RBIએ SBIને ફટકાર્યો 2 કરોડનો દંડ, શું આનાથી ગ્રાહકોને અસર થશે?

દિલ્હી, 27 ફેબ્રુઆરી: દેશની સૌથી મોટી સરકારી બેંક SBI છેલ્લા કેટલાક સમયથી ચર્ચામાં છે. કેમ કે SBIના Shares સતત રૉકેટની જેમ ઉપર જઈ રહ્યા છે અને તેના બજાર મૂલ્યમાં જોરદાર ઉછાળો જોવા મળ્યો છે. પરંતુ, હવે ફરી એકવાર સ્ટેટ બેંક ચર્ચામાં છે અને તેનું કારણ કંઈક બીજું છે. હકીકતમાં, ભારતીય રિઝર્વ બેંક (RBI) એ SBI પર 2 કરોડ રૂપિયાનો મોટો દંડ ફટકાર્યો છે. ચાલો જાણીએ શું કારણે RBIએ લગાવ્યો SBI પર દંડ.

RBIએ માહિતી આપી

ભારતીય રિઝર્વ બેંકે સ્ટેટ બેંક ઓફ ઈન્ડિયા (SBI) પર 2 કરોડ રૂપિયાનો દંડ ફટકાર્યો છે અને સોમવારે તેની માહિતી શેર કરી છે. આ દંડ નિયમનકારી પાલનના અભાવે લાદવામાં આવ્યો છે. બિઝનેસ ટુડે અનુસાર, આ સંબંધમાં માહિતી શેર કરતી વખતે RBIએ કહ્યું છે કે SBIએ ડિપોઝિટર અવેરનેસ ફંડ સ્કીમ 2014ના કેટલાક નિયમોનું ઉલ્લંઘન કર્યું છે. જેના કારણે બેંક પર દંડની કાર્યવાહી કરવામાં આવી છે.

SBIથી કઈ ભૂલ થઈ જેના કારણે 2 કરોડ દંડ થયો?

રિપોર્ટમાં કહેવામાં આવ્યું છે કે આરબીઆઈને જાણવા મળ્યું છે કે સ્ટેટ બેંકે કેટલીક કંપનીઓની 30 ટકાથી વધુ પેઇડ-અપ શેર મૂડી પ્લેજ તરીકે લીધી હતી, પરંતુ તેની રકમ બેંકિંગ રેગ્યુલેશન એક્ટ હેઠળ નિર્ધારિત સમયગાળામાં જમા કરવામાં આવી ન હતી. આ માટે સેન્ટ્રલ બેંકે SBIને કારણદર્શક નોટિસ પણ જારી કરી હતી. આ નિયમોના ઉલ્લંઘનના કિસ્સામાં બેંક પર 2 કરોડ રૂપિયાનો દંડ ફટકારવામાં આવ્યો છે.

શું આનાથી ગ્રાહકોને અસર થશે?

RBIએ આ કેસમાં સ્પષ્ટા કરી છે અને કહ્યું છે કે, ‘આ દંડ SBI પર નિયમનકારી અનુપાલનમાં ખામીઓ માટે લાદવામાં આવ્યો છે અને તેને બેંક અને ગ્રાહકો વચ્ચેના વ્યવહાર અથવા કોઈપણ પ્રકારના કરાર સાથે કોઈ લેવાદેવા નથી.’ આનો અર્થ એ છે કે આરબીઆઈના આ પગલાની બેંક વપરાશકર્તાઓ પર કોઈ અસર નહીં થાય અને તેઓને બધી સેવાઓ સરળતાથી મળતી રહેશે.

આ બંને બેંકો પર પણ દંડ ફટકારવામાં આવ્યો છે

હાલમાં આરબીઆઈ નિયમોનું ઉલ્લંઘન કરતી નાણાકીય સંસ્થાઓ સામે સંપૂર્ણ કાર્યવાહીના મૂડમાં હોવાનું જણાય છે. માત્ર SBI જ નહીં પરંતુ કેન્દ્રીય બેંકે વધુ બે બેંકો પર દંડ ફટકાર્યો છે. આમાં પહેલું નામ સિટી યુનિયન બેંકનું છે, જેના પર એનપીએ એકાઉન્ટ્સ સંબંધિત આવકની ઓળખના વિવેકપૂર્ણ નિયમોનો ભંગ કરવાનો આરોપ છે અને તેના માટે બેંક પર 66 લાખ રૂપિયાનો દંડ લગાવવામાં આવ્યો છે. આ સિવાય આરબીઆઈની ગાઈડલાઈનનું ઉલ્લંઘન કરવું પણ કેનેરા બેંકને મોંઘુ સાબિત થયું છે અને તેના પર 32.30 લાખ રૂપિયાનો દંડ ફટકારવામાં આવ્યો છે.

આ પણ વાંચો: બેંકના કામે જઈ રહ્યા છો તો આ જોઈ લેજો લિસ્ટ, માર્ચમાં કુલ 14 દિવસ બંધ રહેશે બેંક