રાજદ્વારી વિવાદ વચ્ચે ભારતે મદદનો હાથ લંબાવ્યો, માલદીવને મોકલી આવશ્યક ચીજવસ્તુઓ

માલે (માલદીવ), 06 એપ્રિલ: માલદીવ સાથે તણાવ છતાં ભારતે મદદનો હાથ લંબાવ્યો છે. ભારતે માલદીવમાં જરૂરી ચીજવસ્તુઓ મોકલવા માટે આવશ્યક ચીજવસ્તુઓની નિકાસ કરવાની મંજૂરી આપી છે. માલદીવના વિદેશ મંત્રી મુસા જમીર આ નિર્ણયથી ખૂબ જ ખુશ છે અને તેમણે ભારતનો આભાર માન્યો છે. ભારત દ્વારા જરૂરી ચીજવસ્તુઓ પૂરી પાડવા અંગે, માલદીવના વિદેશ મંત્રીએ કહ્યું કે ભારતે લાંબા સમયથી ચાલતી દ્વિપક્ષીય મિત્રતા અને વેપાર અને વાણિજ્યને વધુ વિસ્તૃત કરવા માટે પ્રતિબદ્ધતા દર્શાવી છે.

હું દિલથી તમારો આભાર માનું છું: માલદીવના વિદેશ મંત્રી

મુસા જમીરે X પર લખ્યું, હું 2024 અને 2025 દરમિયાન માલદીવને ભારતમાંથી આવશ્યક ચીજવસ્તુઓની આયાત કરવા સક્ષમ બનાવવા માટે વિદેશ મંત્રી એસ જયશંકર અને ભારત સરકારનો હૃદયપૂર્વક આભાર માનું છું.જમીરની પોસ્ટ પર ભારતીય વિદેશ મંત્રી એસ જયશંકરે પ્રતિક્રિયા આપી છે. તેમણે કહ્યું કે, ભારત તેની નેબરહુડ ફર્સ્ટ અને SAGAR નીતિઓ માટે મજબૂત પ્રતિબદ્ધ છે. સિક્યોરિટી એન્ડ ગ્રોથ ફૉર ઑલ ઇન ધ રિજન (SAGAR)એ હિંદ મહાસાગર ક્ષેત્રમાં દરિયાઇ સહયોગની ભારતની નીતિ અથવા સિદ્ધાંત છે.

વિવાદ પછી પણ રાષ્ટ્રપતિ સાથે મિત્રતા જાળવી હતી

ઉલ્લેખનીય છે કે નિકાસ ક્વોટા વધારવાને સરકારનો મોટો નિર્ણય માનવામાં આવી રહ્યો છે કારણ કે ગયા વર્ષે નવેમ્બરથી બંને દેશો વચ્ચે રાજદ્વારી વિવાદ ચાલી રહ્યો હતો. તે સમયે ચીન તરફી માલદીવના પ્રમુખ મોહમ્મદ મુઈઝ્ઝુએ ભારતને શપથ લીધાના કલાકોમાં જ પોતાના 88 સૈન્ય કર્મચારીઓને પાછા ખેંચવાની માંગ કરી હતી.

આ પણ વાંચો: માલદીવના પ્રમુખે ફરી ભારત વિરુદ્ધ ઝેર ઓકયું, જાસૂસી પર પ્રશ્ન સાંભળતા થયા ગુસ્સે