નવી દિલ્હી, 29 એપ્રિલ : છત્તીસગઢના બેમેતારા જિલ્લામાં એક ભયાનક માર્ગ અકસ્માત થયો છે. એક માલસામાન વાહન અને મિની ટ્રક વચ્ચે ટક્કર થઈ હતી. આ દુર્ઘટનામાં પાંચ મહિલાઓ અને ત્રણ બાળકો સહિત નવ લોકોના મોત થયા હતા. જ્યારે 23 લોકો ઘાયલ થયા છે. ઘાયલોને હોસ્પિટલમાં દાખલ કરવામાં આવ્યા છે. પોલીસે આજે સોમવારે વહેલી સવારે આ જાણકારી આપી હતી.
મળતી માહિતી મુજબ, આ અકસ્માત બેમેતારા પોલીસ સ્ટેશન વિસ્તારના કાઠિયા ગામમાં પેટ્રોલ પંપ પાસે થયો હતો. જણાવવામાં આવી રહ્યું છે કે રોડ કિનારે પાર્ક કરેલી મીની ટ્રક સાથે માલસામાનનું વાહન અથડાતા આ કરૂણ અકસ્માત સર્જાયો હતો. અકસ્માત રવિવારે મોડી રાત્રે કાઠિયા ગામ નજીક થયો હતો, એક વરિષ્ઠ પોલીસ અધિકારીએ જણાવ્યું હતું કે, જ્યારે પીડિતો પરિવારના કાર્યક્રમમાં હાજરી આપીને પરત ફરી રહ્યા હતા. અકસ્માતનો ભોગ બનેલા તમામ પાથરા ગામના રહેવાસીઓ તિરૈયા ગામમાં એક પારિવારિક કાર્યક્રમમાં હાજરી આપીને પરત ફરી રહ્યા હતા.
અધિકારીએ જણાવ્યું કે માલસામાનનું વાહન રસ્તાની બાજુમાં ઉભેલા એક મિની ટ્રક સાથે અથડાયું હતું. મૃતકોની ઓળખ ભૂરી નિષાદ (50), નીરા સાહુ (55), ગીતા સાહુ (60), અગાનિયા સાહુ (60), ખુશ્બુ સાહુ (39), મધુ સાહુ (5), રિકેશ નિષાદ (6) અને ટ્વિંકલ નિષાદ (6) તરીકે થઈ છે. એકની ઓળખ થવાની બાકી છે.
