આ દરગાહ બની કોમી એકતાની મિસાલ, હિન્દુ-મુસ્લિમો એકસાથે મળીને રમે છે હોળી

બારાબંકી (ઉત્તર પ્રદેશ), 25 માર્ચ: ઉત્તર પ્રદેશના બારાબંકીના સૂફી સંત હાજી વારિસ અલી શાહની દરગાહની હોળી વિશ્વભરમાં પ્રખ્યાત છે. આ મજાર એ હકીકતનું ઉદાહરણ છે કે રંગોનો કોઈ ધર્મ હોતો નથી, રંગોની સુંદરતા દરેકને આકર્ષે છે. આ જ કારણ છે કે દર વર્ષની જેમ આ વખતે પણ તમામ ધર્મના લોકોએ સાથે મળીને ગુલાલ અને ગુલાબની હોળી રમી હતી. લોકોએ એકબીજાને રંગ-ગુલાલ લગાવીને ફૂલોથી હોળી રમી હતી અને ભાઈચારાનું એક અનોખું ઉદાહરણ રજૂ કર્યું હતું.

વર્ષોથી દરગાહમાં રમાઈ છે હોળી

મળતી માહિતી મુજબ બારાબંકીના દેવા સ્થિત સૂફી સંત હાજી વારિસ અલી શાહની કબરનું નિર્માણ તેમના હિન્દુ મિત્ર રાજા પંચમ સિંહે કરાવ્યું હતું. સૂફી સંત હાજી વારિસ અલી શાહે સંદેશો આપ્યો હતો કે, રબ જ રામ છે. કદાચ તેથી જ માત્ર હોળી જ નહીં, પરંતુ આ સ્થાન મકબરાના નિર્માણના સમયથી હિન્દુ-મુસ્લિમ એકતાનો સંદેશો આપતું રહ્યું છે. આ સમાધિ પર મુસ્લિમ સમુદાય કરતાં હિન્દુ સમુદાયના લોકો ઘણી મોટી સંખ્યામાં આવે છે.

આ દરગાહ પર હોળી રમવાની પરંપરા હાજી વારિસ અલી શાહના સમયમાં શરૂ થઈ હતી, જે આજે પણ ચાલુ છે. તે સમયે હોળીના દિવસે હાજી વારિસ અલી શાહ બાબાના ચાહકો ગુલાલ અને ગુલાબના ફૂલ લાવીને તેમના ચરણોમાં મૂકી હોળી રમતા હતા. ત્યારથી, હોળીના દિવસે લોકો અહીં કોમી એકતા ગેટથી વાજતે-ગાજતે જુલુસ કાઢે છે. દર વર્ષની જેમ આ જુલુસ દેવા નગરમાંથી પસાર થઈ દરગાહ પહોંચ્યું હતું. જેમાં દરેક ધર્મના લોકો જોડાયા હતા.

હોળી રમીને ભાઈચારાનું એક અનોખું ઉદાહરણ રજૂ કર્યું

આ પ્રસંગે દેવા શરીફમાં આવેલા લોકોએ જણાવ્યું કે અહીં હોળી રમવાની પરંપરા સેંકડો વર્ષો પહેલા બ્રિટિશ સરકારના સમયથી ચાલી આવે છે. અહીં ગુલાલ અને ગુલાબથી હોળી રમવામાં આવે છે. હોળીના દિવસે દેશના ખૂણે-ખૂણેથી દરેક ધર્મના લોકો અહીં આવે છે અને એકબીજાને રંગો અને ગુલાલ ઉડાડીને ભાઈચારાનું ઉદાહરણ સ્થાપિત કરે છે. તે જ સમયે, દેવાની વારસી હોળી સમિતિના અધ્યક્ષ શહજાદે આલમ વારસીએ કહ્યું કે, દરગાહ પર લાંબા સમયથી હોળી થઈ રહી છે, તેમાં તમામ ધર્મના લોકો સામેલ છે. અહીં ઘણા ક્વિન્ટલ ગુલાલ અને ગુલાબ સાથે હોળી રમવામાં આવે છે.

આ પણ વાંચો: 80 વર્ષથી નથી રમાતી આ ગામમાં રંગોની હોળી, જાણો શું છે તેની પાછળનું કારણ