દિલ્હીના સીએમ અરવિંદ કેજરીવાલની તબિયત લથડી, શુગર લેવલ ઘટીને 46 થયું

• દિલ્હીના સીએમ અરવિંદ કેજરીવાલનું શુગર લેવલ સતત ઉપર અને નીચે જઈ રહ્યું છે
• હાલ કેજરીવાલનું શુગર લેવલ 46 સુધી ઘટી ગયું, ડૉક્ટર્સનું કહેવું છે કે શુગર લેવલ આટલું ઓછું થઈ જવું એ ખૂબ જ ખતરનાક

દિલ્હી, 27 માર્ચ: દિલ્હીના મુખ્યમંત્રી અરવિંદ કેજરીવાલની તબિયત લથડી છે. સૂત્રોના જણાવ્યા અનુસાર ઇડીની કસ્ટડીમાં અરવિંદ કેજરીવાલની તબિયત બગડી છે. તેમનું શુગર લેવલ સતત ઉપર અને નીચે જઈ રહ્યું છે. સીએમ કેજરીવાલનું શુગર લેવલ ઘટીને 46 થઈ ગયું છે. ડૉક્ટર્સનું કહેવું છે કે શુગર લેવલ આટલું ઓછું થઈ જવું એ ખૂબ જ ખતરનાક છે.

આ પહેલા બુધવારે સીએમ કેજરીવાલની પત્ની સુનીતા કેજરીવાલે એક વીડિયો જાહેર કરીને કહ્યું હતું કે તે મંગળવારે સાંજે જેલમાં પોતાના પતિને મળવા ગઈ હતી. તેમને ડાયાબિટીસ છે, સુગર લેવલ બરાબર નથી, પણ તેનો નિશ્ચય મજબૂત છે. તેઓ ખૂબ જ સાચા દેશભક્ત નીડર અને હિંમતવાન વ્યક્તિ છે. તેમને લાંબા આયુષ્ય, આરોગ્ય અને સફળતાની શુભેચ્છા. તેમણે કહ્યું છે કે મારું શરીર જેલમાં છે. પરંતુ, આત્મા તમારા બધાની વચ્ચે છે. જો તમે તમારી આંખો બંધ કરશો, તો તમે મને તમારી આસપાસ અનુભવશો.

અરવિંદ કેજરીવાલ 28 માર્ચે કરશે મોટો ખુલાસો: સુનીતા કેજરીવાલ

આ સિવાય સુનીતા કેજરીવાલે કહ્યું કે એન્ફોર્સમેન્ટ ડિરેક્ટોરેટના વિવિધ દરોડામાં એક પણ પૈસો મળ્યો નથી અને તેમના પતિ 28 માર્ચે કોર્ટમાં કથિત એક્સાઇઝ પોલિસી કૌભાંડમાં ‘મોટો ખુલાસો’ કરશે. આમ આદમી પાર્ટી (AAP) ના રાષ્ટ્રીય સંયોજક કેજરીવાલની ED દ્વારા 21 માર્ચે એક્સાઇઝ પોલિસી સંબંધિત મની લોન્ડરિંગ કેસમાં ધરપકડ કરવામાં આવી હતી અને કોર્ટે તેમને 28 માર્ચ સુધી એજન્સીની કસ્ટડીમાં મોકલી દીધા હતા.

સુનીતા કેજરીવાલે કહ્યું કે તેમના પતિ 28 માર્ચે દારુ કૌભાંડનું સત્ય કહેશે અને પુરાવા પણ રજૂ કરશે. તેમણે વધુમાં કહ્યું કે, ‘બે વર્ષની તપાસ છતાં, ED પુરાવાનો એક પૈસો પણ શોધી શક્યું નથી. તેઓએ મુખ્યમંત્રીના આવાસ પર દરોડા પાડ્યા પરંતુ માત્ર 73,000 રૂપિયા જ મળ્યા.’ સુનીતા કેજરીવાલે કહ્યું, ‘મારા પતિએ કસ્ટડીમાં હતા ત્યારે જળ મંત્રી આતિષીને સૂચના આપી હતી. આ અંગે કેન્દ્રને સમસ્યા હતી. શું તેઓ દિલ્હીને નષ્ટ કરવા માગે છે? તેમણે કહ્યું કે તેના પતિ આ મુદ્દે ખૂબ જ દુઃખી છે.

આ પણ વાંચો: કેજરીવાલ કોર્ટમાં કહેશે કથિત દારૂ કૌભાંડના પૈસા ક્યાં છે, પુરાવા પણ આપશેઃ પત્ની સુનીતા