મહારાષ્ટ્રના પૂર્વ CM મનોહર જોશીનું નિધન, 86 વર્ષની વયે લીધી વિદાય

• ગુરુવારે સાંજે હૃદયરોગનો હુમલો આવતા હોસ્પિટલમાં કરવામાં આવ્યા હતા દાખલ

મુંબઈ, 23 ફેબ્રુઆરી: મહારાષ્ટ્રના પૂર્વ મુખ્યમંત્રી મનોહર જોશીનું નિધન થયું છે. મનોહર જોશીના અંતિમ સંસ્કાર આજે શુક્રવારે બપોરે 2 વાગ્યે કરવામાં આવશે. ઉલ્લેખનીય છે કે ગઈકાલે સાંજે લોકસભાના પૂર્વ અધ્યક્ષ મનોહર જોશીને હાર્ટ એટેક આવ્યો હતો, ત્યારબાદ તેમને મુંબઈની હિન્દુજા હોસ્પિટલમાં દાખલ કરવામાં આવ્યા હતા. કહેવામાં આવી રહ્યું છે કે, 86 વર્ષની વયે રાત્રે લગભગ 3 વાગે તેમણે અંતિમ શ્વાસ લીધા હતા. મનોહર જોશીના પાર્થિવ દેહને અંતિમ દર્શન માટે તેમના માટુંગા સ્થિત ઘરે સવારે 11થી 2 વાગ્યા સુધી રાખવામાં આવશે. ત્યારબાદ દાદર સ્મશાન ભૂમિમાં મનોહર જોશીના અંતિમ સંસ્કાર કરવામાં આવશે.

Former CM of Maharashtra and Former Lok Sabha Speaker Manohar Joshi breathed his last today at Hinduja Hospital Mumbai at around 3:00 am. He was admitted to Hinduja Hospital on February 21 after he suffered a cardiac arrest: Family sources pic.twitter.com/vEEKPTVTtN

— ANI (@ANI) February 23, 2024

શિવસેના તરફથી પ્રથમ મુખ્યમંત્રી

મનોહર જોશી શિવસેનાના દિગ્ગજ નેતાઓમાંના એક હતા. ઉલ્લેખનીય છે કે, મનોહર જોશી 1995થી 1999 સુધી મહારાષ્ટ્રના મુખ્યપ્રધાન હતા અને અવિભાજિત શિવસેના તરફથી રાજ્યના મુખ્ય પ્રધાન બનનારા તેઓ પ્રથમ નેતા હતા. આ સિવાય મનોહર જોશી સાંસદ પણ રહી ચુક્યા છે અને તત્કાલીન વાજપેયી સરકારમાં 2002થી 2004 સુધી લોકસભાના સ્પીકર પણ હતા. મનોહર જોશી માર્ચ 1995માં મહારાષ્ટ્રના મુખ્યમંત્રી બન્યા.

મનોહર જોશી બાળાસાહેબને હતા વફાદાર

મહારાષ્ટ્રના ભૂતપૂર્વ મુખ્યપ્રધાન મનોહર જોશી શિવસેનાના પ્રથમ મુખ્યપ્રધાન જ નહીં પરંતુ શિવસેનાના સ્થાપક સ્વર્ગસ્થ બાળાસાહેબ ઠાકરેના ખૂબ નજીકના સહયોગીઓમાંના એક હતા. જોશી બાળાસાહેબના ખૂબ વફાદાર માનવામાં આવતા હતા, તેથી ગયા વર્ષે જ્યારે તેમને હોસ્પિટલમાં દાખલ કરવામાં આવ્યા હતા, ત્યારે ઉદ્ધવ ઠાકરે તેમની પત્ની રશ્મિ અને પરિવારના અન્ય સભ્યો સાથે તેમની સ્થિતિ વિશે પૂછવા માટે હોસ્પિટલમાં ગયા હતા. મહારાષ્ટ્રના મુખ્યમંત્રી બનનારા તેઓ શિવસેનાના પ્રથમ નેતા છે અને 1966માં આ પાર્ટીની રચના થઈ ત્યારથી તેમની સાથે જોડાયેલા છે.

રાયગઢ જિલ્લામાં જન્મ થયો હતો

ભૂતપૂર્વ લોકસભા અધ્યક્ષ મનોહર જોશીનો જન્મ મહારાષ્ટ્રના રાયગઢ જિલ્લાના નાંદવી ગામમાં થયો હતો. જોશીનો જન્મ 2 ડિસેમ્બર, 1937ના રોજ મરાઠી બ્રાહ્મણ પરિવારમાં થયો હતો. તેમના પિતાનું નામ ગજાનન કૃષ્ણ જોશી અને માતાનું નામ સરસ્વતી ગજાનન હતું.

આ પણ જુઓ: ‘અનુપમા’ સિરિયલના એક્ટર ઋતુરાજ સિંહનું નિધન, 59 વર્ષની વયે દુનિયાને કહ્યું અલવિદા