ટાટા, મારુતિ અને મહિન્દ્રા લોન્ચ કરશે નવા ઇલેક્ટ્રિક વાહનો, તેમાં SUV પણ હશે સામેલ

અમદાવાદ, 27 માર્ચ : ઇલેક્ટ્રિક વાહનો ખરીદવાની તૈયારી કરી રહેલા લોકો માટે સારા સમાચાર છે . દેશની મોટી ઓટો કંપનીઓ ઘણા નવા ઇલેક્ટ્રિક વાહનો લોન્ચ કરવાની તૈયારીમાં છે. ઓટોમોબાઈલ સેક્ટરમાં, મારુતિ સુઝુકી, હ્યુન્ડાઈ, મહિન્દ્રા એન્ડ મહિન્દ્રા અને ટાટા મોટર્સ જેવી મોટી કંપનીઓ વિવિધ સેગમેન્ટની માંગને પહોંચી વળવા નવા EV મોડલ લોન્ચ કરવાની તૈયારી કરી રહી છે. મહિન્દ્રા એન્ડ મહિન્દ્રાના ચીફ એક્ઝિક્યુટિવ ઓફિસર (CEO) ઓટોમોબાઈલ સેક્ટર નલિનીકાંત ગોલાગુંટાએ જણાવ્યું હતું કે કંપની આગામી વર્ષોમાં પાંચ નવા બેટરી ઇલેક્ટ્રિક વાહનો રજૂ કરશે. તે જાન્યુઆરી 2025થી શરૂ થશે. આ ઇલેક્ટ્રિક સ્પોર્ટ્સ યુટિલિટી વ્હીકલ (SUVs) મહિન્દ્રાના નવીન INGLO પ્લેટફોર્મ પર બનાવવામાં આવશે. તેમજ તેનું લક્ષ્ય વિવિધ શ્રેણી દ્વારા ગ્રાહકોના વિવિધ સેગમેન્ટને પૂરા કરવાનો છે. આ SUVને લોન્ચ કરવાનો હેતુ ઇલેક્ટ્રિક વાહન સેગમેન્ટમાં તેની સ્થિતિ મજબૂત કરવાનો છે. 2027 સુધીમાં, તેના પોર્ટફોલિયોના 20 થી 30 ટકા ઇલેક્ટ્રિક વાહનો હશે.

મારુતિ 550 કિમીની રેન્જ સાથે EV લોન્ચ કરશે

મારુતિ સુઝુકી ઈન્ડિયા (MSI)ના એક્ઝિક્યુટિવ ઓફિસર (કોર્પોરેટ અફેર્સ) રાહુલ ભારતીએ જણાવ્યું હતું કે અમે ઈલેક્ટ્રિક વ્હીકલ સેક્ટરમાં ભારે રોકાણ કરી રહ્યા છીએ.તેમજ, અમે નાણાકીય વર્ષ 2024-25માં 550 કિમીની રેન્જ સાથે EVના સ્વરૂપમાં નવા ડિઝાઈન કરેલા હાઈ-સ્પેક ઇલેક્ટ્રિક વાહનનું ઉત્પાદન શરૂ કરીશું. આગામી સાત-આઠ વર્ષમાં અમારી પાસે છ ઇલેક્ટ્રિક વાહનો હશે. સાથે જ, કાર્બન અને ક્રૂડ ઓઈલની આયાતમાં ઘટાડો કરવા માટે દેશને હાઈબ્રિડ-ઈલેક્ટ્રિક, CNG, બાયો-CNG, ઈથેનોલ ફ્લેક્સ ફ્યુઅલ વગેરે જેવી ઘણી વધુ ટેક્નોલોજીની જરૂર પડશે. અમે આવી તમામ ટેક્નોલોજીઓ પર પણ કામ કરવા માટે પ્રતિબદ્ધ છીએ.

EV નો માર્કેટ શેર 2030 સુધીમાં 20 ટકા થશે

હ્યુન્ડાઈ મોટર ઈન્ડિયાના ચીફ ઓપરેટિંગ ઓફિસર (સીઓઓ) તરુણ ગર્ગે જણાવ્યું હતું કે અમે 2019માં સંપૂર્ણ સુવિધાયુક્ત લાંબા-રેન્જની SUV ‘Kona’ને લૉન્ચ કરનાર દેશમાં પ્રથમ OEM પૈકીના એક છીએ. ગયા વર્ષે કંપનીએ તેની પ્રીમિયમ ઇલેક્ટ્રિક SUV IONIQ 5 રજૂ કરી હતી. તેમજ, ઉદ્યોગના ઘણા અંદાજો અનુસાર, 2030 સુધીમાં ભારતના વાહન બજારમાં EVsનો હિસ્સો લગભગ 20 ટકા સુધી પહોંચી જશે. સાથે જ, અમને વિશ્વાસ છે કે ઈલેક્ટ્રિક વાહનો ટૂંક સમયમાં મુખ્ય પ્રવાહનો ભાગ બનશે. કંપની આગામી 10 વર્ષમાં તમિલનાડુમાં રૂ. 26,000 કરોડનું રોકાણ કરવાની યોજના ધરાવે છે. આ રોકાણમાં રાજ્યમાં બેટરી એસેમ્બલી પ્લાન્ટ સ્થાપવાનો પણ સમાવેશ થાય છે.

ટાટા ઇલેક્ટ્રિક મોડલના વાહનોની સંખ્યા વધારીને 10 કરશે

ટાટા મોટર્સના પ્રવક્તાએ જણાવ્યું હતું કે કંપની 2026 સુધીમાં તેના ઈલેક્ટ્રિક મોડલની સંખ્યા 10 સુધી લઈ જવાનું લક્ષ્ય રાખે છે. કંપની કર્વ ઇવી અને હેરિયર ઇવી સહિત ચાર વધુ EV મોડલ રજૂ કરવાની યોજના ધરાવે છે. લક્ઝરી વ્હિકલ કંપનીઓ પણ ઈવી સેક્ટરમાં રસ દાખવી રહી છે. મર્સિડીઝ-બેન્ઝ ઈન્ડિયાના પ્રવક્તાએ કહ્યું કે અમે 2024માં 12 નવી પ્રોડક્ટ્સ લોન્ચ કરવાની યોજના બનાવીએ છીએ. આમાંથી ત્રણ નવા બેટરી ઇલેક્ટ્રિક વાહનો (BEVs) હશે.

આ પણ વાંચો : અટલ પેન્શન યોજનાઃ નિર્મલા સીતારમણ અને જયરામ રમેશ વચ્ચે શબ્દ યુદ્ધ