સાયબર-ગુલામ તરીકે 5000 ભારતીયો કમ્બોડિયામાં ફસાયા છે, તેમને બચાવવા સરકાર થઈ સક્રિય

• સરકારે આવા રેકેટ પર ચર્ચા કરીને કંબોડિયામાં ફસાયેલા 5,000થી વધુ ભારતીયોને પાછા લાવવાની વ્યૂહરચના ઘડી
• લાઓસમાં પણ 25 ભારતીય યુવાનો આવા જ કારણે ફસાયેલા છે 

નવી દિલ્હી, 29 માર્ચ: 5,000થી વધુ ભારતીયો કંબોડિયામાં ફસાયેલા છે, જ્યાં તેમને કથિત રીતે તેમની ઇચ્છા વિરુદ્ધ રાખવામાં આવ્યા છે અને ઘરે પાછા ફરવા માટે લોકો પર સાયબર છેતરપિંડી કરવા દબાણ કરવામાં આવી રહ્યું છે. સરકારનો અંદાજ છે કે, છેતરપિંડી કરનારાઓએ છેલ્લા છ મહિનામાં ભારતમાં ઓછામાં ઓછા રૂ. 500 કરોડની છેતરપિંડી કરી છે. આ મહિનાની શરૂઆતમાં, ગૃહ મંત્રાલય (MHA)એ વિદેશ મંત્રાલય (MEA), ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રાલય (Meity), ભારતીય સાયબર ક્રાઇમ કોઓર્ડિનેશન સેન્ટર (I4C) અને અન્ય સુરક્ષા નિષ્ણાતો સાથે બેઠક યોજી હતી અને કંબોડિયામાં ફસાયેલા ભારતીયોને બચાવવા માટે વ્યૂહરચના ઘડી હતી. આ પહેલા પણ આવો કિસ્સો બહાર આવ્યો છે જેમાં ભારતીયોને થાઈલેન્ડ લઈ જવાનું કહીને અને ત્યાં ઊંચા પગારની નોકરી આપવાના બહાને છેતરતી ગેંગ દ્વારા 25 યુવાનોને લાઓસ લઈ જવામાં આવ્યા હતા. આ ભારતીયોને લાઓસમાં સાયબર ક્રાઇમ કરવા માટે મજબૂર કરવામાં આવ્યા હતા.

આંતરરાષ્ટ્રીય ગેંગ દ્વારા ભારતીયોને ડરાવીને કરવામાં આવી રહી છે છેતરપિંડી 

સૂત્રમાંથી મળતી માહિતી મુજબ, આ બેઠકનો એજન્ડા આવા રેકેટ પર ચર્ચા કરવાનો અને ત્યાં ફસાયેલા લોકોને પાછા લાવવાનો હતો. ડેટા દર્શાવે છે કે ભારતમાં છેલ્લા છ મહિનામાં 500 કરોડ રૂપિયા (કંબોડિયામાં ઉદ્ભવતા સાયબર છેતરપિંડીથી) લૂંટાઈ ગયા છે. કંબોડિયામાં ફસાયેલા લોકોને ભારતમાં પાછા ફરવા માટે લોકોને આ પ્રકારની છેતરપિંડી કરવા માટેની ફરજ પાડવામાં આવી રહી છે અને કેટલાક કિસ્સાઓમાં, કાયદા અમલીકરણ અધિકારીઓ હોવાનો ઢોંગ કરીને અને તેમના પાર્સલમાં કેટલીક શંકાસ્પદ સામગ્રી મળી હોવાનું કહીને પૈસા પડાવવામાં આવી રહ્યા છે.

કેન્દ્રીય એજન્સીઓની તપાસમાં અત્યાર સુધી બહાર આવ્યું છે કે, એજન્ટો લોકોને જાળમાં ફસાવી રહ્યા છે, જેમાં મોટાભાગે દેશના દક્ષિણ ભારતમાં રહેતા લોકો સામેલ છે અને તેમને સાયબર છેતરપિંડી કરવા દબાણ કરતા પહેલા ડેટા એન્ટ્રીની નોકરીના બહાને કંબોડિયા મોકલવામાં આવી રહ્યા છે.

બેંગલુરુના ત્રણ લોકોને કંબોડિયાથી ભારત પરત લાવવામાં આવ્યા 

ગયા વર્ષે 30 ડિસેમ્બરના રોજ ઓડિશામાં રાઉરકેલા પોલીસે સાયબર-ક્રાઇમ સિન્ડિકેટનો પર્દાફાશ કર્યા પછી આ મામલો બહાર આવ્યો હતો, જેમાં લોકોને કમ્બોડિયા લઈ જવાના કથિત કૌભાંડમાં સંડોવાયેલા આઠ લોકોની ધરપકડ કરવામાં આવી હતી.

રાઉરકેલા પોલીસની કામગીરીની વિગતો શેર કરતાં, એક અધિકારીએ જણાવ્યું હતું કે, “આ કેસ કેન્દ્ર સરકારના એક વરિષ્ઠ અધિકારીની ફરિયાદ પર આધારિત છે, જેની સાથે આશરે 70 લાખ રૂપિયાની છેતરપિંડી કરવામાં આવી હતી. અમે દેશના જુદા-જુદા ભાગોમાંથી આઠ વ્યક્તિઓની ધરપકડ કરી છે અને અમારી પાસે આ કૌભાંડમાં સંડોવાયેલા ઘણા લોકો સામે પ્રથમદર્શી પુરાવા છે. અમે 16 લોકો સામે લુક આઉટ સર્ક્યુલર જારી કર્યું છે, જેના પગલે બ્યુરો ઑફ ઇમિગ્રેશને આ અઠવાડિયે હૈદરાબાદ એરપોર્ટ પર કંબોડિયાથી પાછા ફરી રહેલા બે વ્યક્તિઓ, હરીશ કુરાપતિ અને નાગા વેંકટા સોજાન્યા કુરાપતિની અટકાયત કરી છે.”

અગાઉ પણ 25 ભારતીયોને થાઈલેન્ડ લઈ જવાનું કહી લાઓસ લઈ જવામાં આવ્યા!

અગાઉ પણ ભારતીયોને થાઈલેન્ડ લઈ જઈને નોકરી આપવાના બહાને તેઓ સાથે છેતરપિંડી કરતી ગેંગનો મુંબઈ પોલીસે પર્દાફાશ કર્યો હતો. જેમના પર આરોપ હતો કે, તેઓ ઊંચા પગારની નોકરીની લાલચ આપીને 25 યુવાનોને થાઈલેન્ડનું કહીને લાઓસ લઈ ગયા હતા અને આ ભારતીયોને ત્યાં લઈ જઈને સાયબર ક્રાઇમ કરવા માટે મજબૂર કર્યા હતા. પોલીસે કહ્યું હતું કે, આ કેસમાં જેરી જેકબ અને તેના પાર્ટનર ગોડફ્રે અલ્વારેસની ધરપકડ કરવામાં આવી હતી. જ્યારે પોલીસ FIRમાં સની નામના અન્ય એજન્ટનું પણ નામ સામેલ હતું.

આ પણ જુઓ: ચૂંટણી અને કેજરીવાલ પર UNની ટિપ્પણી: આશા છે કે દરેકના અધિકારોનું રક્ષણ થશે