BJP અધ્યક્ષ જેપી નડ્ડાની પત્નીની ફોર્ચ્યુનર કાર ચોરાઈ

• બીજેપી અધ્યક્ષ જેપી નડ્ડાની પત્નીની કાર ચોરાઈ ગઈ
• કાર દક્ષિણ પૂર્વ દિલ્હીના ગોવિંદપુરી વિસ્તારમાંથી ચોરાઈ

દિલ્હી, 25 માર્ચ: બીજેપી અધ્યક્ષ જેપી નડ્ડાની પત્નીની કાર ચોરાઈ ગઈ છે. કહેવામાં આવી રહ્યું છે કે આ વાહન દક્ષિણ પૂર્વ દિલ્હીના ગોવિંદપુરી વિસ્તારમાંથી ચોરાયું હતું. કારના ડ્રાઈવરે કારને ગોવિંદપુરીના સર્વિસ સેન્ટરમાં આપી હતી અને ત્યાર બાદ તે પોતાના ઘરે જમવા ગયો હતો, ત્યારે અચાનક કોઈએ તે કારની ચોરી કરી હતી. આ પછી, માહિતી મળતા જ દિલ્હી પોલીસે સીસીટીવી ફૂટેજ જોયા અને કારને ગુરુગ્રામ તરફ જતી જોઈ. પરંતુ હજુ સુધી કારનો કોઈ પત્તો મળ્યો નથી. આ ઘટના 19 માર્ચે બપોરે 3 થી 4 વાગ્યાની વચ્ચે બની હતી.

સર્વિસ સેન્ટરમાંથી ફોર્ચ્યુનરની ચોરી

માહિતી મળી છે કે જેપી નડ્ડાની પત્નીની કારનો નંબર હિમાચલનો છે. જેપી નડ્ડા મૂળ હિમાચલ પ્રદેશના છે. કારના ચાલકે કાર સર્વિસ સેન્ટરમાં પાર્ક કરી હતી અને પોતાના ઘરે જમવા ગયો હતો. પરંતુ જ્યારે તે પાછો આવ્યો ત્યારે કાર ત્યાં હતી જ નહીં. આ કેસ હાઈપ્રોફાઈલ વ્યક્તિ સાથે સંબંધિત હોવાને કારણે દિલ્હી પોલીસ મુશ્કેલીમાં મુકાઈ છે. જેપી નડ્ડાની પત્નીની ફોર્ચ્યુનર કાર સર્વિસ સેન્ટરમાંથી ચોરાઈ હોવાની માહિતી મળી છે. આ કારનો નંબર HP-03-D-0021 છે. કારનો રંગ સફેદ છે. આ મામલામાં ડ્રાઈવર જોગીન્દરની ફરિયાદ પર FIR નોંધવામાં આવી છે અને પોલીસ કારની શોધમાં વ્યસ્ત છે. મળતી માહિતી પ્રમાણે કાર ચોરીની ઘટના 19 માર્ચે બની હતી.

દિલ્હી-એનસીઆરમાં દર 14 મિનિટે 1 વાહનની થાય છે ચોરી

ઉલ્લેખનીય છે કે દેશની રાજધાની દિલ્હીમાં વાહન ચોરીની ઘટનાઓ પર પોલીસ કાબૂ મેળવી શકી નથી. થોડા સમય પહેલા, વાહન ચોરી અંગેના અહેવાલમાં જણાવવામાં આવ્યું હતું કે દિલ્હી-એનસીઆરમાં દર 14 મિનિટે એક વાહન ચોરી થાય છે. એ જ રીતે, ACKO, એક વીમા એજન્સીએ પણ થોડા દિવસો પહેલા વાહન ચોરીની ઘટનાઓ પર આધારિત તેની ‘થેફ્ટ એન્ડ ધ સિટી 2024’ની બીજી આવૃત્તિ બહાર પાડી હતી, જેમાં કહેવામાં આવ્યું છે કે ભારતમાં વાહન ચોરીના બનાવો 2022 અને 2023 વચ્ચે 2.5% નો વધારો થયો છે.

આ પણ વાંચો: બેંગલુરુના ટ્રાફિકમાં ફસાયા તો રસ્તા પર ઊભા રહીને શરૂ કરી મીટિંગ, પોસ્ટ થઈ વાયરલ