- ગતવર્ષ કરતા 12.5 ટકાનો વધારો નોંધાયો
નવી દિલ્હી, 1 માર્ચ : ભારત સરકારના જણાવ્યા અનુસાર, ફેબ્રુઆરી 2024 માં ગ્રોસ ગુડ્સ એન્ડ સર્વિસ ટેક્સ (GST)ની આવક 1,68,337 કરોડ રૂપિયા એકત્રિત કરવામાં આવી હતી. 2023 માં સમાન મહિનાની તુલનામાં 12.5% નો મજબૂત વધારો થયો છે. શુક્રવારે નાણા મંત્રાલય દ્વારા આ સંબંધિત ડેટા જાહેર કરવામાં આવ્યો હતો. વર્તમાન નાણાકીય વર્ષ (એપ્રિલ 2023-ફેબ્રુઆરી 2024) માટે કુલ GST કલેક્શન રૂ.18.40 લાખ કરોડ હતું, જે પાછલા નાણાકીય વર્ષના સમાન સમયગાળાના કલેક્શન કરતાં 11.7 ટકા વધુ છે.
ચાલુ નાણાકીય વર્ષમાં સરેરાશ માસિક ગ્રોસ કલેક્શન રૂ.1.67 લાખ કરોડ રહ્યું છે, જે ગયા નાણાકીય વર્ષમાં રૂ. 1.5 લાખ કરોડ કરતાં વધુ છે. નાણા મંત્રાલયે એક નિવેદનમાં જણાવ્યું હતું કે, ફેબ્રુઆરી 2024 માટે ગ્રોસ ગુડ્સ એન્ડ સર્વિસ ટેક્સ (GST) ની આવક રૂ. 1,68,337 કરોડ છે, જે 2023 માં ફેબ્રુઆરી મહિનામાં કરવામાં આવેલ GST કલેક્શનની તુલનામાં 12.5 ટકાની મજબૂત વૃદ્ધિ દર્શાવે છે. GST કલેક્શનમાં આ વધારો સ્થાનિક વ્યવહારોમાંથી GSTમાં 13.9 ટકા અને માલની આયાતથી GSTમાં 8.5 ટકાના વધારાને કારણે થયો છે.
