‘તમારા જેવા ઘણા આવ્યા અને ચાલ્યા ગયા, પરંતુ ભારત..’ સ્મૃતિ ઈરાનીનો રાહુલ ગાંધી પર પ્રહાર

• સ્મૃતિ ઈરાનીએ રામ મંદિરની પૂર્ણાહુતિના મહત્ત્વ પર ભાર મૂક્યો અને પશ્ચિમ બંગાળ તેમજ કેરળ જેવા રાજ્યોમાં બનેલી ઘટનાઓનો ઉલ્લેખ કર્યો

ચેન્નાઈ, 7 એપ્રિલ: તમિલનાડુની ચેન્નાઈ સેન્ટ્રલ સીટ પરથી ભાજપના ઉમેદવાર વિનોજ પી. સેલ્વમ માટે પ્રચાર કરતી વખતે કેન્દ્રીય મંત્રી અને ભારતીય જનતા પાર્ટી (ભાજપ)ના વરિષ્ઠ નેતા સ્મૃતિ ઈરાનીએ તેમના જૂના હરીફ રાહુલ ગાંધી અને કોંગ્રેસ સહિત વિપક્ષી પાર્ટીઓ પર જોરદાર પ્રહારો કર્યા હતા. સ્મૃતિ ઈરાનીએ રાહુલ ગાંધીની ટીકા કરતા કહ્યું કે, ‘ જો મારો અવાજ રાહુલ ગાંધી સુધી પહોંચે છે, તો હું તેમને કહેવા માંગુ છું કે તેમના જેવા ઘણા આવ્યા અને ચાલ્યા ગયા, પરંતુ હિંદુસ્તાન છે, હતું અને રહેશે.’ તેમણે અયોધ્યામાં રામ મંદિરની પૂર્ણાહુતિના મહત્ત્વ પર પણ ભાર મૂક્યો અને પશ્ચિમ બંગાળ તેમજ કેરળ જેવા રાજ્યોમાં બનેલી ઘટનાઓનો ઉલ્લેખ કર્યો, જ્યાં ‘જય શ્રી રામ’ ના નારાઓ સામે વિરોધ કથિત રીતે હિંસા તરફ દોરી ગયો હતો. સ્મૃતિ ઈરાનીએ છેલ્લી લોકસભા ચૂંટણીમાં કોંગ્રેસ નેતા રાહુલ ગાંધીને તેમના પરિવારના ગઢ અમેઠીમાં હરાવ્યા હતા. તે વખતે પણ તેમણે દાવો કર્યો હતો કે, કોંગ્રેસના સાંસદ આ વખતે પણ વાયનાડ બેઠક પરથી ચૂંટણી હારવાના છે.

કેન્દ્રીય મંત્રી સ્મૃતિ ઈરાનીએ વધુમાં શું જણાવ્યું?

સ્મૃતિ ઈરાનીએ વધુમાં કહ્યું કે, ‘આ દેશમાં એવા ઘણા રાજ્યો છે, જ્યાં INDI ગઠબંધનના સાથીઓએ ‘જય શ્રી રામ’ બોલવા પર લોકોને માર્યા છે. આવું પશ્ચિમ બંગાળ અને કેરળમાં થયું છે. આજે આ અમારું સૌથી મોટું સૌભાગ્ય છે કે અમે ભગવાન રામના ચરણોમાં માથું ટેકવીને અહીં ઊભા છીએ. તારીખ આપી દીધી, મંદિરનું નિર્માણ થયું અને ભગવાન રામનો મહિમા જુઓ કે ભગવાન રામ તેમના અસ્તિત્વને નકારનારાઓને પણ બોલાવ્યા.’ તેમણે અયોધ્યા રામ મંદિરના પ્રાણ પ્રતિષ્ઠા સમારોહમાં હાજરી ન આપવા બદલ કોંગ્રેસ અને વિપક્ષી INDI ગઠબંધનના અન્ય સભ્યોની પણ ટીકા કરી અને કહ્યું કે, ‘આ નેતાઓનો અહંકાર સ્પષ્ટ છે કારણ કે તેઓએ ભગવાન રામના નેતૃત્વને પણ નકારી કાઢ્યું છે. 22 જાન્યુઆરી 2024ના રોજ અયોધ્યામાં અભિષેક સમારોહ યોજાયો હતો.’

સ્મૃતિ ઈરાની ચૂંટણીના પ્રચાર માટે દક્ષિણના રાજ્યોનો પ્રવાસે

સ્મૃતિ ઈરાની, જે લોકસભા 2024ની ચૂંટણીના પ્રચાર માટે દક્ષિણના રાજ્યોનો પ્રવાસ કરી રહી છે, તે અગાઉ શુક્રવારે કેરળના વાયનાડમાં રાહુલ ગાંધીના વર્તમાન મતવિસ્તારમાં પહોંચી હતી, જ્યાં તેણીએ તેમની પરંપરાગત બેઠક – ઉત્તર પ્રદેશમાં અમેઠી માટે કંઈ કરવામાં નિષ્ફળ જવા બદલ ગાંધી પરિવારની ટીકા કરી હતી. આ સાથે તેમણે દાવો કર્યો કે, ‘જેમ રાહુલને અમેઠીમાંથી બહાર ફેંકવામાં આવ્યા હતા, આ વખતે વાયનાડમાં પણ એવું જ થશે.’ તમિલનાડુની તમામ 39 લોકસભા બેઠકો અને પુડુચેરીની એકમાત્ર બેઠક માટે પ્રથમ તબક્કામાં 19 એપ્રિલે મતદાન થશે. અને તેની મતગણતરી 4 જૂને થશે.

આ પણ વાંચો: આઝાદી પછી પહેલીવાર આ 24 ગામમાં નહીં થાય મતદાન, જાણો શું છે કારણ