મોરબી જિલ્લાના 34,400 ઘરોની છત પર થશે વીજ ઉત્પાદન
મોરબી, 28 ફેબ્રુઆરી : ગરીબ તેમજ મઘ્યમ વર્ગના પરિવારોને મફત વીજળી આપવા માટે અને સૌર ઊર્જાને પ્રોત્સાહિત કરવા માટે પીએમ સૂર્યઘર યોજના-૨૦૨૪ વડાપ્રધાન નરેન્દ્ર મોદી દ્વારા શરૂ કરવામાં આવી છે. આ યોજનાનો મુખ્ય ઉદ્દેશ્ય એક કરોડ પરિવારોને ૩૦૦ યુનિટ સુધી મફત વીજળી પૂરી પાડવાનો છે. આ યોજનાના માધ્યમ દ્વારા રૂ. ૭૫,૦૦૦ કરોડના રોકાણ હેઠળ ભારતના એક કરોડ ઘરો પર સોલાર રૂફટોપ સિસ્ટમ દ્વારા વીજળી પહોંચાડવામાં આવશે. જેના ઉપર કેન્દ્ર સરકાર દ્વારા સબસિડી પૂરી પાડવામાં આવશે. આ યોજનાથી લોકો માટે મફત વીજળીના સપના સાકાર થશે. સાથે જ સરકારને વીજળીના ખર્ચમાં પણ ઘટાડો થશે, પુનઃ પ્રાપ્ય ઊર્જામાં વધારો થશે અને કાર્બન ઉત્સર્જનમાં ઘટાડો થશે.
પી.એમ. સૂર્યઘર યોજનામાં પ્રથમ ૧ થી ૨ કિલોવોટ સુધી પર કિલોવોટ રૂ. ૩૦,૦૦૦ એટલે કે બે કિલોવોટ સુધી રૂ.૬૦,૦૦૦ અને ત્યારબાદ વધારાના એક કિલોવોટ પર રૂ.૧૮,૦૦૦ એટલે કે ૧ થી ૩ કિલો વોટ સુધી રૂ.૭૮,૦૦૦ સબસીડી મળવા પાત્ર થશે. જે ગ્રાહકના બેંક ખાતામાં સીધી જમાં કરવામાં આવશે. ઉદાહરણ દ્વારા સમજીએ તો જો વપરાશ શૂન્ય થી ૧૫૦ યુનિટનો હોય તો ૧ થી ૨ કિલોવોટની સોલાર સિસ્ટમ લગાવવાથી રૂપિયા ૩૦,૦૦૦ થી ૬૦,૦૦૦ સુધીની સબસિડી મળવા પાત્ર થશે. જો વપરાશ ૧૫૦ થી ૩૦૦ યુનિટનો હોય તો ૨ થી ૩ કિલોવોટની સોલાર રૂફટોપ સિસ્ટમ લગાવવાથી રૂ.૬૦૦૦૦ થી રૂ.૭૮,૦૦૦ સુધીની સબસિડી મળવાપાત્ર થશે અને જો ૩૦૦ યુનિટથી વધુ વપરાશ હોય તો ૩ કિલોવોટથી વધુની સોલાર સિસ્ટમ લગાવવાથી વધુમાં વધુ રૂ. ૭૮,૦૦૦ સુધી સબસિડી મળવા પાત્ર થશે.
સોલાર સીસ્ટમ ઇન્સ્ટોલ કરાવવા ૧ કિલોવોટ માટે સરેરાશ ૧૦૦ સ્કેવર ફૂટની જગ્યામાં થઈ શકે છે એટલે કે ૨ કિલોવોટ માટે ૨૦૦ સ્ક્વેર ફૂટ અને ૩ કિલોવોટ માટે સરેરાશ ૩૦૦ સ્ક્વેર ફૂટની જગ્યામાં થઈ શકે છે. ૧ કિલોવોટની સોલાર સિસ્ટમ દ્વારા દરરોજ સરેરાશ ૪ કે તેથી વધારે વીજળી યુનિટનું ઉત્પાદન થઈ શકે છે આમ, જેમ કિલોવોટની સંખ્યામાં વધારો થતો જાય તેમ વીજળી યુનિટ ઉત્પાદન કરવાની ક્ષમતામાં પણ વધારો થતો જાય છે.
પી.એમ. સૂર્યઘર યોજનાનું રજીસ્ટ્રેશન https://pmsuryaghar.gov.in/ નેશનલ પોર્ટલ ઉપર ગ્રાહક જાતે કરી શકશે અથવા સરકારે અધિકૃત કરેલી એજન્સી દ્વારા અથવા વીજ કંપનીના કર્મચારીઓની મદદથી કરી શકાશે.
મોરબી PGVCL કચેરીના અધિક્ષક ઇજનેર એસ.એચ.રાઠોડે માહિતી આપતા જણાવ્યું હતું કે, હાલમાં પી.એમ. સૂર્યઘર યોજના માટે મોરબી જિલ્લામાં તા.૧૪-૨-૨૦૨૪ થી રજીસ્ટ્રેશન માટે ૯૦ ટીમો કાર્યરત છે. આ યોજનાનો લાભ લેવા માટે મોરબી જિલ્લા હેઠળ ચાર વિભાગીય અને ૧૮ પેટા વિભાગીય કચેરીનો સંપર્ક કરી શકાશે. વધારે માહિતી માટે PGVCL મોરબી કચેરીનો સંપર્ક કરી શકાશે.
પી.એમ. સૂર્યઘર યોજના મોરબી જિલ્લાના નોડલ અધિકારી બી.જે.વાછાણીએ જણાવ્યું હતું કે મોરબી જિલ્લા માટે કુલ ૩૪,૪૦૦ જેટલાં કનેકશનોને પી.એમ. સૂર્યઘર યોજના હેઠળ આવરી લઈ આગળની પ્રક્રિયા હાથ ધરવામાં આવી છે. જેમાં તાલુકાવાર મોરબી ૨૦,૫૦૩ વાંકાનેર ૫,૭૪૩, હળવદ ૫,૦૦૦, ટંકારા ૧,૨૦૭ અને માળિયા ૧,૯૪૭ કનેકશનનો સમાવેશ કરવામાં આવ્યો છે. પી. એમ. સૂર્યઘર યોજનાના રજીસ્ટ્રેશન માટે અરજદાર પાસે લાઇટ બિલ, મોબાઈલ નંબર તેમજ બેન્કની વિગત હોવી જરૂરી છે.
પ્રધાનમંત્રી સૂર્યઘર યોજના થકી ઓછી અને મઘ્યમ આવક ધરાવતા વ્યક્તિઓને રૂફટોપ સોલાર પ્રોગ્રામ હેઠળ આવરી તેમના વીજળી બિલને શૂન્ય કરવાનો સરકારનો આ પ્રયાસ છે. તેમજ, તે બચત કરેલી વીજળીનું વેચાણ કરી પોતાની આવક ઊભી કરી શકશે.
આ પણ વાંચો : મહિલા ચૅસ ખેલાડીએ ફોટો એડિટ કરવા સોશિયલ મીડિયા પર મદદ તો માગી પણ…
