આ મતદાન મથક પર મહિલાઓનું 100 ટકા મતદાન! જાણો શું છે વાસ્તવિકતા

• એક મત મેળવવા બૂથ પોલિંગ ઓફિસર 40 કિમી પગપાળા ચાલીને પહોંચ્યા, અરુણાચલ પ્રદેશમાં આ બૂથ પર માત્ર એક જ મહિલાનું નામ નોંધાયેલું છે

અંજાવ, 20 એપ્રિલ: અરુણાચલ પ્રદેશના અંજાવ જિલ્લામાં સ્થિત એક બૂથ પર મતદાનનો અનોખો રેકોર્ડ બન્યો છે. આ બેઠક પર 100 ટકા મતદાન થયું છે. તમને જાણીને થોડું આશ્ચર્ય થશે પણ આ સત્ય છે. આ બૂથ માટે પોલિંગ ઓફિસર 40 કિમી પગપાળા ચાલીને પહોંચ્યા હતા. વાસ્તવમાં ચીનની સરહદે આવેલા અંજાવ જિલ્લાના માલોગામમાં એક મહિલા રહે છે. આ માટે ચૂંટણી અધિકારીઓએ મહિલાના ઘર પાસે બૂથ બનાવ્યું હતું. અધિકારીઓને બૂથ સુધી પહોંચવા માટે પગપાળા મુસાફરી કરવી પડી હતી.

આખા બૂથમાં માત્ર એક જ મતદાતા

લોકસભાના પ્રથમ તબક્કાનું મતદાન 19 એપ્રિલે થયું હતું. પ્રથમ તબક્કામાં દેશભરમાં કુલ 102 બેઠકો પર મતદાન થયું હતું. અરુણાચલ પ્રદેશમાં પણ પ્રથમ તબક્કામાં મતદાન થયું હતું. અહીં અંજાવ જિલ્લાના માલોગામમાં 44 વર્ષની મહિલા સોકેલા તયાંગ રહે છે. ચૂંટણી અધિકારીઓએ તેમના માટે અલગ મતદાન મથક બનાવ્યું હતું. ખાસ વાત એ છે કે આ મતદાન કેન્દ્ર પર માત્ર તે જ મતદાર તરીકે નોંધાયેલ છે.

મહિલાએ મતદાન કર્યા બાદ ચૂંટણી પંચનો આભાર માન્યો

મહિલા શુક્રવારે (19 એપ્રિલ) બપોરે 1 વાગે મતદાન કરવા પહોંચી હતી. તેમણે મતદાન કરતાંની સાથે જ આ બૂથ પર 100 ટકા મતદાન થયું હતું. આ પછી ચૂંટણી અધિકારીઓ ત્યાંથી ચાલ્યા ગયા હતા. મતદાન કર્યા બાદ સોકેલા તયાંગે કહ્યું, ‘હું મારા મતાધિકારનો ઉપયોગ કરીને ખુશ છું અને મને મતદાન કરવાની તક આપવા બદલ હું ચૂંટણી અધિકારીઓનો આભાર માનું છું.

અલગ મતદાન મથક કેમ બનાવાયું?

ચૂંટણી અધિકારીઓના જણાવ્યા અનુસાર માલોગામમાં બહુ ઓછા પરિવારો રહે છે અને તયાંગ સિવાયના તમામ મતદારો અન્ય મતદાન મથકો પર નોંધાયેલા છે પરંતુ તયાંગ અન્ય મતદાન મથકો પર મતદાન કરવા જવા તૈયાર ન હતી. મુખ્ય ચૂંટણી અધિકારી પવન કુમાર સૈને કહ્યું કે સંખ્યા હંમેશા મહત્વની નથી હોતી, પરંતુ દરેક નાગરિકનો અવાજ સંભળાય તે સુનિશ્ચિત કરવું જોઈએ. તેથી ચૂંટણી અધિકારીઓએ અહીં એક જ મતદાતા હોવા છતાં મતદાન મથક બનાવ્યું હતું. આ ગામ ચીન અને અરુણાચલ પૂર્વ લોકસભા બેઠકની સરહદે આવેલા અંજાવ જિલ્લાના હ્યુલિયાંગ વિધાનસભા મતવિસ્તારમાં આવે છે.

આ પણ વાંચો: પ્રથમ તબક્કામાં 102 બેઠક ઉપર નોંધાયું 60.03 % મતદાન