ફેરનેસ ક્રીમ લગાવવાથી કિડની પર થાય છે ખરાબ અસર!

મહારાષ્ટ્ર, 12 માર્ચ : મહારાષ્ટ્રમાં ફેરનેસ ક્રીમના કારણે બે લોકોના સ્વાસ્થ્યને ગંભીર નુકસાન થયાના સમાચાર સામે આવ્યા છે. અલગ-અલગ કેસોમાં, એક મહિલા અને પુરુષે તેમના ચહેરા પર સફેદ રંગની ક્રીમ લગાવી, જેના પછી તેમના શરીર પર સોજો આવી ગયો. તપાસ કરતાં જાણવા મળ્યું કે ક્રીમના કારણે બંનેની કિડનીને પણ નુકસાન થયું છે.

ભારતમાં ફેરનેસ ક્રિમનું બજાર ઘણું મોટું છે અને આ પ્રકારની ક્રિમ લોકોમાં ખૂબ જ લોકપ્રિય છે. ઘણા લોકો તેમના રોજિંદા જીવનમાં સફેદ રંગની ક્રીમનો ઉપયોગ કરે છે. પરંતુ ફેરનેસ ક્રીમ સાથે જોડાયેલા બે ગંભીર કિસ્સા સામે આવ્યા છે જે આવી ક્રીમના ઉપયોગ પર સવાલો ઉભા કરે છે. મહારાષ્ટ્રના રાયગઢના બે લોકોને ફેરનેસ ક્રીમના ઉપયોગથી કિડનીની બીમારી થઈ છે. 24 વર્ષની એક યુવતી છેલ્લા 8 મહિનાથી ચહેરા પર ફેરનેસ ક્રીમ લગાવતી હતી. તેને સ્થાનિક ડોક્ટરે આ ક્રીમ વિશે જણાવ્યું હતું. એ જ રીતે 56 વર્ષીય એક પુરુષ પણ છેલ્લા 3-4 મહિનાથી ફેરનેસ ક્રીમ લગાવતો હતો. તેના વાળંદે તેને ગોરા થવા માટે આ ક્રીમ લગાવવાનું કહ્યું હતું.

ક્રીમ લગાવ્યા પછી શરીર ફૂલી જવું

બંને ક્રીમના લેબલ પર લખેલું હતું કે તેમાં કુદરતી ઘટકો છે. ક્રીમ લગાવ્યા બાદ દર્દીઓને સોજો આવવા લાગ્યો, ત્યારબાદ તેઓ સારવાર માટે નવી મુંબઈની મેડીકવર હોસ્પિટલમાં પહોંચ્યા. હોસ્પિટલના કિડની વિભાગના વડા ડૉ. અમિત લંગોટેએ જણાવ્યું હતું કે, ‘અમે જોયું કે બંને દર્દીઓના શરીરમાં સોજો હતો અને તેમના પેશાબમાં પ્રોટીનનું પ્રમાણ વધુ હતું. તેમજ અમને જાણવા મળ્યું કે તેને કિડની ફેઈલ થઈ ગઈ હતી અને NELL-1 એન્ટિજેન પણ મળી આવ્યો હતો. કિડનીમાં ચેહરાને ગોરા કરવા માટેના ઝેરીલા અને હેવી મેટલ્સ જોવા મળ્યા હતા. ડૉક્ટરે વધુમાં કહ્યું, આ પછી અમે તરત જ કેન્સર માટે પુરુષ દર્દીની તપાસ કરી. અમે જોયું કે દર્દીના લોહીમાં પારાની માત્રા વધુ હતી. અમે તેની સારવાર શરૂ કરી અને ત્યારબાદ તેના પેશાબમાં પ્રોટીનનું પ્રમાણ ઓછું થવા લાગ્યું અને તેની કિડની યોગ્ય રીતે કામ કરવા લાગી.

આ ઉપરાંત, એક અહેવાલમાં ડો. લંગોટેએ કહ્યું કે તેઓ મહિલા દર્દીની સારવાર પણ કરી રહ્યા છે. તેમણે કહ્યું, ‘મહિલા દર્દીની પણ NELL-1 એન્ટિજેન માટે પરીક્ષણ કરવામાં આવ્યું અને તેનો રિપોર્ટ પોઝિટિવ આવ્યો હતો. મહિલાએ જણાવ્યું કે તે સ્થાનિક ડોક્ટરની સલાહ પર વિદેશી ફેરનેસ ક્રીમ લગાવી રહી હતી, જેના કારણે તેના લોહીમાં પારાના સ્તરમાં વધારો થયો હતો. મહિલાની પણ સારવાર ચાલી રહી છે.

ફેરનેસ ક્રીમ વિશે ડૉક્ટરે ચેતવણી આપી

ડૉક્ટર કહે છે કે ઘણા લોકો એવા ક્રિમનો ઉપયોગ કરે છે જે એફડીએ (ફૂડ એન્ડ ડ્રગ એડમિનિસ્ટ્રેશન) દ્વારા મંજૂર નથી અને તેના પરિણામો ભોગવે છે. આ ક્રીમમાં પારો વધુ માત્રામાં હોય છે જે ત્વચામાં મેલાનોસાઇટ્સને દબાવી દે છે અને કાળા રંગને આછું કરે છે. ઘરે ક્રીમ બનાવતા લોકો, પારાના નુકસાનની ચિંતા કર્યા વગર તેમની ક્રીમમાં વિપુલ પ્રમાણમાં પારાનો ઉપયોગ કરે છે.

પારામાંથી બનેલી ફેરનેસ ક્રીમનો ઉપયોગ કિડની અને એકંદર આરોગ્ય પર પ્રતિકૂળ અસર કરે છે. તબીબોએ સલાહ આપી છે કે લોકોએ FDA દ્વારા માન્ય ક્રિમનો જ ઉપયોગ કરવો જોઈએ જેથી સ્વાસ્થ્ય પર કોઈ વિપરીત અસર ન થાય. જો કોઈ વ્યક્તિ ફેરનેસ ક્રીમ લગાવવા માંગે છે તો તેણે પહેલા કોઈ સારા ડૉક્ટરની સલાહ લેવી જોઈએ. ફેરનેસ ક્રીમની આડઅસરો વિશે પણ ડૉક્ટરને પૂછવું જોઈએ.

આ પણ વાંચો : ડાયાબિટીસના દર્દીઓને સવારમાં બ્લડ સુગર વધી જાય છે? તો નાસ્તામાં આ વસ્તુઓ ખાવાથી તરત જ રાહત મળશે