લગ્ન બાદ મા કામાખ્યા દેવીના દર્શન કરવા પહોંચ્યા રકુલ-જેકી, જુઓ ફોટોઝ

• તાજેતરમાં રકુલ-જેકીએ તેમના પરિવાર સાથે અમૃતસરના સુવર્ણ મંદિરમાં દર્શન કર્યા હતા. હવે આ નવદંપતી મા કામાખ્યા દેવીના દરબારમાં પહોંચી ગયા છે.

મુંબઈ, 7 માર્ચઃ ગયા મહિને અભિનેત્રી રકુલ પ્રીત સિંહ અને જેકી ભગનાનીના લગ્ન થયા હતા. ત્યારબાદ આ દંપતી જીવનની નવી શરૂઆત માટે ભગવાનના આશીર્વાદ મેળવવા તેમના શરણે પહોંચ્યા છે. તાજેતરમાં રકુલ-જેકીએ તેમના પરિવાર સાથે અમૃતસરના સુવર્ણ મંદિરમાં દર્શન કર્યા હતા. હવે આ નવદંપતી મા કામાખ્યા દેવીના દરબારમાં પહોંચી ગયા છે.

મા કામાખ્યા દેવીની શરણમાં રકુલ-જેકી

રકુલ પ્રીત સિંહ અને જેકી ભગનાની આસામના ગુવાહાટી સ્થિત મા કામાખ્યા દેવીના દર્શન કરવા પહોંચ્યા છે. કપલની સાથે તેમનો પરિવાર પણ જોવા મળ્યો હતો. મંદિરની મુલાકાત લેતા કપલની કેટલીક તસવીરો પણ સોશિયલ મીડિયા પર સામે આવી છે, જેમાં તેઓ પરિવાર સાથે માતાની ભક્તિમાં લીન જોવા મળે છે. અભિનેત્રી રકુલે ગુવાહાટીથી મા કામાખ્યા દેવી મંદિરની મુલાકાત લેવાની તેની તસવીરો ઈન્સ્ટાગ્રામ સ્ટોરી પર શેર કરી હતી. પ્રથમ તસવીરમાં તે તેના પતિ જેકી સાથે મંદિરની સામે ઉભેલી જોવા મળે છે.

અભિનેત્રીએ ઓરેન્જ કલરનો ડ્રેસ પહેર્યો છે. તેના હાથમાં ફૂલોની માળા છે. માથા પર લાલ સિંદૂરથી માતાનું તિલક લગાવીને રકુલ ભક્તિમાં લીન દેખાય છે. જેકી પીળા રંગના કૂર્તામાં જોવા મળી રહ્યો છે.

ગોવામાં થયા હતા ગ્રાન્ડ લગ્ન

તાજેતરમાં રકુલ અને જેકીએ 21 ફેબ્રુઆરીએ ગોવામાં ધૂમ-ધામથી લગ્ન કર્યા હતા. બંનેના લગ્નનો સમારંભ ત્રણ દિવસ સુધી ચાલ્યો હતો. પ્રી-વેડિંગથી લઈને લગ્ન સુધી બોલિવૂડની અનેક સેલિબ્રીટીઝ સામેલ થઈ હતી. વેડિંગમાં ભૂમિ પેડેનકર, ટાઈગર શ્રોફ, અક્ષય કુમાર, શાહિદ કપૂર, મીરા રાજપૂત, શિલ્પા શેટ્ટી, રાજ કુન્દ્રા, અનન્યા પાંડે અને આદિત્ય રોય કપૂર સહિત અનેક ફિલ્મી સ્ટાર્સ સામેલ થયા હતા. લગ્ન બાદથી જ કપલના વેડિંગ પિક્ચર્સ પણ ઈન્ટરનેટ પર છવાયેલા છે.

આ પણ વાંચોઃ Pocoનો આકર્ષક ફોન ટૂંક સમયમાં જ લોન્ચ થશે, Realmeના નવા સ્માર્ટફોનને ટક્કર આપશે