ તબક્કા દરમિયાન 19 એપ્રિલે ‘આઉટર મણિપુર’ લોકસભા સીટ હેઠળ આવતા 15 વિધાનસભા મતવિસ્તારો તેમજ ‘ઇનર મણિપુર’ સંસદીય સીટ હેઠળ આવતા 32 વિધાનસભા મતવિસ્તારોમાં મતદાન થયું હતું.

આ પણ વાંચો: મુસ્લિમો મતદાન ન કરી શકે તેવી વ્યવસ્થા ઉભી કરાઈ, CM મમતાનો આરોપ