જ્હોન અબ્રાહમ સ્ટારર ‘વેદા’નું દમદાર ટીઝર રીલીઝ, પહેલી વાર એક્શન મોડમાં શરવરી વાઘ

• ‘પઠાણ’માં જ્હોન અબ્રાહમ વિલનના પાત્રમાં જોવા મળ્યો હતો.  તેના આ પાત્રને ખૂબ જ પસંદ કરવામાં આવ્યું હતું. હવે તે ફરી એકવાર આગામી ફિલ્મ ‘વેદા’માં જબરજસ્ત એક્શન કરતો જોવા મળશે.

મુંબઈ, 19 માર્ચ, મંગળવારઃ ગયા વર્ષે રીલીઝ થયેલી શાહરૂખ ખાનની બ્લોકબસ્ટર ફિલ્મ ‘પઠાણ’માં જ્હોન અબ્રાહમ વિલનના પાત્રમાં જોવા મળ્યો હતો.  તેના આ પાત્રને ખૂબ જ પસંદ કરવામાં આવ્યું હતું. જ્હોને એક્શનથી ભરપૂર ફિલ્મમાં ચાહકોને ખૂબ જ પ્રભાવિત કર્યા છે, હવે તે ફરી એકવાર આગામી ફિલ્મ ‘વેદા’માં જબરજસ્ત એક્શન કરતો જોવા મળશે.

એક્શન-થ્રિલર છે વેદાનું ટીઝર

જ્હોન અબ્રાહમ અને શરવરી વાઘ સ્ટારર ફિલ્મ ‘વેદા’નું દમદાર ટીઝર આજે રીલીઝ થયું છે. ફિલ્મમાં જ્હોન અબ્રાહમ અને શરવરી વાઘ ફુલ એક્શન મોડમાં જોવા મળશે. તેની સાથે અભિનેત્રી તમન્ના ભાટિયાની પણ ઝલક જોવા મળી રહી છે. ટીઝર એક્શન-થ્રિલરથી ભરપૂર છે અને દર્શકોને રોમાંચની સફર કરાવવા સંપૂર્ણ તૈયાર છે. એક્શનની વાત કરીએ તો જ્હોન તેના ચાહકોને ક્યારેય નિરાશ કરતો નથી અને તે જ રીતે, અભિનેતા ફિલ્મ ‘વેદા’માં એક્શનનો ભરપૂર ડોઝ આપવા તૈયાર છે.

આ કલાકારો જોવા મળશે

ટીઝરની શરૂઆત વેદા નામની છોકરી એટલે કે શરવરી વાઘથી થાય છે, જે સિસ્ટમ સામે અવાજ ઉઠાવે છે અને પોતાના હક માટે લડવા અનેક મુશ્કેલીઓનો સામનો કરે છે. તો જ્હોન અબ્રાહમ તેના રક્ષક તરીકે સાથે જંગ લડતો જોવા મળશે. શરવરી આ ફિલ્મમાં પહેલીવાર એક્શન કરતી જોવા મળશે. આ ફિલ્મમાં અભિષેક બેનર્જી વિલનની ભૂમિકામાં છે. અભિનેતા આશિષ વિદ્યાર્થી પણ લાંબા સમય બાદ ફિલ્મમાં જોવા મળશે.

ફિલ્મ ક્યારે રીલીઝ થશે?

‘વેદા’ ફિલ્મને નિખિલ અડવાણીએ ડિરેક્ટ કરી છે. બીજી વખત જ્હોન અને નિખિલ એક સાથે કામ કરી રહ્યા છે. આ પહેલા નિખિલ અડવાણી દ્વારા નિર્દેશિત ફિલ્મ ‘બાટલા હાઉસ’ (2019)માં પણ જોન અબ્રાહમ લીડ રોલમાં હતો. જ્હોન-શરવરીની આ ફિલ્મ 12 જુલાઈ, 2024ના રોજ રીલીઝ થશે.

આ પણ વાંચોઃ વીર સાવરકર માટે રણદીપ હુડ્ડાનું ખતરનાક બોડી ટ્રાન્સફોર્મેશન, જુઓ ફોટા