દિલ્હી, 20 એપ્રિલ : ઈન્ડિયન પ્રીમિયર લીગ (IPL)ની 17મી સીઝનની મેચ નંબર-35માં, દિલ્હી કેપિટલ્સ (DC) અને સનરાઈઝર્સ હૈદરાબાદ (SRH) વચ્ચે મેચ છે. સનરાઇઝર્સ હૈદરાબાદે દિલ્હી કેપિટલ્સને જીતવા માટે 267 રનનો ટાર્ગેટ આપ્યો છે. સનરાઇઝર્સ હૈદરાબાદ તરફથી ટ્રેવિસ હેડે 89 રન બનાવ્યા હતા. જ્યારે શાહબાઝ અહેમદે 59 રનની અણનમ ઇનિંગ રમી હતી.
સનરાઇઝર્સ હૈદરાબાદની શરૂઆત ખૂબ જ તોફાની રહી હતી. તેણે માત્ર 5 ઓવરમાં 100થી વધુ રન બનાવ્યા. આઈપીએલના ઈતિહાસમાં ઓવરોની દ્રષ્ટિએ ટીમની આ સૌથી ઝડપી સદી હતી. આ દરમિયાન ટ્રેવિસ હેડે માત્ર 16 બોલમાં પોતાની ફિફ્ટી પૂરી કરી હતી. અભિષેક શર્મા 46 રન બનાવીને આઉટ થયો હતો અને પોતાની અડધી સદી પૂરી કરી શક્યો નહોતો.
હેડ અને અભિષેક વચ્ચે માત્ર 6.2 ઓવરમાં 131 રનની ભાગીદારી થઈ હતી. અભિષેકે 12 બોલની ઈનિંગમાં 2 ચોગ્ગા અને 6 છગ્ગા ફટકાર્યા હતા. અભિષેક શર્માને કુલદીપ યાદવે આઉટ કર્યો હતો. આ પછી કુલદીપે એડન માર્કરામનો પણ સસ્તામાં નિકાલ કર્યો હતો. ત્યારબાદ કુલદીપે ટ્રેવિસ હેડને પણ આઉટ કર્યો હતો, જે 32 બોલમાં 89 રન બનાવીને આઉટ થયો હતો. હેડે પોતાની તોફાની ઇનિંગમાં 11 ચોગ્ગા અને છ છગ્ગા ફટકાર્યા હતા.
