UPમાં 13 હજાર ગેરકાયદે મદરેસાઓ બંધ કરવાની ભલામણ, ગલ્ફ દેશોના ફંડિંગથી બનતા હોવાનો દાવો
યુપી, 07 માર્ચ 2024: ગેરકાયદે મદરેસાઓની તપાસ કરી રહેલી SITએ પોતાનો રિપોર્ટ યોગી સરકારને સોંપી દીધો છે. SITએ લગભગ 13 હજાર મદરેસાઓને બંધ કરવાની ભલામણ કરી છે. તપાસમાં જે મદરેસા ગેરકાયદેસર જણાયા છે તેમાંથી મોટા ભાગના મદરેસા નેપાળ બોર્ડર પર સ્થિત છે. SITએ રિપોર્ટમાં દાવો કર્યો છે કે આ મદરેસાઓ છેલ્લા બે દાયકામાં ગલ્ફ દેશોમાંથી મળેલા પૈસાથી બનાવવામાં આવી છે.
SITએ જે 13 હજાર મદરેસાઓને બંધ કરવાની ભલામણ કરી છે તેમાંથી મોટા ભાગના નેપાળ સરહદે મહારાજગંજ, શ્રાવસ્તી, બહરાઇચ સહિત 7 જિલ્લાઓમાં છે. દરેક સરહદી જિલ્લામાં આવી મદરેસાઓની સંખ્યા 500-500થી વધુ છે.
‘મદરેસાઓ દાતાનું નામ જાહેર કરી શક્યા નથી’
SITએ રિપોર્ટમાં વધુમાં જણાવ્યું હતું કે, જ્યારે આ મદરેસાઓ પાસેથી તેમની આવક અને ખર્ચની વિગતો માંગવામાં આવી હતી, ત્યારે તેઓ તે આપી શક્યા ન હતા, જેના કારણે એવી આશંકા વ્યક્ત કરવામાં આવી રહી છે કે સુનિયોજિત ષડયંત્ર હેઠળ એકત્રિત કરાયેલા નાણાં કે જે હવાલા દ્વારા મોકલવામાં આવ્યા હતા તેનો ઉપયોગ મદરેસાના નિર્માણ માટે કરવામાં આવ્યો હતો. તેમના જવાબમાં મોટાભાગની મદરેસાઓએ દાનમાં આપેલા પૈસાથી બાંધકામ કરાવવાનો દાવો કર્યો છે, પરંતુ દાન આપનારાઓના નામ જાહેર કરી શક્યા નથી. તપાસ દરમિયાન કુલ 23 હજાર મદરેસાઓમાંથી 5 હજાર પાસે અસ્થાયી માન્યતાના દસ્તાવેજો છે.
‘SITને 100 કરોડ રૂપિયાના ફંડિંગની આશંકા’
પ્રારંભિક તપાસ બાદ SITએ સરહદી વિસ્તારોમાં સ્થિત મદરેસાઓમાં લગભગ 100 કરોડ રૂપિયાના ફંડિંગની આશંકા વ્યક્ત કરી હતી, જેના કારણે યુપી સરકારે તમામ મદરેસાઓની તપાસ કરવાના નિર્દેશ આપ્યા હતા.
‘વિદેશી ભંડોળ અંગે ફરિયાદો મળી રહી હતી’
આ પહેલા યોગી સરકારે હાલમાં જ રાજ્યમાં ચાલતી મદરેસાઓનો સર્વે કર્યો હતો. સર્વેમાં બહાર આવ્યું છે કે રાજ્યમાં 16,513 માન્ય મદરેસાઓ છે. જ્યારે 8,500 માન્યતા વગરની મદરેસા પણ ચાલી રહી છે. તે પછી, આરોપો લગાવવામાં આવ્યા કે આ મદરેસાઓને વિદેશી ભંડોળ મળી રહ્યું છે, જેનો તેઓ દુરુપયોગ કરી રહ્યા છે. આ મામલાની તપાસ માટે SIT ટીમ બનાવવામાં આવી હતી.
નેપાળ સરહદને અડીને આવેલી મદરેસાઓ પર ખાસ ધ્યાન રાખવામાં આવ્યું હતું.
નેપાળની સરહદે આવેલા વિસ્તારોમાં પણ મોટી સંખ્યામાં અજાણી મદરેસાઓ મળી આવી છે. આ વિસ્તાર સંવેદનશીલ છે. આવી સ્થિતિમાં SITની ટીમની આ વિસ્તારમાં ચાલતા મદરેસાઓ પર ખાસ નજર હતી. SITની ટીમ ખાસ કરીને આ મદરેસાઓની તપાસ કરવા પહોંચી હતી. હકીકતમાં, જ્યારે મદરેસાઓનો સર્વે કરવામાં આવી રહ્યો હતો ત્યારે નેપાળની સરહદે આવેલા વિસ્તારોમાં ચાલતા મદરેસાઓ સામે મોટી સંખ્યામાં ફરિયાદો મળી હતી. આરોપ હતો કે આ મદરેસાઓ વિદેશી ભંડોળનો દુરુપયોગ કરી રહી છે. ત્યારથી સરકાર આ મદરેસાઓ પર નજર રાખી રહી હતી.
